طبـــــــــــق بالفرماج والبطاطا و اللحم المرحي

[ام سراج وملاك]

هاذي هيا اول مرة ليا في قسم الطبخ و المؤكولات نتمنى انشاء الله اني نكون عند حسن ظن الجميع واي سؤال عندكم مفهمتوهش من ناحية هذا الطبق متتردوش نخليكم مع المقادير
المقادير هي كالتالي نصف رطل لحم مرحي مقلي مع نصف راس بصل وشوي ملح ماشي بزاف وشوي زيت وقليل من فلفل اسود كي تقلى اللحم نحطو بجهة
من جهة اخرى نكونو حظرنا مرق ابيض نصف راس بصل + قليل فلفل اسود + شوي ملح ماشي بزاف + زوج كيسان ماء كي يغلي الماء نتاع لصوص زيدي لوحي فيها اللحم المرحي لي قليتيه من قبل وخليها تطيب مليح زيدي لوحي فيها 6 حبات فرماج نتي واش حبيتي اذاردتي زيدي الفرماج يجي بنين قتلكم متكثروش الملح في لصوص و اللحم خطراه الفرماج مالح خلي لصوص نتاعكم تعقاد مع الفرماج تولي سائلة
من جهة تكوني قليتي حوالي 4حبات بطاطا كبار دوائر ملحيهم بالطبع
نحضر صينية فرن ندير فيها الطبقة الاولى 4 حبات بيض نين مع شوي ملح ومعدنوس الملح يكون قليل كيما نتاع البيض المقلي
مبعد فوق البيض النئ ديري دوائر البطاطا المقلية غطي الصينية نتاعك اكل بالبطاطا زيدي ديري لصوص العاقدةنتاع الفرماج واللحم المرحي زيدي غطيه بطبقة نتاع بطاطا مقلية ومن فوق زيدي 4 حبات بيض نيء مع شوي معدنوس وشوي ملح ماشي بزاف ودخليهم الى الفرن
ملاحظة : هذا الطبق بنين بزاف لازم تتحكمي في كمية الملح باش ميجيكش مالح ويمكن ايضا استبدال الدجاج بدلا من اللحم المرحي ديري قطع دجاج لي حبيتهم في لصوص بيضاء كي تخثار لصوص ويطيب الدجاج فتيه وزيدي الفرماج وخليه يعقاد فوق النار كي يطيب ديري نفس الخطوات السابقة