عاجل إلى أم أماني أو كلّ محترفة

[غزالة الصّحراء]

سلام اللّه على الجميع.
قبل أن أطرح موضوعي أتقدّم بتشكراتي الخالصة إلى كلّ عضوة من عضوات منتدى الجلفة بالخصوص كلّ من أفادتنا بموضوع من مواضيعها في كلّ ركن من أركان منتدانا الغالي.
موضوعي حول : حلوة المشكلة التي قدمتيها يا أختي أم أماني . قبل أن أجربها طبقا لطريقتك وبالتّفصيل.
لدي بعض الأسئلة:- مقادير الحشو:
2كيلات لوز مرحي رقيق. هل يجوز أن أغيّرها بالكاوكاو؟
كيلة جوز مرحي رقيق هل يجوز أن أغيّرها باللّوز.... ؟
بعد ذلك نرش شوية ما يزينة ونمرر العجينة في الة العجين لازم تكون رقيقة تقريبا بسمك1مم. الماشينة أنتاعي فيها الأرقام إلى غاية ( 7 ) ماهو الرّقم بالتّحديد الّذي اتوقف عنده.
أم أماني اللّه ايخليك راهي الحلوة عجبتني بالبزاف حبيت أنجربها ب ( الكاوكاو واللّوز) . حسب المقادير ألي قلت لك عليها . وإذا نجحت معايا راني أنديرها بطريقتك100/100. الحلويات أنتاعك ألي جربتها نجحت معايا كلّها. بصّح هاذي بالذات راني خايف منها.
اللّه ايخليك رديّ عليّ بالتّوضيح . أو كلّ من تقرأ الموضوع تردّ عليّ .
وشكرا لكنّ.

[عازفة الناي]

حبيبتي شوفي
ممكن تستعملي الكاوكاو المعالج يجيك الطعم افضل.
كي تحمصي الكاوكاو ماتحمصيهش بزاف
اما الماشينة ديري رقم 6
ان شاء الله لبنات يزيدو يفيدوك

[Nedjemet al bahr]

انا يظهرلي تقدري تعوضي اللوز بالكاوكاو بصح الجوز لوكان تعوضيه باللوز تغلب ريحة الكاوكاو عليه وكلي ما درتيش بصح الجوز ريحتو قاوية
وان شاء الله تدخل ام اماني وتفيدك اكثر

[raboha]

تقدري دريها بالكوكاو و اللوز تجيك بنينة بزاف خطرة أنا درت بيهم بقلاوة هذي كي لقيت اللوز
أما المشكلة نخدمها غير بالكوكاو و تخرج هايلة السر فالكوكاو متحمصيهش بزاف سخني الفرن ثم دخلي الكوكاو عسيه قد اللي يسخن خرجيه
أنا غير نخرجو نرحيه سخون يجيني قد قد و مرحي شباب و نكثرلو الفانيلا غبرة تجي فيه بنة مليحة و إذا لقيت نزيدلو عطر اللوز
أما الماشينة الرقم 7 تجيك رقيقة بزاف حلي فالرقم 6
إن شاء الله نكون أفدتك
و أم أماني تسمحلنا جاوبنا في بلاستها

[ام اماني77]

صباح الخيرات

اولا نشكر الاخوات لي جاوبوك في ميزان حسناتهم يااااارب

اختي بالنسبة للمشكلة انا شخصيا نعملها غير باللوز ماجربتش الكاوكاو

لمن الاخت راهي جاوبتك لانها جربتها يعطيها الصحة

المهم الكاوكاو قيس مايسخن مالازمش يتلون

اذا عملتها بالكاوكاو ماتضيفش اللوز لان ذوق الكاوكاو راح يظهر اكثر واللوز مايظهرش خلاص

ممكن نعملها باللوز فقط لكن البنة نتاع الصح كي نحط كيلة جوز طبعا هنا كل اخت وامكانياتها

بالنسبة لهذا الحلوى راهي ساهلة جداااا اذا كونتي تعرفي تنقشي هذا الاهمانا في كل مناسبة نعملها راح نعطيك بعض النصائح

اولا قبل ماتبلي العجينة ضفيلها ملون ابيض تجيك هااااايلة

العجينة خليها متماسكة مليح حتى يسهل تشكيل الحلوى

بالنسبة للحشو بعد ماتكيلي السكر واللوز

كمية السكر ارحيها وحدها من بعد ضيفلها اللوز ولميها بالبيض وخليها ترتاح حتى السكر يذوب فيها

العجينة كي ترقيها في الماشينة ملازمش تكون رقيقة بزاف لانك اذا رققتيها كي تجي تنقشي راح تقيسي الحشو بالنقاش

لذلك اعمليها في 6 اذا جاتك رقيقة بزاف اعمليها في 5
واذا جاتك 6 رقيقة و5 خشينة فوتيها في رقم 5 وفوتي عليها الحلال شوية

لازم تنقشي الحلوى والعجينة طرية اذا يبست راح تتكسر لذلك ننصح غطي الحبات بورق النيلون وانقشي بالحبة

خليها تبات حتى تحافظ على الشكل وغدوى من ذاك طيبيها

والاهم من هذا كله الفرن

على 150 لعدة دقائق لازم تعسيها لازمها تبقى بيضا الفوق والتحت

شوفي هنا عملتها في خطوبة سلفتي

://

https://

[غزالة الصّحراء]

صباح الأنوار على الجميع وبالخصوص اللّواتي شرّفن صفحتي بردودهنّ المُطمئنة
واش أنقول لكم ربي ايجازيكم بالجنّة إن شاء اللّه على هذه الرّدود الواضحة. صراحة حبيت نعملها في عرس خويا إن شاء اللّه. بصّح حبيت أنجربها قبل كلّ شيء بالكاوكاو كيما قالوا بعض الأخوات ، دون إضافة اللّوز بما أنّ ريحتو تتغلّب عليه الكاوكاو. وإذا نجحت معي رايح نتبع خطوات الشّاف " أم أماني" ربي يحفظها ويسترها ويستر كلّ من ردّت على سؤالي.