|
|
|
|||||||
| قسم الحلويات قسم مخصص للحلويات و المواضيع فيه حصرية للمنتدى |
في حال وجود أي مواضيع أو ردود
مُخالفة من قبل الأعضاء، يُرجى الإبلاغ عنها فورًا باستخدام أيقونة
( تقرير عن مشاركة سيئة )، و الموجودة أسفل كل مشاركة .
| آخر المواضيع |
|
 |
|
|
أدوات الموضوع | انواع عرض الموضوع |
2014-08-16, 03:55
|
رقم المشاركة : 1 | ||||
|
البجاوية على طريقتنا
كانت أم رامي حطت موضوع البجاوية
https://www.djelfa.info/vb/showthread.php?t=1637597 ونزولا عند طلبها وطلب إحدى الأخوات نحطهالكم على طريقتي الي نكرر أني تعلمتها من عند عمتي وقبل مانبدى خلوني أخواتي نحطلها بوبليسيتي ههههههههههههه ونعطي الفرق بينها وبين أي بجاوية ذقتها قبل : ـ مافيهاش الخميرة ، ولأننا نقيموها ونقدروها بزاف هههههه نخدمولها عسل خاص . ـ كاين أنواع من البجاوية يحطو 6 بيضات وكيلو فرينة ويعجنو بالماء .. وهذا يخليها صامطة في الفم . ـ هذه كما تشوفو مافيهاش الماء وبالتالي بنينة بصح حاذرو تاكلوها في القليان لأنها تقرمش ولا تقاوم ههههههههه ـ عجينتها ممكن نستعملوها كأساس لبعض الوصفات المقلية كما الصامصة أو القريوش أو حتى السيجار لأنه كمية البيض الي فيها تعطيها حلاوة وتنتفخ في القلي . ـ ولأنها عجينتها بنينة ماتستهلكش مكسرات بزاف ـ قلت مكسرات لأنه كل واحدة واش تحب تحط ـ نقصد أنها ماشي شرط تدي كيلو كاوكاو ممكن رطل ممكن 750 غ ( يعني راهي اقتصادية ) وماتلاحظوش الفرق في الأكل . ـ لأنه العسل يبنى على الليمون فهو يعطيها نكهة حموضة لاتقاوم وبالتالي تاكلي وماتشبعيش وزيد ماترجعش على القلب . ـ كمية العسل راهي تجي قليلة قد ما تتماسك الحلوى فقط وبالتالي الي مايحبوش الحلاوة كما أنا ياكلو كما يحبو . ـ عكس كل الحلويات المعسلة هذه ممكن تحفظيها أطول مدة بلا ما تخسر المهم تكون في إناء محكم الإغلاق وبعيدة عن الرطوبة . ـ ليدام والعسل مايظهروش فيها ولا حتى يظهروا في الحاويات الورقية ولو بعد مدة طويلة من الحفظ . ـ الزيت الي نقليو بيه البجاوية طعمه ولا ريحته مايتغيروش ونقدرو نعاودو نطيبو بيه خاصة في الرخسيس مايبانش أنه مستعمل قبل . ـ قلتلكم اقتصادية ههههههه ـ وكي نزيد نتفكر مزايا اخرين نحطهم هههههههههههه والآن على بركة الله مع القادير وهي تناسب بلاطو تاع كوشة ( الكبير ) مقادير العجينة : كيلو ورطل فرينة + 15 بيضة + قرصة ملح   مقادير العسل : رطل قارص نعصره ونصفيه من اللب + كيلو وكاس سكر + 3 كيسان ماء  نجمع مقادير العجينة مع بعض ونعجن مليح حتى نتحصل على عجينة نقدرو نمرروها في آلة الرشتة ( يعني تكون يابسة باش ماتلصقس )  نقطعوها ونحلوها شوية بالحلال حتى يسهل تمريرها في الالة  نمررها في الآلة على الرقم 6 من الأحسن ونحط الأشرطة على قماش نظيف ينشفو شوية حتى كي نجي نمررهم في جهة الرشتة تنفصل الخيوط على بعضها وماتخرجش لاصقة   نمرر الأشرطة في جهة الرشتة  ونوزعهم على القماش باش مايلصقوش  لما ننهي نصف الكمية نبدا نقلي حتى ماينشفوش و بالتالي مايتقلاوش من الداخل  هنا مقلية  نكسرها شوية  تحضير العسل وهو أصعب مرحلة : قبل ما نبدا نخلط العجينة نحضر العسل نخلط عصير الليمون والسكر والماء مع بعض بارد في بارد  ونحطهم على نار هااااادئة جدا بلا مانغطي عليه أو نحركو ، يعني نحطوه على النار ونخليوه حتى يطيب لما يبدا يطيب نلاحظو أنه السطح كامل رغوة بيضاء وبالشوية يبدأ يظهر العسل كما في الصورة  رايحين نلاحظو كل مرة أنه البقعة تاع العسل تتوسع وتنقص الرغوة .نخليه حتى تختفي تماما ويبدا يشكل مقاعات ثم العسل يكون طاب أو خاص شوية نعملو تاست بالملعقة ونأخذ قطرات منه ونحطها على سطح لما تبرد نمسها بصبعي إذا مشات معه خيط راهو طايب نطفي النار ونخليه يبرد . نكون محضرة كيلو كاوكاو مقلي ومرحي  نضيفه  ونضيف العسل ونخلط مليح ثم نوزع الحلوى في بلاطو ونضغط عليها بالحلال  وللتزيين نرش حلوى فضية أو بيستاش مرحي أو كما عملت أم رامي لوز ايفيلي ونضغط حتى تلتصق بالحلوى .  نقطعها ونحطها في حاويات ورقية   تحياتي للجميع و اسمحولي ثرثرت بزاف
|
||||
|
|
2014-08-16, 04:26
|
رقم المشاركة : 2 | |||
|
يعطيك الصحة اختى تشهي |
|||
|
|
|
2014-08-16, 04:38
|
رقم المشاركة : 3 | ||||
|
اقتباس:
الله يسلمك أختي سارة ويحفظك
إن شاء الله تعجبك طريقتنا ننتظر تطبيقك ورأيك فيها تحياتي |
||||
|
|
|
2014-08-16, 08:34
|
رقم المشاركة : 4 | |||
|
تعرفي هذي الطريقة فكرتني في وحدة فاملتي مرة مدينالها تديرنا البجاوية دارتهالنا بهذي الطريقة وبنفس المقادير لكن جات قارصة لانو كمية رطل قارص بزاف على حساب ذوقي مشكورة اختي |
|||
|
|
|
2014-08-16, 08:39
|
رقم المشاركة : 5 | |||
|
تبان هائلة يعطيك الصحة |
|||
|
|
|
2014-08-16, 09:36
|
رقم المشاركة : 7 | |||
|
روووووووووووووعة يعطيك الصحة |
|||
|
|
|
2014-08-16, 11:48
|
رقم المشاركة : 9 | |||
|
اختي الحركاتية شكرا لانك ما نسيتيناش و جاوبتي اتته يعطيك ما تتمني و الله انا عندي مدة وانا نحوس على الوصفة الصحيحة والو صفات لي وجدتها ناقصة وما قنعتتيش موضوعك مفيد و شرحك كافي وافي بوركتي و هكدا يجب ان تكون طريقة طرح الوصفات لكن فقط سؤات ادا تكرمتي هت يمكن نقصو في كمية ا عصير القارس و نعوضوها بالماء هل هدا ما ياثرش عاى الوصفة ؟وشكرا مسبقا |
|||
|
|
|
2014-08-16, 13:35
|
رقم المشاركة : 11 | |||
|
يعطيك الصحة تبان هايلة اختى بصح ام رامي هي اللي عملتها ماشي ام كوثر |
|||
|
|
|
2014-08-16, 14:14
|
رقم المشاركة : 12 | ||||
|
اقتباس:
ممكن أختي نوعية القارص أو وصفة العسل ماشي كيف كيف لأنه هذه ماتجيش قارصة ، تطعمي الحموضة مع الحلاوة فقط
أو ممكن أنت أختي ماتحبيش نكهة الليمون نهائيا ... العفو حنونة وكما يقولو الاختلاف لا يفسد للود قضية ورانا هنا كلنا حتى نعرض تجاربنا ونستفادو من التدخلات وراي فوق راي كما يقولو . |
||||
|
|
|
2014-08-16, 14:19
|
رقم المشاركة : 14 | ||||
|
اقتباس:
الله يسلمك أختي moniz
كوزينتنا فعلا نحن الجزائريين غنية بالوصفات الرائعة سواء التقليدية أو الحديثة عيبنا فقط أننا مانعطيوش قيمة للطبخ على أنه فن من الفنون . |
||||
|
|
|
| الكلمات الدلالية (Tags) |
| التجانية, طريقتنا |
|
|
المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية
Powered by vBulletin .Copyright آ© 2018 vBulletin Solutions, Inc
العرض العادي
