قاطوات بلا طياب لعيون الأخوات

[Alae38]

احد الأخوات (ahlemahlem)طلبت الوصفة لكن ما عنديش فكرة عليها قلت نحط وصفاتي لربما نفيدكم
قاطو الطبقات ببيمو و نوات كووك:
الطبقة 1:
4 عبار ببيمو مطحون
1عبر كاوكاو مدشش رقيق
كاس حلوة الترك
2 ملاعق كاكاو
كاس تاع لآتاي صغير جلجلان مقلي و مطحون
كاس مارغريت ذايبة
ديول مقلي و مفتت باش يجئ القاطو يتقروش
و عسل للتروان
الطبقة 2:
1بول( غرفية تاع حريرة) و نص نوات كوكو
لفاني، خريط الليمون
و تكروني بالمارغرين (يمكن تخلطي مارغرين مع نيسلي خضر بصح غير شوية باش يبقى القاطو طري)
التحضير؛
تخلطي مقادير ط1 تفريش البلاستيك في صينية و تحطي نصف خليط الطبقة الاولى و تخليها تجمد في الثلاجة ثم نخرجها و نضع مقادير ط2 بعدما خاطتهم و نرجعها الثلاجة ولما تبرد و تتماسك مليح نضيف ما تبقى من ط1 و نذوب شكولا و نضيف لها ملعقة مارغرين للمعان و باش تنظف و قليل من الحليب و نفرغ ها فوق القاطو و نزين بشك لا بيضاء او كاوكاو او نخلبها عادية و نخلبها في الثلاجة و بعد ما تنشف نقطعها مربعات او معينات
هادا قاطو كليتو عند جارتنا في العيد الصغير و مين عجبني جبت الوصفة و ان شاء الله يعجبكم
قاطو تاع لحظة:
بول لحظة حليب غبرة
بول فرينة مقلية بلون بني متوسط
كاس تاع لآتاي جلجلان مقلي
3/4 ملاعق أكل سكر رطب
كاوكاو او لوز مدشش متوسط
و مارغرين للتروان
ذؤيب المارغرين و روني بيها المقادير و عركي مليح باش يتلملك القاطو ديريه في صينية و ديريلو شوكولا و رشيه بنوات كوكو او كيما تحبي ولما ينشف قطعيه كيما تحبي (كاين نفس القاطو لكن بطريقة جديدة تنقصي المارغرين و تزيدي العسل وحلوة الترك و يمكن تستغني عن السكر،انا جربتها لكن تعجبني الوصفة القديمة) تقدري تقديمه مع الشاي او العصير
قاطو تاع الديول:
1 ديول مفتت نقلوها في الفرن ما نرحيوهش رقيق باه يجئ يتقروش
1بول لوز او كاوكاو مقلي و مدشش متوسط
جلجلان حسب الذوق( كاس صغير)يكون مقلي
2 ملاعق أكل كاكاو
حلوة الترك 100 دج
كاس كبير ديري ربعه مارغرين ذايبة وتكملي بقيته بالعسل يعني ثلاثة أرباع الكأس عسل
مرون الكل جيدا ثم نشكل كريات اما نغطسهم في شوكولا او نرمدهم في كاكاو و نفوتهم في فارميسال شوكولا
و بالصحة و الراحة
انشاء الله جربوهم و ما تندموش لأنهم شابين و بنان انا نموت على القاطو بلا طياب قلت نحطهم يمكن يكونو لبنات كيفي و الصح مع السخانة والصيام ممكن الوحدة تنقص على روحها الأوقاف على الفرن و طاب و لا مازال و ينفع تاع ضياف الغفلة ما يدير الوقت بزاف
مازال عندي قاطو بلا طياب تاع السيدة أرزقي شباب بزاف لكن يدي وقت شوية في الكتابة ان شاء الله نحطولكم في اقرب الاجال راني عارفة كاين اللي رآهم يحوسو قاطو جديد للعيد لكن ما نعرفش طريقة ادخال الصور لو تفيدوني من فضلكم