تعبانة

[مشكلتي]

السلام عليكم و رحمة الله و بركاته

ترددت كثيرآآ قبل أن أطرح مشكلتي لأني أراها نفسية و تمنيت لو استطعت الاتصال بمختص نفسي ليساعدني لكني لم اتمكن، لذلك من فضلكم لأتنصحوني بالذهاب إلى مختص نفسي ،

مشكلتي تتلخص في كوني انسانة حساسة و مع الوقت أصبحت حساسة جدآآ و للاسف اصبحت هذه الحساسية مرضية،
لاني قرأت انو اذا اصبحت شخصية الانسان تسبب مشاكل له و لمن حوله فهنا تصبح مرضية ،
وهذا بالظبط ما يحدث معي و مادفعني للبحث عن حلول هو انني اصطدم مع والداي و اخوتي بسببها و اصبحت متعبة لهم و لي

حاولت البحث و التأكد فوجدت فعلا اني اعاني من حساسية شديدة و كل الصفات التي قرأتها تنطبق علي،
و من ضمنها انني لآ أتحمل النقد حتى لوكان بناء،
تضايقني التعليقات البسيطه المتعلقه بشخصيتي بشده و كثييرآآ لدرجة اني اغضب و مرات نبكي،
يتقلب مزاجي بسرعه ،
صحيح انو لي بعض الصفات الايجابية مثلا نحس كثييرا بالآخرين و نساعد المحتاجين و نحن عليهم و طيبة معاهم لكن دائما يحاسبوني على تلك النقاط السلبية يقولولي تزعفي بزااف و ماتقبليش كلامنا ودايمن مشنفة

وما يجعلني حزينة و مستاءة من هذه الحالة اصطدامي مع أمي لما تنتقدني نزعف مرات تفوتهالي مرات هي تزعف مني و تقولي انا امك كيفاش تزعفي من امك ،
انا اعلم انها ماتحبلي غير الخير و اعلم انها بنقدها تود ان تعلمني و ماتحبش تشوفني نغلط لكن ماقدرتش والله ماقدرت ،
يعني و انا زعفانة من نقدها في قلبي نستغفر مما افعل ،
و نحس بلي عققتها و نظلي حزنانة و يائسة من حالتي هاذي


و اكثر ما اتعبني هو البكاء، و اكثر منو عدم الاحساس بي او فهمي،
نتأثر كثييير بكل شيء ، اذا شفت واحد مريض نبكي، معوق نبكي، فقير ، يتيم .... نبكي و مانقدرش نمسك نفسي،
اذا احد جرحني من صديقاتي او اخوتي او حتى امي او ابي نبكي ومرات تطول عليا نبقا اسبوع و انا حزينة من ذلك الموقف،
إذا حشمني واحد نبكي،
والمشكل اني حتى و انا ندافع عن حقي منقدرش تظهر نبرة البكاء من صوتي ،
ولا نقدر نوااجه دايمن اتهرب لان البكاء يغلبني

ولما نبكي أختبأ حتى لا يراني احد،ومرات اجد صعوبة باش نلقا مكان ابقى فيه وحدي،
حتى اتفادى اسألتهم ، + يسخرون مني لبكائي كون في عمري 20 سنة و على ابواب ال 21 يقولولي خاوتي نتي في عمرك عامين ، ماما تقلي نتي معقدة نتي طفلة صغيرة محبيتيش تكبري مافهمتش علاه ماقدرتش تفهمني ولا تحس بيا،

للعلم انو عندي اخي الاصغر مني مباشرة هو ايضا حساس لكنو ما يبكيش و رغم ذلك تحس بيه و دايمن تحذرنا عند الحديث معه تقولنا اخوكم حساس بزاف ماتجرحوهش ردوا بالكم لكلامكم حتى هي ترد بالها كيفاشتهدر معاه تحاول دايمن تخلي معنوياتو مرتفعة و تهتم بيه و تبالغ في الاهتمام بيه،
و انا والله نحس بالاهمال حتى لما نجي نحكيلها واش صرا في النهار لما نرجع من الجامعة لا تعير كلامي اي اهمية حتى اختي الاكبرى اللي اكثر منها فاصبحت اتفادى الكلام ما نحكيش و تعقدت فعلا ولا عندي خوف من ردة فعل الناس تجاه كلامي حتى اصبحت لما اتكلم صوتي منخفض جداا و اخجل اكثر من اللآزم
لماذا لا تتعامل معي انا بنفس الطريقة؟ انا اعلم انها ماتفرقش بيناتنا و لا تقصد ذلك لكن سهل انها تعرف اني حساسة خاصة و اني بنتها وهي قالتلي بنفسها انك اكثر واحدة تحسي بيا و تحني عليا،
لكن علاه هي ماقدرتش تحس بيا؟ و الله مايؤلمني انها لما تلقاني نبكي تبدا تقولي انتي تافهة و ماتكبريش او جايحة .. و ماقدرتش تعرف بلي انا حساسة

والله الامر مش بيدي حاولت اكثر من مرة نمسك دموعي ماقدرتش ،
و بسبب هذا شحال من مرة لما شيء يزعجني نسكت و ننسحب بالشوية و نروح وحدي و نبكي ،
يبداو يقولو عليا كي العادة معقدة و .... الخ

بالنسبة للبكاء ملي كنت صغيرة و انا هاكا ،
اما بالنسبة للامور الاخرى كاني لا اتقبل النقد فهذا تطور اكثر و اكثر من معاملتهم لي


انا فقدت الامل من انهم يحسوا بيا و يفهموني،
مسألة البكاء مفروغ منها ماقدرتش و عمري ما نقدر نغيرها لانها داخلة فيا ،
ما اريد تغييره هو معاملتي لامي خااصة و اخوتي لا اريد ان اكون سبب في عقوقها او كرهها لي و لا ان اتسبب في ان يكرهني اخوتي و يتحاشاو الحديث معي


ربما نسيت كثيير من التفاصيل لكن هذا ما يحضرني

ما الحل؟
ربما تبدو مشكلتي هينة للبعض لكنها اتعبتني كثيرآآ
واللي بانتلو تافهة او جايحة و رايح ينعتني بنفس القاب امي فمن فضلوا لا داعي يزيد عليا

ربي يجازيكم الجنة ان شاء الله عاونوني
سامحوني على الاطالة و شكرا لكم