زوجي يريد طردي

[مشكلتي]

السلام عليكم و رحمة الله ,,,راني في حيرة كبيرة و مالقيتش ليمن نشكي ارجو أن يتسع صدركم لقراءة مشكلتي
أنا متزوجة منذ حوالي شهرين,, الحمد لله أنا انسانة مثقفة و متدينة و خاطيني المشاكل بكل أنواعها حتى اني غالبا ما نسبل في حقي تفاديا للصراعات و لعل هذه هي مشكلتي ,,, أنا ساكنة مع أهل زوجي في بيت واحد و الأمور بيني و بينهم على ما يرام الحمد لله مشكلتي أنهم جد متعلقون بابنهم صدقوني لا أبالغ لو قلت أنهم يتحكمون في كل صغيرة و كبيرة في حياته و حياتي أنا أيضا ... كلش هوما لي ينضموه واش نطيب واش يلبس زوجي واش نهدرو داخلين فيه ايضا ,, حتى غرفتي مستباحة دخولا و خروجا صدقوني مارانيش على راحتي إطلاقا ,,, مارانيش حاسة نفسي زوجة لذلك الرجل ,, لا اطالب بمسكن مستقل أردت فقط مساحة خاصة من حياته أكون أنا الملكة فيها ... أليس هذا حقا مشروعا لكل زوجة ؟؟؟
اليوم صباحا حاولت أن أخبره بهدوء أنني في حاجة لأن أحس أنني زوجته و لو في أبسط التفاصيل كأن أختار له ملابسه ( و الله صدقوني أحلامي بسيطة جدا) أتدرون ماذا فعل ؟؟؟؟؟ ثار ثورة كبيرة و قل لي بالحرف ( انتي وصلتي عائلتي ,, ماعجبكش الحال روحي لداركم ما نحتاجكش هنا ) كي حاولت نفهمو بلي ما قصدتش وش فهم ضربني و قالي ضرك السي ملابسك و اخرجي من داري هذا كامل و أهلو يسمعو لولا تدخلهم كان خرجني ,,,
أنا في حال لا يعلمها إلا الله ,,, وش الجريمة لي درتها ؟؟اذا راني غالطة قولولي واذا راني صحيحة فهموني كيفاه نتصرف معاه ؟؟كرامتي مجروحة منو مارانيش حاملة روحي و حاسة روحي وحيدة دون سند لأنه ثار لأهله على حسابي ماحاولش حتى يطمني و لا يقول معليش راهي جديدة في البيت نأخذ بخاطرها حتى بكلمة خاصة أنني ماتطاولتش على أهله اطلاقا و هوما شاهدين بذلك ,,, فقط عبرتله على أمر حاسة بيه ,,,وهو لي نطقني قعد يسأل فيا وش بيك مقلقة قوليلي و ماتخافي من والو... و في النهاية اراد طردي من بيته
بالاك راني غالطة جل من لا يسهو ,, وريولي الصح راني متقبلة جميع الاراء ماتبخلوش عليا راني في أمس الحاجة

[anissa90]

السلام عليكم اختي عندك شهرين زواج برك دربك ا حب اخرجك لازم تخبري والي امرك وحكلوا بلي ضربك بدون سبب ليضع له حد نصحتي قربي رجلك ليك غير بشوية راهو عندكم غير شهرين ميقدرش يتبدل بين يوم وليلة اكسبي العائلة تعوا الله يهديه ولكن متسكتيش خبري اهلك ا حلها بهدوء

[dalal 28]

ربي يكون معاك وانا ننصحك بالصبر ثم الصبر ثم الصبر كل دار فيها المشاكل خاصة العام الاول

[سلمى انا]

زوجك باين فيه مايحبكش وحاب يطردك بسبب او بدونه
ولله يا اختي الغلطة تاعكوم من البداية
تتسرعون بقبول العريس والمهم عندكن الزواج ولو بالعيش مع اهلو وماتفكروش في المستقبل وبعدين تصطدمن بالمشاكل الاسرية او تشتغلن شغالات عند اخوات الزوج

ثانيا الزوج لي يحب يطرد زوجتو ويهينها امام اهلو فهو ليس برجل
وانت زوجة جديدة 2 شهرين فكيف ستعيشين مع الانسان لسنوات اخرى ؟

حبيت نقلك كلام اخر ومبعد بطلت
لكان قادرة تصبري اصبري لانك لو ستتطلقين الان بعد شهرين زواج ستاكلك الالسن والشائعات وسيتهمونك حتى في شرفك ويقولو زوجها طردها لانه وجدها !!!!!
مجتمعنا المتخلف وتعرفيه

[وهج الحياة]

لست مخطئة ارى ان تذهبي حالا لاهلك حتى تنظمي افكارك لا سيما انك عروس جديدة هذا كخطوة اولى لان الامر وصل للضرب واذا تعود مد يده لك الامر يتعقد مستقبلا ،،الخطوة الثانية انت اخطات بمفاتحته صباحا لكن الخطا الاكبر كان لزاما عليك وضع حدود منذ البداية كيف يمكن لهم الدخول للغرفة الوحيدة التي تتشاركاني فيها هذا خطؤك يا اختي تقولين انك مثقفة اسمحيلي اختي اين الثقافة وعلمك لازم تطبقيها في حياتك النظام وكل شيئ لازم يكون واضح الحدود بينك وينهم ،،،ولا زم تتعلمي شيئ قيمة المرء مبادؤه التي هي حدود لا يتعداه احد
واذا كنت خايفة من كلام الناس عروس جديدة ومن عرف ماش رايحة تعيشي ابدا روحي لداركم معززة مكرمة نظمي افكارك شوفي وين غلطتي وين غلط وش لازم يديرلك با ترجعيلوا ومن دون خوف ،،
وديري كيما قال الاخوة ما تخبيش على داركم والوا حتى يحس بلي وراك رجالة ،ربي يوفقك

[Abdelkrim Ameur]

هذا ماشي راجل ... حب يبين لأهله أنه رغم الزواج المرأة انتاعو ما اثرتش عليه لأنه عموما اي واحد مقيل على الزواج عنده الفكرة انتاع تأثير الزوجة على الزوج

[وهج الحياة]

المشاركة الأصلية كتبت بواسطة سلمى انا

زوجك باين فيه مايحبكش وحاب يطردك بسبب او بدونه
ولله يا اختي الغلطة تاعكوم من البداية
تتسرعون بقبول العريس والمهم عندكن الزواج ولو بالعيش مع اهلو وماتفكروش في المستقبل وبعدين تصطدمن بالمشاكل الاسرية او تشتغلن شغالات عند اخوات الزوج

ثانيا الزوج لي يحب يطرد زوجتو ويهينها امام اهلو فهو ليس برجل
وانت زوجة جديدة 2 شهرين فكيف ستعيشين مع الانسان لسنوات اخرى ؟

حبيت نقلك كلام اخر ومبعد بطلت
لكان قادرة تصبري اصبري لانك لو ستتطلقين الان بعد شهرين زواج ستاكلك الالسن والشائعات وسيتهمونك حتى في شرفك ويقولو زوجها طردها لانه وجدها !!!!!
مجتمعنا المتخلف وتعرفيه

ا ربي كاين يا اختي وليشوف للمجتمع المتخلف ما يعيشش ومادام وصلت لليضرب تكون وحدة غبية اذا مازالت قاعدة عند اهلو واذاا حابه تستمر فيهذا الزواج لازم تحط الحدود وتتدارك الخطا،،،،اتمنى ما تكونش عفسة مع اهلوا باه يتخلص منها ،،ربي يهدي ما خلق

[- بصمة خير -]

هذه هي مشاكل سنة أولى زواج
**************
كرامتك هي ان تبقي في بيتك مع زوجك و ليس بالذهاب عند اهلك و الضرب له حل
*************
الراجل اكيد يفضل اهله عليك لان الزوجة
موجودة و الاهل لا يعوضون
لهذا لا تضعي نفسك في موضع مقارنة مع اهله
يحب اهله بطريقة و انت يحبك بطريقة أخرى، لا تضعي نفسك في موضع مقارنة لانه لو قلتي له اختار بيني و بين اهلي راح يختار اهله
و أكيد المرأة مش رايحة تسمح لزوجها يُسَاومُها على اهلها

*************
انت ركزي و شوفي ميلح واش اهله لا يتدخلون فيه و ابداي من هذه النقطة
ركزي مليح و ماتقوليش ماكنش

************
و على الغرفة لازم لازم لازم تحطي حد للعائلة حتى واحد يدخلها الا اذا طرق الباب
هذه خصوصيتك و باش تقدري ترضي زوجك و تمتعينه و تتمتعي
حتى لما تكوني في الغرفة معاه اقفلي الباب بالمفتاح
كوني شجاعة و لا تخافي من المشاكل لانك على حق
*****************
أعرف ان هذا القسم من أجل حفظ الخصوصية و عدم معرفة اسم العضو و لكن
لدي كلام أكثر لا يمكنني كتابته هنا اذا اردت الكلام معي ارسلي رسالة خاصة

سلامي

[محب بلاده]

بعدما قرأت المشكلة الردود الكل اصبح موافقا لما قالت


اخوتي كيف تحكموا من قول احدا
هل كنتم معه؟؟؟؟

هل حضرتم المشكلة؟
هل صدقتم بدون معرفة ولا حضور؟
كيف بربكم؟

حضرتني هنا قصة القاضي اذا اتاه شخصا وعينه مفتوقة ( يعني اصبح اعورا)
واظن الكل يعرفها


انصحكم وانصح نفسي معكم اما ان نقول كلمة طيبة نطيب بها الخاطر ولا تكون على طرف اخر

[بنت لبحر]

ربي يكون في عونك اختي هدا ما نقدر نقولك

[آمنة ..]

لست مخطئة اختي ولكن لو صبرت قليلا وكسبت زوجك بحسن المعاملة وربما هذه معاملة اهله له من قبل الزواج صعب ان تتغير بين يوم
وليلة وكنت تأخدين هذه المهام بالتأني منهم الله يصلح ذات بينكم ويجعل زوجك قرة عينك ونصيحة حاولي ان تنسي كل شيء ولا تفكري كثيرا في الامر وكانه شيء لم يكن انت مازلتِ عروس عيشي حياتك غاليتي وان كنت مجبرة فاستمتعي ولا تدعي شيء ينغص عليكِ فرحتك كل شيء وله حل باذن الله ..وفقك الله

[first first]

اختي الغالية...قد يكون زوجك قد اخطا بعدم تفهمك وتمادى بالتفكبر بطردك.......................لكنه اول خطا.............واول سوء تفاهم........................لاتهدم البيوت من اول خطا....................عليك بالصبر.....فالبصبر دامت كل البيوت.
غيراني انصحك ان تعترضي على امر ضربك........................وادا كان زوجك من النوع العصبي....فتفادي استفزازه.

اما الحدود فانت من تضعينها.........انت الاعلم كيف؟
لانملك الا ان نقول لك .هوني عليك...واصبري...فان لم تشعري انك ملكة في بيت زوجك......فاني اقسم لك انك لن تكوني ملكة بطلاقك....................ففكري بدكاء.....وانصحك ان لا تكترثي لكل من تقول لك ..كون جيت انا مانقبلش..وووو.............اختي كل واحد وشخصيتو كل واحد وحياتو وكل واحد واش يخرج عليه.

[سرور2]

يا اختي ربي يعينك اما بالنسبة للغرفة فلازم تضعي حد لهذا لاني على تجربة ويجب ان تخبريهم بان يدقو الباب قبل الدخول وانا هذا عيب حتى ولو انبوك لا تردي عليهم واخبريهم هذا بطريقة ما يعني ان تحكي لهم قصةعن امرءة دخل عليها طفل اواخ الزوج او اي احد ووجدها في موقف غير جيد فماذا تفعل اذا فهمو فهمو واذا مفهموش اخرجيلهم فيها وخلاص

اما بالنسبة لضرب فلا تسامحي عليه ويجب ان يعرف احد من اهلك عن هذا فوالله الرجل اذا ضرب المرءة وسكتت سوف يتعود على ضربها وهذا عن تجربة سامحي في كل شئ الا الضرب اياك ثم اياكان ان تفوتي هذه المشكلة سوف تندمين عليها انا لي ابنة خال ولانها سكتت اول مرة ضربها والله يرسلها لبية اهلها زرقاء اومكسورة رجل اخر مرة ضربها منذ شهرين جسدها كله ازرق ولكن هذه المرة اخوتها علموه درس لن ينساه والان له شهرين لم يلمسها وعنما يريد ضربها يتضكر فلقة اخوتها له يعني لازم يكون ليك سند لكي يعرف قيمتك ان كان هو او اهله

اسفة ان اطلت عليك لكن انا شخصيا لا اقبل بالضرب بتاتا

[douane hadjer]

المشاركة الأصلية كتبت بواسطة محب بلاده

بعدما قرأت المشكلة الردود الكل اصبح موافقا لما قالت


اخوتي كيف تحكموا من قول احدا
هل كنتم معه؟؟؟؟

هل حضرتم المشكلة؟
هل صدقتم بدون معرفة ولا حضور؟
كيف بربكم؟

حضرتني هنا قصة القاضي اذا اتاه شخصا وعينه مفتوقة ( يعني اصبح اعورا)
واظن الكل يعرفها


انصحكم وانصح نفسي معكم اما ان نقول كلمة طيبة نطيب بها الخاطر ولا تكون على طرف اخر

انا معك مئة بالمئة يسلم هذا الفم اخي والله عيب عليهم معلابالهمش واش كاين بداو يلعبو براس المرا



انا من رايي تشوف واش كاين بالاك مقلق والزواج هدا هو فيه فيه مشاكل شوي صبر ولازم عليك تصلي وتدعي ربي اسهلك حبيبتي نوضو الفجر في وقتو وصلي ركعتين دايما زيادة وادعي فيهم ربي اسهللكم

[اماني نجاح]

للاسف هناك اسر كثيرة تعاني من هذا الشىء حبيبتي
واش نقلك وكلي امرك لله وحده واذا هو تقلق من مجرد هذا الشيء فكيف اذا انجبت منه وكثرة المشاكل
في هذ الحال وكزوجك من بيت مغلق التفكير محدود الهوية يجب ان تستدعي اهلك واهله لعقد جلسة صلح لان الكبار عندهم اساليب للاقناع
كل الحب لك
نسال الله يخفف عليك وتاكدي ولعل فيه خير