كلام في الصميم

[نفس تواقة]

تاني.. عزيزي طالب / طالبة الثانوية العامة، "دكتور"، "مهندس"، و"صيدلي" صدقني مش أحلى ولا أعظم شىء ممكن يحصل لك في الحياة.. نصيبكم، إنكم في السن الصغير ده، تبقوا تحت ضغوط ملهاش مثيل بسبب العيلة وأحلامهم في البيت جايز، بسبب نظام التنسيق المُعاق ده جايز.. المهم، إنك تعرف.. وإنك تعرفي.. إن الثانوية العامة مش هى نهاية المطاف زى ما كانوا بيقولولك كل ساعة.. المهم، إنك تعرف.. وإنك تعرفي.. إن الثانوية سنة هاتتعب فيها وبعدين ترتاح طول حياتك.. بلح يا صديقي ويا صديقتي الكلام ده.. في كل ...البلاد المحترمة، كُل المهن تُحترم، وكل الكليات زيها زى بعض.. لأن الوظائف المختلفة بتكمِّل بعض، مش في هرم تحت بعض.. لكن في بلدنا، المنكوبة بأنظمة حُكم قاصده إن كل حاجة تبقى متخلفة فـ بتلاقي الكليات مترتبة ترتيب هايراركي كلية (س) ثم (ص) ثم (ع)! ناس كتير أوي - أوي أكتر مما تتخيل - دخلوا طب وصيدلة وفشلوا في حياتهم العملية.. وناس كتير أوي - أوي أكتر مما تتخيل - مادخلوش طب وصيدلة ونجحوا في حياتهم العملية! وللأسف كتير بيدرسوا شىء (عشان أهله كانوا عايزينه يدرسه، أو عشان مجموعه ماوداهوش في مكان أحسن من كده) وبعدين يشتغلوا في شىء تاني خالص! الخلاصة.. إن هدفك في الحياة، إنك تحاول، وتحلم.. تحاول دايماً تنجح، وتحلم دايماً تنجح.. ولما تقع أو تفشل، مهما كل اللي حواليك يوهموك إنك خلاص إنتهيت، تفضل مؤمن بنفسك - كجزء من إيمانك بربك - إنك هاتقف على رجليك، وتفضل تحاول وتحلم.. لحد ما تنجح، حتى لو مادخلتش طب وصيدلة وهندسة.. أو لو دخلتهم، وقررت تبقى متميز في شغلك، دكتور متميز.. مهندس محترف.. أستاذ قدير.. فنان مبدع.. مترجمة ماهرة.. صيدلانية متمكنة.. باحثة دؤوبة.. نجار موهوب.. سباك صنايعي.. أمينة مكتبة شاطرة.. ممرضة ملائكية.. إخصائي خدمة إجتماعية متميز..ده المهم، تنجح في اللي بتعمله، أو تفضل تحاول دايماً، إنك، تبقى متفرد