انا على وشك الانهيار

اياد حياتي · 2014-09-30, 10:08

السلام عليكم علاباكم واش صرالي البارح انا محطمة لجأت إلى والدين واحتقرني بابا البارح رجاء نقول كلمات بالحرف الواحد والله ان شاء اذا كنت نكذب ان شاء الله تصرالي حاجة البارح كي رجعت من الخدمة رحت باه نوجد الفطور لراجلي ومنبعد ما صبتش البريكي باه نشعل قعدت نحوس عليها ومبعد قتلها ما شفتيهاش ردت عليا بطريقة انت شوفي وين درتيها حتى شريت و احدة انتي راكي دسيها عليا قتلها الله يهديك بريكي علاه نسقسيك عليها مادام دسيتها وناظت تهدر في الكلام وانا رحت لراجلي وقتلو شريلي وكي رجعت للكوزينة معلباليش واش قاتلي قتلها والله غير عقلك صغير على بريكي درتي هكذا قاتلي انا للاك يا وحد يابسة المصفراة قلتلها انا عندي لطاي ولا جات في المعايرة نعرف نعاير قاتلي انتي راكي تحوسي تخرجيني من دار وانا ما نزوجش نقعدلك هنا هنا يموت قاسي قتلها اذا زوجتي ما تنفعي غير روحك جا راجلي وبهدلني قدامها وقالي سكتو ولا نخبطك على الحيط حاب يضربني وقالي انت غالطة كون سكتي قتلو هي بدات يارب انا واش درت في الحياة باه يصرالي هكذا غاضتني عمري وعيطت ليما قالت لبابا باه يهدرو هدرة رزينة انا مسنيتش يوقفو معايا بصح الكارثة انو بابا جا معاها وبهدلني قدامها وحاب يضربني وقالي مكيش بني ومنيش باباك تخيلو راني مصدومة مصبتش لمن نلجأ كلهم ضدي وهي ستشفات فيا وعيطت لخوها عسكري وقاتلو ما سكتلهاش راجلها وراهي فرحانة وانا والديا ذلوني قدامها ووما دارولي حتى قيمة هو راجلي كي هدرت معاه قالي روحي الا راكي حابة تروحي عارف بلي مكانش وين الروح وراهو زعفان مني انا واش درتلو قولولي اي كلمة راني مضرارة

اياد حياتي · 2014-09-30, 10:11

تخيلو دعات عليا قاتلو ان شاء ربي يجيبهالها في الصحة والله حتى خفت قلت يارب انا واش درت حتى تدعي عليا حتى بديت نخمم ونقول انا راني غالطة ولا دنيا جات ظالمة نيتي نقصت يارب متزرعش في قلبي كره وحقد وشر انا والله قلت نهار العيد معليش ونروح نسلم عليها في وجه راجلي وشوفو واش صرا وقالت والله منزيد نشوف فيها

سجل أنا جزائري · 2014-09-30, 10:38

ختي شدي في ربي و خلاص

لكن حجاة ما فهمتهاشش لما جاء حتى والدك معهم يعني يجود شيء في حكايتك معهم لان والدك و هو اللي يعرفك ملييح

مكش اب يشوف بنتو مظلومة و يوقف ضدها !!

شوفي علاش وقف بابك ضدك بالك راكي غلطتي في حاجة

hodayena · 2014-09-30, 10:41

يا اختي علاه عليك علاه عليك ماشي غير غلطتي لوكان سكتي وخليتيها علاه رديتي عليها علاه مخليتيش راجلك هو يسمع حسها معليش كبري خاطر عديها مريضة في الدار وراكي تسعفي فيها اختي ارجوكي انا صرالي نفس الموقف ديالك مع والدك واب استعرف انو غلط وباباك محبش يزيد الطين بلة وحبك تباني انتي الكبيرة في العقلية حب خوها يكتشفها وحدو وانتي درتيلها واش حبت وخليتيها تفوز عليك وانتي اديتي تبهديلة كيما الي ديتها انا لكن اختي ارجوكي اتحكمي في اعصابك مترديلها اضحكي في وجها وتشوفي راح تموت بالغزال والله لوكان يولي بيا الزمان للوراء نستعمل نفس الاسلوب ماشي مع لوستي مع عجوزتي نقهرها غير بالضحكة اتشناف والمدابزة مدير والو راهي حابة تخرجك من الدار وراه راح تربح اذا مبدلتيش عقليتك اذا مصبتيش الحاجة متسقسيهاش روحي قولي للراجل اشريلي واذا هو شافها قوليلو مشفت سقسيت واحد مردلي هكذا تسلكي منها

اختي انتي كي رديتي عليها طيحتي قدر تع راجلك مدام راجلك مقيمك لاه تردي عليها دايما العروسة يخص تكون كبيرة في العقلية واخوها مسعفها علاجال عندها النقص انتي الحمد لله متزوجة وقارية ورشيقة وراجلك يحبك وعندك ذري اختي اسكتي وخليها استعملي كيما دنيا تقول لا اشوف ولا اسمع ولا اتكلم ارمي موراك والي في راسك ديريه يا اختي لوستك تبان تافهة متعنديهاش صح تتغزلي مي بينليها بلي راكي نورمال

اياد حياتي · 2014-09-30, 10:50

بابا كيما قلت علاه دارني قالي حتى ولو كان صرخت وسكتو ما تهدريش انا مقتلوش يجي في صفي بصح والله صنيتو يهدي الامور وكنت راضية انو يقول روحي وسلمي عليها بصح ذلني قدامها

naamane3 · 2014-09-30, 10:51

هذه المشاكل ناتجة عن تركك
لاذكار الصباح والمساء
الزميها وسوف تزول كل المشاكل

bellaluna · 2014-09-30, 11:09

خطأك أنّك تردّين عليها و إن واصلت في هذا النّسق سيطلقك زوجك لأنّك دوما خاسرة في المعادلة..ضعيها نصب عينيك المرأة لا تربح أمام عائلة زوجها.
والدك أيضا يخشى طلاقك و لم يأتي إلاّ ليبرهن لك أنّه غير مرحب بك في صورة ما تخاصمت مع زوجك.

اياد حياتي · 2014-09-30, 11:43

قولولي واش ندير ذورك وهو راهو زعفان مني حتى الماكلة يحط الروحو

حنين40 · 2014-09-30, 12:07

و اختي المشاكل نطفوها ما نشعلوهاش راك لابس عليك عندك راجل دار خدمة وربما اولاد اللهم لا حسد غيرك مرمد تمرميد لا دار ولا دوار روحي اختي قبلي زوجك واطلب من السماح بحجة انك تعبانى من العمل وابني انت السعادة اروحك والله غيرك لا يبني لك حتى ضحكة
انعلي بليس وما تخليشو يفرح بالمخططات الجهنمية نتاع
وربي معاك ودئما اضرب حسابك كي تهدر مع سلفتك

آمِيْرَتُه · 2014-09-30, 12:11

السلام عليك
باباك مجاش معاك لان فحل و راجل كي يخرجك و يديك واش من فايدة
باباك عقله رزين على راجلك و عليهم
ربي يحفظهلك
هو مين جاء معها مجاش لان شافك ظالمتها لالا هديك يقولولها الرزانة و التربية الحسنة
صوميها و متعمري راسك بيها كون جات فحلة و مأصلة كون راحت دبرت على راسها ماشي قاعدة تعس فيك

اياد حياتي · 2014-10-01, 09:35

الحمد لله رحت لراجلي وتكلمت معاه عادي ورانا ملاح ان شاء الله ربي يحفظكم لانكم صحيح عطيتوني اراء حكيمة وصحيحة صح انا منيش نتلكم معاها بصح راني مليحة لانو تكلمت مع عمي تعتبر اخي وعطاني هو ايضا كلمات خلا المورال يطلع وربي يفرج اقسم باللله اني حسيتكم اخوتي في الله وان شاء الله لكل واحد عندو مشكلة ربي يحلها وخاصة الاخت هدينة ربي يكون معاها وسمحولي اذا طولت

نارينا · 2014-10-01, 14:07

أختي يوجد ترسبات طفت الى السطح وما حكاية البريكي الا القطرة التي أفاضت الكأس ...مرة أخرى حاولي أن لايتدخل زوجك والمشكل لازال في بدايته ...مهما يكون زوجك لن يرض أن تصرخي وتتجادلي أمامه مع أفراد عائلته وسيحسه انتقاصا من رجولته وسوء اختيار للزوجة التي تبدو وقحة أمامهم ...والأسوأ استدعاؤك لأبيك ...ماذا تتوقعين ؟؟لن يقف بجانبك وأكيد سيطفيء المشكل ولو على حسابك ...مرة أخرى تحملي مسؤولية الامور ولاتستدع اهلك لاجل شيء تافه كان الاجدر بك حله ...موفقة والحمد لله أن زوجك تصالح معك

اياد حياتي · 2014-10-02, 09:26

انا نعترف بلي تسرعت لكني في لحظة غضب وانو راجلي معرفش سبه علاه دارني غالطة المهم الحمد لله راني نتعلم من تجارب

oumhana · 2014-10-02, 10:03

اقتباس:

المشاركة الأصلية كتبت بواسطة الاميرة منيني

السلام عليك
باباك مجاش معاك لان فحل و راجل كي يخرجك و يديك واش من فايدة
باباك عقله رزين على راجلك و عليهم
ربي يحفظهلك
هو مين جاء معها مجاش لان شافك ظالمتها لالا هديك يقولولها الرزانة و التربية الحسنة
صوميها و متعمري راسك بيها كون جات فحلة و مأصلة كون راحت دبرت على راسها ماشي قاعدة تعس فيك

انا أقاسم هذا الرأي و لحمد لله رجعت الأمور إلى مجاريها و الخطره الجايه متتسرعيش ياك لي سكت على كلمه عفى على روح.

ilhemnanous · 2014-10-02, 12:00

يقولك الدعاء كي يكون بظلم يولي على مولاه..اذا هي دعات عليك على صحتك غادي تولي عليها هي..هي غادي تنضر فالصحة..وربي راه يشوف راه عارف كلشي..نتي دروك صلي زوج ركعات وقلي يا ربي عطيها فاش تتلاها..وهو يدبر راسه وربي يوفقك