موضوع شبابي شامل للنقاش

[samir.sami]

السلام عليكم ، أحببت أن أطرح اليوم موضوع واقعي عن الشباب منه الظاهر ومنه الباطن بأسلوب مفهوم.وغير مفهوم لأنه كثرت الهموم والحق أصبح مكتوم والمسؤول والاداري مسموم .

نحن اليوم في عصر التكنولوجيا ، واختفاء علم الجيولوجيا ، مما سبب في ارتفاع سعر العدس واللوبياء.

الشباب اليوم راهو ضائع ، رغم انه للوالدين طائع ،والحرام اصبح شائع ، واكثر المهن أصبحت مجرد مهنة بائع حتى اصبح البائع يشتري من عند البائع.

قالو طوروا الفلاحة حتى أصبح الفلاح البسيط يطلب وسط الساحة ، والفلاح اللي مولاتو الدولة يعشق في المشحاحة.

قالو الملاحة ، فأصبحنا نأكل السردين المجمد وليس الطبيعي،واصبح البحر لايصلح لا للصيادة ولا للسباحة.

بالله عليكم.اليكم الأسئلة وجاوب بالصراحة:

علما أنك راك شوماج والاسئلة كامل ديرلك شونطاج


كي تخرج في الصباح وما عمبالكش وين رايح، ويسألك واحد ويقولك وين رايح

وش راك تخدم، كاش جديد. اوه راك لباس عليك ،وكلما تختفي لفترة تعاد نفس الأسئلة وانت في نفس الحالة

تحوس على صاحبك باش يونسك يا ما يربونديش عليك ، يا يبريزيك علما أن الدنيا دوارة لانه انت كنت خدام وما خليتوش لكن هو العكس.

تروح تكنيكتي يا الكوكسيون مكاش يا ما عندكش كامل الانترنت ويا الكارثة الكبرى اصبحت لا تملئ لك الفراغ الكامل. زيادة عن هذا راك تستنى في الرد على حوالي 250 طلب عمل.ومتخرج من الجامعة والمتزعبلات والمتقلشات
تجوز ترتق في الطالون راي راحة العشية ، المدير قالي مش مشكل كاين الحُل.
هكذاك تزيد تتلاقى مع كاش واحد وش مازال ما راكش خدام، قريب تتزوج ولا مازال ،نتاجك كامل تزوجو انت ما تقدرش خلاص قلبك معمر تقولو كيما كاين ناس تزوجو وناس يجروا وراء المدامات سراويلهم مشمخين ومش فايقين مع كل احتراماتي لكم الواقع يقال.
لا مرافق الترفيه ولا اماكن تفاجي فيها،وين تروح هنا اأتي فكرة الهجرة السرية (الحرقة) رغم انك انت كنت تقول انا ضد الحرقة لكن شوف كيفاش تولي دافع على الحرقة.

تدخل الى الموقع في الأنترنت تشوف الطرق اللي تساعدك من عنابة او من مغنية ، على البر او على البحر.

علاش راك رايح تحرق؟

الميزيرية في بلادي،يقولولك علاش تما كاين العز
أنت وش تقول الميزيرية هنا الميزرية تماك،الحقره هنا العنصرية تماك ،لكن الفرق هنا وين نقعد كي نكون مش خدام
تم كاين بلا ما نحكي، ويبقى قدر الله هو الحاكم والزهر بين مكان ومكان يلعب دوره.

أنت أيها الشاب اللي راك في هذه الحالة راه قادم يوم في شهر يدعى شهر الكذب. اكمل على طريقة أصلي جزائري وموطني ليس كذلك لست هنا لأحرض.

نخليكم زاهيين ان شاءالله واذا ما عجبكمش الموضوع قولولي والله نحبكم واذا عجبكم نزيد نحبكم أكثر يا أعضاء المنتدى.


[