تليتلي من مطبخي

[sandy belle]

السلام عليكم يا لحراير
نتمنى تكونوا بخير
جمعة مباركة
هذا التليتلي طيبتو اليوم
نتمنى يعجبكم
راهو جا هااااااااااااااااااايل
نبدأ باسم الله مع الوصفة
المقادير :
1كلغ تليتلي اي حجم تحبيه رقيق متوسط خشين
2 بصلة
6 قطع لحم فخودة وصدور
توابل فلفل اسود تابل وكروية راس حنوت فلفل أحمر (ملعقة صغيرة ونصف من كل نوع )
5 ملاعق كبيرة زيت
4 سنين ثوم
2 ملعقة كبيرة طماطم معلبة
1 مكعب جمبو دجاج
ملعقة ونصف ملح
زبدة
كاس حمص منقوع
قرن فلفل اخضر حار
3لتر ماء مغلي
الطريقة
نقطع البصل ونهرس الثوم ونحطهم في قدر مع الزيت والحمص والتوابل ونخليهم يتقلو شوية
نضيف قطع اللحم ولاتوابل ونقليهم شوية
كيما نشوف البرمة بدات نشف نضيف كاس ماء مغلي ونخليهم يتقلاو حتان تزيد تنشف شوية ونزيدلها كاس ونص تانيين ونخليهم يغليو لمدة 10 دقايق ثم نحل الطماطم المعلبة في شوية ماء باردين ونضيفها للقدر
وبعدها نمرق البرمة ( يعني نصب ماء مغلي على اللحم حتان يتغطى) ونغطي البرمة ونخليهم يغو مليح
في قصعة نحط التليتلي ونضيفلو ملعقتين زيت ونخلط مليح مبعد فنجان ماء ساخن+ نصف ملعقة صغيرة ملح ونحرك مليح ثم نحطهم في كسكاس ونحطهم فوق المرقة يتفورو لمدة 15 دقيقة
ثم ننزلهم في القصة ونفكهم بملعقة خشبية ولا بيدي اذا كنت تستحملي الحرارة
ونحطلهم ملعقة كبيرة زبدة ونحركها ثم نضيف 4 ملاعق من الزيت اللي يطفو على المرقة ( يعطيه لون احمر باهي وذوق بنين) ثم نخلط ونرجعهم للكسكاس يفورو مرة ثانية لمدة 15 دقيقة
بعدها نشوف المرقة الا نقصت نزيدلها ماء مغلي ونحط قرن الفلف الحار ومكعب الجمب ونخليها تغلي شوية
وننزع اللحم والحمص ونصفي المرقة من البصل والثوم
ثم نحط التليتلي- بعد مانزلتو من الكسكاس وفكيتو بيدي مليح - في المرقة ونخليه يطيب مليح والا ذوقتو ولقيتوه يابس زيدو ماء مغلي
وبالصحة والراحة