ساعدوني

[مشكلتي]

والله ماعلابالي منين نبدى بصح راني حابة تعاونوني لأني مالقيت حتى حل لروحي و مارانيش فاهمة وش بيا و علاه راني هكدا
نبدالكم حكايتي م الاول بالاك تفهموني و تعاونوني
أنا بنت كيما لبنات كامل الحدمد لله طول عمري كنت متفوقة في دراستي و الناس كامل يشهدولي بحسن التربية و الأخلاق لكن حياتي انقلبت بعد ما دخلت الجامعة بمعدل مليح و بديت مشواري في دراسة الطب ,, بدات الحياة تجبدني و اغتريت بجمالي و دراستي ,, السنوات الأولى فاتو عادي لكنني في السنة الرابعة تعرفت على زميل من ولاية أخرى كان أتى لجامعتنا بغرض التحويل "لكنه لم يتم" المهم بقينا على اتصال و بدات علاقتنا تتوطد يوم بعد يوم و خطبني بعد فترة وجيزة جدا لأنه حسينا فهداك الوقت انو كاينة حاجة قوية تجمعنا و درنا عقد شرعي
طبعا بقينا على اتصال دائم و ماتتصوروش شحال حبيت هاداك الانسان من كل قلبي و هو تاني كان يقول نفس الشيء ,, استمرت الخطبة أربع سنوات كانو أسعد أيام حياتي رغم طول المدة أنا ماتقلقتش و راعيت ضروفو لكن للأسف الشديد العائلات ماتفاهموش و ظهرت مشاكل كبيرة أجبرتنا نتفارقو ,,,,,
بكيت بزاف هداك الوقت و كنت حاسة أنو تقطعلي الهواء , كان يحاول يتصل بيا لكن مالقيناش حل و كل واحد راح في حالو ... بصح أنا بقيت نحبو و ندعي على لي فرقونا خاصة يماه حرام عليها
مرت سنة و جرحي ما اندملش و في كل لحظة نفكر فيه و مانسيتوش لا نهار لا ليل .. حتى جا ليوم لي قالي فيه راني تزوجت غير شوفي حياتك .. بصراحة ما احتملتش الموقف و قبلت بأول خاطب جاني بدو ن أدنى تفكير و تمت مراسم الزواج بسرعة البرق و لقيت روحي الان في بيت انسان مانحبوش و ماعندي حتى مشاعر نحوه
عندي أربع أشهر زواج و زوجي حاطني فوق راسو و يحبني بزاف لكن أنا العكس تماما ... كي نشوف معاه يغيضني نقول وش ذنبو يبقى معايا ماراح نقدر نمدلو والو .. تحولت لانسانة عايشة لأنها لازم تعيش و خلاص ماعندي حتى مشاعر نقدمهم ...
في رايكم الطلاق هو الحل ؟؟ و لا نبقى عايشة بقناع و نكتم كلش في قلبي ؟؟ و لا كاين حل خلاف قولولي عليه راني على حافة الجنون