شكون تعرف الوصفة تاع المقزر magzar

[mimaselma]

شكون تعرف الوصفة تاع المقزر تحطهالنا و مادابيكم بالشرح تاع العجينة و لاصوص
هو طبق تقليدي كانت طيبو ممى يعمي جدتي
كانت تهيي عجين كيتاع لمسمن و تكورو و تفتح كل كويرة رقيقة و تحطها طيب في طنجرة فيها لاصوص و منبعد تقطها بالمغرف و تزيد كويرة واحدة اخرى و هكذا حتى طيبهم كامل
هذا واش شفيت كنت صغيرة هو يجي حار
انا منعرفش واش فيها لاصوص شفيت برك بلي حمرا و حارة و الذوق تاع المقزر رهيب و هو معروف في القباءل لي تعرف الوصفة تحطهالنا

[Napia]

انا منعرفش

[نيفرتيتي.]

طيباتو في قناة سميرة

[nina32]

يممممممممممممممممممممممم هايلة حنا نسموها ثاركما صح بنينة بزاف جداتي الله يرحمها كانت ديرها وختي تاني ديرها انا ما نعرفش وان شاء الله كي نحبط في العطلة نقوللها ديرها ونعطيك الوصفة باذن الله

[nawel zed]

ما عرفتهاش انشاء الله يفيدوك البنات

[لميس حواء]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[oum anas 69]

هذيك أكلة قبائلية أسمها قطع و أرمي أمي تعلمتها في العاصمة بحكم إحتكاكها بالقبائليين كانو جيرانا في العاصمة عجينتها كيما عجينة المحاجب أو المسمن نكوروها كريات صغيرة و نحطوها ترتاح و نوجدو مرقة حمراء تجي حارة شوية يعملو فيها فول يابس و عدس قليل فقط و كي تطيب هذيك المرقة نفتحو كريات بالوحدة نفتحها جيدا كاين لي يرميها هكذاك في المرق و هو على النار و هكذا حتى نكمل الكريات أو كيما تعمل أمي كي تفتح الكرية تقطع شرائط طويلة و تلوحهم في المرق بالوحدة بعد ما تكسلهم شوية في يدها و هكذا ثم تخليهم يطيبو حتى يعقد المرق و ترش الكسبر الأخضر في الأخير ممممممم و تقدمهالنا في قصعة الطين يا عيني كنت نموت عليها
حتى و تزوجت بقيت نديرها لزوجي ممممممممممممممممم

[zamilio]

السلام عليكم يا اختى ثمقزارث هى اكلة قبائلية هايلة انا تعلمتها من يما وجداتى العجينة كم المسمن ونخليها ترتاحوالمرقة احنا نديروها ب
حبة بصل نرابيها شوية شحمة يابسة وشوية زيت ملح فلفل اسود حبة طماطم حبة وشوية فقط تاع الباطة وفول الصغير اليابس نشمخوه ونديره وملح وفلفلة حمرا حارة
نقلى الكل ونمرق وبعدما تطيب لاصوص
نجبد حبة ونحلهاونديرها فى هديك لاصوص رايحة تتنفح نرفدوها بيدنا لطبسى وندرلها زيت الزيتون وللى متنفخش نديروها للداخل اممممممم راكى فكرتينى فيها

[sabrina+imen]

طريقتي
توجدي صوص حمراء تحطي مغ زيت ومغ طماطم علب وطماطم مسكرفجة وتوم وفلفل اسود وملح وطرف قديد تكوني نحيتيلو الملح
مرقي وخليها تغلي
تكوني محضرة المسمن تحليهم جوزات صغار تحلي المسمن وترميه في المرق وهو بالخف يطيب تحبي تنحي الحبات او تهبطيهم للقاع او تحطيهم في الجنب القدر باش تقدري تحطي المسمنة التانية حتى تكملي الكمية ولا شفتي كيجمية المسم كبيرة تقدري تنحي العجين الطايب في طبسي
كي تطيب ديري شوية زيت يتون من فوق
حنا نطيبوه بزاف في البرد وكي يكون واحد مريض

[thawizat]

سلام أختي ، أكلة قبايلية رائعة تصلح في البرد كاين ليسميها ثيمgزرت أو ثركيمث وفي بومرداس على حد علمي يقللها ثيركما
درلها صوص حمراء ماشي مليح وحارة ، بالبصل مقطع رقيق و ثوم و حبة بطاطا ، كاين ليزيد الفول اليابس كما قالوا الأخوات حنا منزيدوش، كي تتقلى زيدي ماء ساخن و خليها ، كي تغلي المرقة بداي تديري الحبات عجينة مسمن دري الحبات صغار بش تفتحيها رقيقة و دري حبة حبة و في كل مرة حركي باش ما تجيكش خشينة ، هكذا حتى تكملي كل الحبات و تشوفي المرقة عقدت ، زيدي كأس صغير حليب و كي يغلي طفي عليها و قدميها سخونة وحارة و في قصعة فخار مع ملاعق من زيت الزيتون طبعا تزيد البنة و كلي مع العائلة، رائعة نموت عليها و بالصحة و الهنا