القصيدة الشعبية المشهورة : يا الميلود

[tarek22]

يــا الميلود

مول المال يبان عالي مرفود يا الميلود
و اللي بغاها يجيبها و بالزيادة
مول المال ما ليه حاجز ولا سدود يا الميلود
منين يفوت يصيب الطريق مسقدة
مول المال والو مريض ويعود يا الميلود
ويجوه الزيار بالفرق كي متقاودة
مول المال عند شي ناس معبود يا الميلود
بالكذب والزور معاه متساندة
مول المال كتافه قاويين كي البنود يا الميلود
يسلك كل حاجة اللي متعقدة
و اللي بلاشي في بلاده و مفقود يا الميلود
محبة الناس من جيهته كلها راي محيدة
و اللي سعده مسود وعليه محقود يا الميلود
يا ما على ميمونه ديما راقدة
وقليل الزهر كلي مالجناح معقود يا الميلود
وين يروح هو والله ما دا
و المزلوط فالجماعة ماشي معدود يا الميلود
كلمته تجي سامطة كاللي معاودة
و العاشق إدا ما عشقش مغدود يا الميلود
الحب فالقلب ماشي ولف ولا مادة
و اللي مديون ياك يمشي وملبود يا الميلود
يتختل بين الطرقان اللي متهاردة
ليتيم بامه وبوه مبرود يا الميلود
دمعة عالخدود ديما مهودة
خير ولا شر عنده لحدود يا الميلود
شوف اللي مكتوبة و اللي مجردة
حوتة فالبحر و تجيب ألف مزيود يالميلود
تحت الما وعيشتها راي مقيدة
الشرف سلسلة مالجدود يا الميلود
و الحكمة ورث من دا لدا
خلقوا لقصايد مالجود ياالميلود
و خيام البخل ما سقموا مايدة
شوف الرقبة فلهول و بارود يا الميلود
و الجايح ديما نارو باردة
و الخيل البراح على العنود يا الميلود
و الرتيلة مع الطلقة ماهيشي نايضة
و الصح متين كي الخيط المجبود يا الميلود
و الكذب راشي كاللي عليه طاح الندى
و كاين اللي صايق الليل غير بعمود يا الملود
وخصيص العقل إدا هدر هدرتو زايدة
و المرى الساجية على حبيبها ميجود يا الميلود
و الجايحة تبع غير فالمادة
هادي وصايتي و العلم ممدود يا الميلود
و نشا الله منا تدي الفايدة

الشيخ مصطفى بن براهيم (وهران)