قصيدة في مدح أولاد نايل ......وباللهجة النايلية

nacerd09 · 2009-06-01, 15:05

هذه قصيدة في مدح أولاد نايل أرجو أن تنال إعجاب زوار المنتدى و في نفس الوقت أتمنى أن تكون بداية لجمع التراث الشعري لمنطقتنا.

قصيدة أولاد نايل:

قرب يا من جيت قاصد مرسمنا هذا بر أولاد نايل يرحب بيـــك
من ذ السـاعة راك كي واحد منا يا ما ازين ذ الدار راها عمرت بيك
إذا كانك عــــاجباتك جملتنا رانا في مقام اهلك و امــــاليك
بيت كبيرة يالي مــــا تعرفنا سقسي عنا و شوف واش يجــيك
رانا كرما و الضـــيافة سيمتنا ما تقلى حاجة وما تتعز علـــيك
و الرجلة و النيف من طبيعتنــا والنية و الخير واد و فاض علــيك
نزيدك ، طبع الحيا من عادتــنا و هاذي بعض اوصاف لابد نوريك
و ارجع للي فات واعرف ماضينا أما الحاضر راه ما يخفاش عليــك
يـــا حسراه على عبيدات الجنة صفات أبيانا راها ترضــــيـك
أرحمهم ربي و ارضيـــهم عنا و بجاه الرسول- ص- محمد نبـيك
من ذ الوقت الي تبدل سلكنـــا ضاقت بينا يا الله و الشكوى ليـك
نهدي هـــاذ القول للي سامعنا و تقولوا مسعود راه يسال عليــك
طـــالب منكم ما تخلي جلستنا و اسمع ليا يا الخو شاهي نوصـيك
الدنيا بابــــــور يتلاطم بينا لازم يوم تطيح و الموجة تديــك
جاي نهــارك قا توجد و استنى و هز معاك الزاد و ادي ما يكفيـك

توضيح لبعض المفردات الواردة في القصيدة:

جملتنا : جماعتنا
بر: في اللهجة المحلية عادة ما يستعمل لفظ بر للإشارة الى منطقة معينة فالمقصود ببر أولاد نايل المنطقة التي تنتشر بها قبائل أولاد نايل.
أبيانا : آباءنا
قا : يعادل كلمة غير و المعروف أن اللهجة المحلية في المنطقة الممتدة من بوسعادة الى الجلفة تتميز عن باقي اللهجات المحلية بنطق الغين قافا .

chouan · 2009-06-01, 19:47

بورك فيك ...مجهود يستحق التنويه ...تحياتي ...

nacerd09 · 2009-06-01, 22:29

شكرا على مرورك