السلام عليكم و رحمة الله و بركاته
ما شاء الله و الله يبارك و يزيد ربي يحفضها ان شاء الله و يشدلكم فيها و يقويها و يعينها على حفظ القران و يجعلها خير قدوة لأبناءها و بناتها و لينا ان شاء الله
أختي قادرة ديري كيكة عادية تقسميها في الوسط و تطليها بالنيسلي طايب يعني كراميل لأنو يعطي ذوق راءع أحسن من الكريمة انا نستعملو بزاف و كذلك يوفر عليك التعب المهم نعطيك مقادير اللي نستعملها عادة،
الكيكة:
2بيضات
فاني
8 ملاعق أكل سكر
8ملاعق أكل زيت
7ملاعق أكل حليب سائل
١خمارة كيميائية
10 ملاعق أكل فرينة اذا حبيتي تخليها بيضاء و اما ديري 8 فرينة +2 ملاعق أكل كاكاو
طبعا اذا كان عندك لوز او كاوكاو غبرة تقدري تعوضي ملعقة او زوج فرينة بيهم
تقدري تقسمي الخليط على زوج و ديري طبقة بيضة و طبقة بنية بصح في هاد الحال تنقصي الخليط الي تضيفي لو الكاكاو قبل ما ديري كل كمية الفرينة باش ما جيكش ناشفة بزاف يعني تخلطي أربعة ملاعق فرينة مع الخمارة و تضيفيهم للخليط ثم تنقصي النصف تضيفيلو الكاكاو و طيبي كل لون وحدو
المهم نضرب البيض الفاني و السكر مع بعض حتى يولي الخليط اصفر مبيض ثم نضيف بقية المقادير بالترتيب و بالوحدة و نضرب في كل مرة و بالنسبة الخمارة نخلطهامع الفرينة هادي بالنسبة للكيكة و لجميع انواع القاطو ندهن المول و من الأحسن نفرشو فيه الألمنيوم و ندهنوه باش تسهل علينا الخدمة فيما بعد
ملاحظة: من الحسن باش يجيك حجم الكيكة مليح ديري 4 بيضات و نعطيك سر باش جيك الكيكة خفيفة و تطلع مليح في خاطر الوالدة الكريمة ربي يحفظها تفصلي الصفار عن البياض تضربي الصفار مع السكر و البياض مع قرصة ملح باش يطلعلك مليح ثم تخلطيهم و تضيفي بقية المقادير بالترتيب هذا سر يجعل الكيكة هشة و خفيفة يعني جي كيما سوفلي.
المهم طيبيها ولما توجد خليها تبرد ثم قسميها في الوسط اطليها بنيسلي طايب او نيوتيلا و ضعي الجزء الثاني فوقها و أطليه بالنيسلي ثم أطلي الكل بالشوكولا السوداء باش ما جيكش حلوة بزاف او شوكولا بالحليب حسب الذوق و ديري فيها خطوط متوازية بنفس البعد بالشوكولا بيضاء او قلاصاج ابيض( ديري ملعقة او زوج حليب و ضيفيلها سكر رطب و خلطي مليح حتى تتحصلي على قلاصاج عاقد و اذا لزم ضيفي السكر غير بالشوية ) و جيبي سكين او les curdons و فوتيهم عمودي بالنسبة للخيوط المتوازية اولا من الأعلى الى الأسفل ثم من الأسفل الى الأعلى حتى تتحصلي على ديكور كيما تاع الميلفاي و زيني الجوانب بلوز ايفيلي اذا عندك او كاوكاو مدشش حسب الي عندك و ان شاء الله نكون افدتك اختي العزيزة و ربي يعينا ويعينك ويقدرنا على رضاه و رضا الوالدين ان شاء الله امين يا رب
https://www.pinterest.com/pin/303570831102987130/هادي طريقة تخدمي بيها الكيكة ساهلة مع انها تبان صعيبة جربتها مرة خرجت روعة
ما تنساينيش بدعاوي الخير.
( تقرير عن مشاركة سيئة )، و الموجودة أسفل كل مشاركة .
2014-07-18, 03:00
ساعدوني ارجوكم يا فحلات
العرض العادي
