ملفوف الليمون المنعش

[minina2601]

بسم الله والصلاة والسلام على رسول الله
اللهم أتنا في الدنيا حسنة وفي الآخرة حسنة وقنا عذاب النار
السلام عليكم ورحمة الله وبركاته

أول مرة أضع فيها وصفة للحلويات واخترت نوع محبوب شكلا ومذاقا هو ملفوف الليمون المنعش نبدأ بسم الله
شراب السكر ضروري يكون بارد
كيلة سكر
2كيلات ماء
شريحة ليمون
مبشور ليمون
نخليهم يغليو لمدة 15د


كريمة الليمون

هذا هو الرابط في اليوتيوب

https://www.youtube.com/watch?v=Prmo6D218so
حضرتها بنفس الطريقة مع بعض التعديلات
150مل عصير ليمون ومبشورها
200غ سكر
3بيضات متوسطين
70غ زبدة لو تشوفو الفيديو تلقاوني نقصت في الزبدة لقيت بلي 70غ انسب والله اعلم
نضعهم في قدر ونخلطوهم مليح بالخفاقة اليدوية ونحطوهم على النار نبقاو نخلطوحتى تعقاد وتولي كريمة مثل الكريمة الانجليزية نطفي النار نخليها تبرد شوية ونضيف الزبدة ونحركها حتى تذوب مع الاول يكون قوامه سائل شويا ثم عندما تضعونه في الثلاجة يبرد ويبدا يجمد انا نعمل كمية منه ونحفظ بيه فالثلاجة
تحضير البسكويت كالتالي
4بيض
سكر كاس ماشي معمر انا استعملت كاس الخردل
3ملاعق كبيرة زيت عباد الشمس اختياري يعطيه طروة وخفة
ملعقة كبيرة فانيلا بودرة ليمون مبشور
رشة ملح لبياض البيض
فرينة 3ملاعق كبيرة مملوؤة
مايزينة ملعقة ونصف
كيس خميرة كيميائية

نخلط المواد الجافة مع بعض
نخفق بياض البيض مع رشة الملح جيدا
نخفق صفار البيض مع السكر الفانيلا ومبشور 3حبات ليمون حتى يصبح لونه ابيض ثم نضيف له الزيت على شكل خيط مع مواصلة الخفق

نمزج الكل بواسطة ملعقة مسطحة او spatule بحركة دائرية من فوق لتحت للمحافظة على خفة الخليط نصب الخليط في صينية مفروشة بورق الطهي او المنيوم مدهون لتفادي الالتصاق بالنسبة للوقت تقريبا 7د

بعدما طاب قلبتو على قطعة قماش ونزعت الغلاف بشوية برك ولفيته على نفسه وتركته لمدة 15د

كي يبرد حلوه ورشوه بشراب السكر ماشي شرط تكملو كامل شراب السكر

نضع طبقة سميكة من كريمة الليمون الرائعة ونلف من جديد من الاحسن خلوه يبرد باه يحكم روحو

وصلنا لكريمة التزيين
بما انه بالليمون نحتاج الى كريمة الليمون نشاء زبدة بدرجة حرارة الغرفة ومبشور الليمون والقليل من شراب السكر
نحط كريمة الليمون والنشاء على النار حتى تعقاد وتثقال مليح

نخلوها تبرد مليح ونزيدولها مبشور الليمون قطع من الزبدة ونطلعها بالخفاق حتى تولي كريمية وخفيفة نزيدلها شوية شراب السكر المحضر سابقا حوالي 3ملاق كبار ونكمل الخفق من الافضل تحطوها في اناء صغير وعميق

تبقى طريقة التزيين لكم ممكن تزينوها بالفرشيطة ولا تنسوا مكاش احلى من البساطة شوفو قبل ما تحطو الكريمة لكم الاختيار اذا حبيتو تزيدو تشربوه شراب السكر باش يجي طري اكثر

هاوليك ملفوف الليمون تاعي تجربوه بالصحة والهناء عليكم وبارك الله فيكم




حبيباتي متنساوش تقولولي رايكم وتشرفوني بتطبيقاتكم واسالكم بالله تدعولي في صلاتكم
استودعكم الله الذي لا تضيع ودائعه والسلام عليكم ورحمة الله وبركاته
استغفر الله العظيم واتوب اليه