قاطو رولي رخامي بكريمة الليمون

[lilii7179]

.الى محبي الحمضيات حبيت اليوم نشارككم بوصفة مجربتها منذ سنوات هي في الحقيقة لحورية المطبخ و كيما تقول هي من اروع ما يكون

صحيح اني اجريت بعض التعديلات من كثرة ما جربتها و في كل مرة تخرج هايلة و تنال اعجاب الجميع.

باش ما نطولش بزاف اليكم المقادير

القاطو رولي

5 بيضات

140غ سكر

140غ فرينة ( 100غ وحدها و 40 غ وحدها)

3 مغارف كبار كاكاو

لا فاني

باكي خميرة الحلويات

قشور الليمون (نصف ليمونة)

الكريمة

2 بيضات

قشور حبة ليمون

4 مغارف كبار سكر ( اللي ما تحبش الحماضة بزاف تزيد شوية سكر)

4 مغارف كبار زبدة

1 مغرف نشاء

لا فاني

½ كاس عصير ليمون او ما يعادل عصير حبتين ليمون او 100 ملل . و اذا عصرتي 2 حبات و ما خرجلكش نص كاس تقدري تكملي بالماء للحصول على المقدار المطلوب.

الشاربات

1/2 كاس ماء

4 مغارف كبار سكر

عصير نصف ليمونة

و اليكم طريقة التحضير بالصور

نبداو بالعجينة

خلطي البيض مع السكر زائد لا فاني بالباتور باش يطلع مليح و يجيك خفيييف

المرحلة الثانية انك تقسمي الخليط الى قسمين متساويين كل واحد في اناء

القسم الاول: نزيدلو قشور الليمون و 100 غ فرينة و نصف باكي خميرة

القسم الثاني : نزيدولو 40غ فرينة و 3 مغارف كبار كاكاو و نصف باكي خميرة

هنا نكونو تحصلنا على عجينتين الاولى بيضاء و الثانية بنية نحطو كل وحدة في بوش جوتابل poche a douille jetableو اللي ما عندهاش دير ساشي نتاع تجميد يكون نظيف. تفتحيه بالمقص

توجدي بلاطو نتاع فور فرشيه بورق الزبدة و تبداي التشكيل

نبداو بالعجينة البنية : ديري خطوط مائلة عريضة و متباعدة ثم نوليو للعجينة البيضاء نعمرو بيها الفراغات . تحكمي مغرف او موس و ديري خطوط ذهابا وايابا للحصول على شكل كيما نتاع الميلفاي

كي تخرجيه تكوني موجدة منديل نظيف و مندي قلبي فيه القاطو و روليه و خليه يبرد.

في نفس الوقت تكوني حطيتي الشاربات فوق النار تغلي, ما تخليهاش تعقد و بالنسبة لكمية السكر اللي فيها انتي و ذوقك الا ما تحبيش الحماضة بزاف زيدي السكر

الكريمة

في كسرونة حطي عصير الليمون, السكر, الزبدة, قشور الليمون, و حطيها على النار تغلي حتان يذوب السكر

من جهة اخرى خبطي بالباتور البيض و لا فاني و النشاء. زيديلو الخليط الاول بشوية ثم رجعي الكل فوق النار و حركي حتى تتحصلي على كريمة كيما كريم باتيسيار حطيها تبرد.

بعد ما يبرد كلشي حلي القاطو نتاعك , اسقيه بالشاربات بالبانسو ثم اطلي الكريمة و روليه و خليه يبرد. و عن تجربة قد ما يبرد يزيد يبنان و كي يبات ما نحكيلكمش و كي يبقي الطرف اللخر طيح الروح عليه ههههههه

بالنسبة للتزيين انا نحبو برشة سكر قلاص اللي تحب دير قالاصاج او حاجة اخرى كل وحدة و ذوقها

و اليكم الصور بعد ما وجد









هاذيك صورتها فالليل و هاذي صورتها الصباح شكيت بلي الانارة ماهيش مليحة

نتمنى اني قدرت نشرح مليح و نتمنى تجربوه خاطر يستاهل و يحمر الوجه

ادعيولي يسهلي ربي ولادتي
تحية خاصة الى كل اخت تحط مواضيع والله ماهيش حاجة ساهلة انك تصوري و تشرحي, دعواتي الى كل الاخوات في المنتدى