الورشه الثانية و العِشْرٌون ....سطايفيه

stayfiya · 2014-06-27, 21:43

السلام عليكم و رحمة الله
كيف حالكم
هيا اليوم نديرو ريشه سامبل راهي مافيها والو
المودال عندنا
هاو ليكم

كانت الاخت فيفي آرش تحوس على الباترون
ووعدتها ندير ورشه
لقماش ميطرتين ياسر و اللون المغاير 40سم تكفيك

تطبقي لقماش نتاعك على ربعه و تحطي
قياساتك

ضك ميش كل مره نقولو
كيفاش نطبق لقماش و كيفاش نحطو
القياسات و لي تقولي انا جديده و
اول مره نشوف الموضوع نقولها اضربي
طله على الورشات السابقه واكيد لي
حابه تتعلم ماتقولش لالا
اذن
هانا كيفاش درنا
الزياده لي عملتها في وسط الصدر
خدمتها بلي كخو من بعد في لخياطه تفهميه

و الصدر كيما شفتي يتفصل وحدو انا طبقت قياساتي
و دوبليتو معناها مسجف منو فيه
فصلت ليمونش وحدهم
و بديت نلصق
الصدر خيطت من داخل و كرونتيت
باش كي نقلب لخياطه ماجيش مشرشفه

من بعد نوزن الزيادات و نسرفل مليح

نروح للطرف التحتاني اول شي باش
نتحصلو على لبلي حنا زدنا كلش وحد
12سم معناه لبلي الواحد فيه3سم
نطبق الامام على ثنين و في النقطه
لي حددناها ندير خياطه قيمة 13سم

و نطبق لبلي بالطريقه هاذي و نعاود
نخيط من فوق و هاذا شكل لبلي كخو

وهكذا يبان لبلي من برا

خلصنا
ضك نجمل الصدر مع لبدن
اكيد نكونو حددنا النقاط نتاوعنا لي نبداو
نلصقو فيهم ممكن تزيدي او تنقصي
يفسدلك الموديل
و نروحو نلصقو المونش و نديرو نقشات

هكذا يجيوك من برا

و كي تركبيهم اجملي الروبه نتاعك
على الجيهتين نوليو للي مونش و هنا انا ركبت لاستيك في
حواف المونش (خليت واحد سم)
باش يجيوني بومبي

خلصنا نروحو للديكور انا ماحبيتش ندير
الدواير لي في الموديل الاصلي
شريت فراشات
هاو ليكم

و حطيتهم برك ما تلصقيش
و من بعد كل وحده وزعت ليزيستراس وراها
و لصقتهم بالحديد يعني حطيتهم
و فرشت عليهم طرف قماش و حددت لصقو

و من بعد ركبت الفراشات خاطر كون تركبيهم
من قبل راح يتحرقو و يذوبو
و خلصنا هاو الشكل النهائي

وااش فيفي جبتها ولا نون ؟؟!
ان شاء الله تفهمو يا رب دعواتكم
اختكم السطايفيه
سلاام