يا زائرين قسم مشاكل الإجتماعية و حلولها.....إنتبهوا

[norhane taha]

السلام عليكم ورحمة الله تعالى و بركاته
أنا من بين ناس لي ممتنة لمنتدى الجلفة وبأخص قسم المشاكل الإجتماعية وحلولها ساعات ندخل ونلقا مشاكل ناس ونقعد نقرا لكن من كتر ضغط لي راهو في حياتي منقدرش نجاوب ونرد ونخفف على ناس نخاف نفعل ونقول شيء ميليقش ونجرح إنسان ولا إنسانة وهو محتاج لليوقف معاه حتى ولو كان ظالم ولا غالط وكي نقول ظالم ولا غالط مش معناه نأيدو في غلطو وإنما نحاول نوصول فكرة من غير ما نشتمو ولا نقلل من قيمتو وإذا كان مظلوم نخفف عليه نفكرو بربي كاين طرق وغذا مكنتش نفسيا وكان عندي موقف يشبه هذاك موقف لي راني نقرا فه وكنت أنا طرف مظلوم فيه أكيد راح ننفعل ممكن للإيجاب وممكن للسلب راهي نفس وكلنا معرضين لهادو مواقف نأجل ردي حتى نكون مليحة علاش ندخل ونجاوب بقساوة ولا ممكن غيري مراحش يقدر يفهم واش كاين من ورا ردي ونحكي تانيك على طرف لي راهو يسرد في قصتو يحاول يحكي فقط على نفسو وإذا إقتضى أمر ويكون أطراف تانية في مشكل ديالو يحاول يوصل فكرة لي متخليش ناس تحكم عليه غلطة هذا هو مقصود يراجع كل واش يكتب
والله ولينا ندخلو ننصحو بعضنا بعض حتى رجعنا نجرحو بعضنا بعض من غير قصد والله وأنا متأكدة أنو من غير قصد منظنش كاين واحد يشقا ويدخل يكتب مشكل ديالو علجال باش يشهر بإساءة الناس ليه ويحاول يظهر ويصبر نفسو لى أنو هو مظلوم باش يغطي إحساس بذنب
ياك واحد كي نلقاوه دار غلطة و ننصحناه من قبل أنو هذا طريق غلط وهو مشى فيهاو نهار يتعرض مشكل أكيد مراحش نزيدو من حسرتو راح نقولو عادي كلنا نغلطو وراهي تجربة ونهار يخرج من هذاك موقف ويكون فرحان وراح يتغر حنا نهاجموه باش يتفكر خيبة زمان وميكررهاش
ياك يقولو واحد إذا قدم ليك نصيحة قدام ناس فضحك وإذا قدمها بينك وبينو نصحك
نحاولو نجوزوا لبعضنا بعض ممكن هذاك كلام كلو لي في مشكل مهوش مقصود ونفتحو على نفسنا مشكل أحنا عن غنا عنو نردو غير بلعقل ومنتصوروش أنو كاين تشابه في مشكل ونحطو نفسنا في طرف بناءا على أنو هذاك مشكل يشبه مشكلتي لي جازت أظن فهمتو مقصودي
والله أعلم ممكن نكون غلطت في كلامي سمحولي لكن فقط حبيت نطرح وجهة نظري فقط وإن كنت غلطت قولولي ونصحح واش قلت

ربي يفرج كرب كل إنسان