حلوة ميثيل البقلاوة من صنعي

رانيا3 · 2014-08-02, 20:42

اليكم هاد الحلوى ... هنا كي راح ندخلها للفرن باش اطيب قسمتها و دهنتها بالبيض و رشيتها بالكاوكاو مرحي و شوية بيتاش

و هنا كي طابت و صبيت فوقها العسل

وهادي ليوم و غدوا كي قسمتها و حطيتها فلي كيسات

و دوقها هايل
ادا عجبتكم قولولي نكتبلكم المقادير تاعها

و اخيرا اقول لكم سلاااااام

اية2007 · 2014-08-02, 21:36

شكرا جزيلا اختي ممكن تحطيلنا الوصفة من فضلك.

أم إناس · 2014-08-02, 21:57

اممممممممممم روووعه اختي ممكن الوصفه

*سالي* · 2014-08-02, 22:00

هاااااااايل رانية ماشاء الله
اعطينا الطريقة من فضلك

رانيا3 · 2014-08-02, 23:18

ههههههههه علابالكم ماعداتش ساعة واحدة ملي حطيت الموضوع هدا لقيتو منقول في احد المنتديات
نفس واش كتبت و نفس الصور على بيها لازم نكتبو الاسم تاعنا في الصور لي نحطوهم غلطة وما تتعاودش ان شاء الله
حقوق النشر

لععيونكن يا احلى عضوات درك نكتبلكم الوصفة
هادي تعلمتها من الاستادة فوزية لي قراتني فن الحلويات الصيف لي فات ربي يجازيها الخير

ندى الأمل 2 · 2014-08-02, 23:37

يعطيك الصحة تبان رووووووووووووووعة
نحن باتنظار الوصفة

رانيا3 · 2014-08-02, 23:52

اليكن الوصفة و لي مافهمتش حاجة تسقسيني نجاوبها

المقادير :
125 غ زبدة )انا استعملت فلوريال )
100 غ سكر احرش
2 بيضات
1 كيس خميرة كيميائية
فرينة حسب الحاجة ( تقريبا 500غ )

مقادير الحشو
كيلو غير ربع كاوكاو محمص نص طياب ما تحمريهش بزاف ( ممكن تستعملي لوز و جوز برك ما تفوتيش كيلو غير ربع في الاجمال ) + سكر حوالي 300 غ
زهر
ملعقة فاني

للتزيين
عسل نصبوه فوق الحلوى كي اطيب + عضمة ندهن بيها الحلوى باش تحمار مالفوق

طريقة التحضير
ندوبوا الزبدة تاعنا و نخلوها تبرد و من جهة اخرى نحط البيض و السكر في صحن و نحركهم مليح مليح , تكون الزبدة تاعنا بردت نزيدوا نضيفوها للخليط ونحركوا مليح
و مبعد نزيدو الخميرة الكيميائية و الفرينة حتى تتحصلي على عجينة كيما تاع السابلي لا هي يابسة ولا طرية بزاف
نقسم العجينة الى قسمين و نحط كل قسم في صاشي و نخليوها ترتاح
نروحوا للحشو تاعنا ديريه كيما الحشو تاع البقلاوة ( كاوكاو و جوز ولوز اللمهم المجمل تاعهم يجي كيلو غير ربع ) و زيدي السكر حسب درجة لحلاوة لي تحبيها و حركي مليح تم زيدي الزهر و الفاني .
في سنيوة كيما لي شفتوها الفوق فالصور ادهنيها بالزبدة و من بعد اطرحي قسم من العجينة تاعك فهاديك السنيوة و فوقها حطي الحشو , اعدليه مليح باش يجيك مستوي واحد و زيدي غطيه بالقسم التان من العجينة تاعك
و مبعد اقسمي الى مربعات كيما فالصورة و ادهنيه مالفوق ببيضة و رشي بالكاوكاو

و دخليه للفرن يطيب حوالي 25 د كي تشوفي الجوانب بداو يحمارو طفي مالتحت و حلي مالفوق باش يدي اللون الاسمر و خرجيه وهو سخون صبيلو العسل باردة و خليه ليلة كاملة يتشرب مليح

غدوا الصباح اقسميه و حطيه فلي كيسات و قدميه لعايلتك ولا ضيوفك
راهو بريزونتابل و يحمر لوجه

بالصحة والهناء

هدا الشكل النهائي