طريقة تحضير الرُبْ من مطبخي

[ام نسمة]

السلام عليكم انا كل فصل شتاء اقوم بتحضير الرُبْ لنتناوله مع القهوة تاع الصباح وتاع العشية وانا قمت بتحضيره امس واليوم فصورت الطريقة للمبتدئات حتى يتعرفن على طريقة صنعه في البيت
انا استعملت مقدار 3كغ تمر يابس او مايعرف في منطقتي بتمر الحميرة




نغسلها مليح ونقطرها ثم نضعها في قدر كبيرة ونملؤها بالماء ونضعها على نار قوية حتى تغلي ثم نقصو النار ونخلوها تطيب مدة 6 الى 7 ساعات كي نحبو نشوفو اذا جهز او لا نحكمو علفة تاع التمرة وعظيها بسنانك كان تفتت بسهولة تامة راها جاهزة كان لقيتيها قاسحة معنتها زيدي مدة الطهو هكا





لازم ترجع هكا العلفة




ثم نجيبو قطعة قماش شاش نظيفة او فينة لعملية العصر وهي اصعب مرحلة لانو لازم تعصري التمر سخون مش بارد قاع يعني خلي غير حرارة القدر تنخفض شوية وابدي تعصري





ملاحظة كان ماعندكش الجهد قولي لزوجك او ولدك او خوك يغسل يديه مليح ويجي هو يقوم بعملية العصر كان مكانش حطي الرزمة في كسكاس واضغطي عليها بحاجة ثقيلة باش تنزل السوائل اللي فيها







انا عصرت بكمية قليلة مع هذا تحرقت من يدي وتورمت من شدة العصر او بالاحرى ههههههه لانو يدي طرية بزاف مافيهاش قوة كبيرة فتورمت بعد اللي كملت



بعد العصر تحصلين على عصير تمر خفيف اي غير مركز





فما عليكي الا ان تضعي الخليط اللي تحصلتي عليه فوق النار يغلي دون غطاء حتى يتقلص السائل ويعقد ويرجع ثقيل وباش تعرفي انو رجع ثقيل وجهز اغطسي مغرف وخرجيها كان لقيتيه لصق فيها كما طبقة تاع عسل يعني جهز كان لا معنتها زيدي طبخيه هكا راه جهز







بعدها خليه يبرد وعمريه في اناء وحطي فيه قطع زبدة وغلقي وحطيه في الثلاجة كل يوم سخني غير الكمية اللي راح تحتاجيها انا عادة نحطو غير فوق المدفأة يسخن بينما نحضر القهوة وبنته هايلة وزيد فايدته كبيرة بزاف للصحة




و3كغ هذا واش قطعتلي منو





اتمنى ان تجربوه فهو فعلا رائع بذوقه وفوائده الصحية
وهادي اخر صورة كي جهز بدا الثلج يطيح فقالي زوجي اووووووووو جا في وقتو ههههههههههه



تحيات زهور الفل