سلطان صينية القسنطينيين

[رقية شهد]

السلام عليكم و رحمة الله تعالى و بركاته
يمكن تتساءلن ما هو سلطان صينية اهل قسنطينة
لن اطيل عليكن اليكموه


في مدينتي لا تخلو اي صينية منه في العيد و التي لم تنجح في صنعه لا تعتبر نفسها نجحت في اي شيء
ارتايت اليوم ان اضع لكم طريقة صنع المقرود القسنطيني للاخوات اللاتي اكلنه من قبل و يردن الوصفة و لعيون ام هنيدة التي طلبت مني الوصفة صباحا
هذا واين كملت و جربت كمية صغيرة و اترككن مع الصور و الطريقة
المقادير
3كيلات دقيق(سميد)كاين لي تنحي الدقاق(السميد الرقيق جدا)و كاين لي تنحي الحبة الخشينة ,انا ناخذو كيما راه نغربلو فقط (اختار السميد من النوع الجيد)
كيلة سمن ذايب و بارد+نصف كيلة (نص سمن و نص زيت)
ملح
ماء زهر(انا نستعمل المقطر في البيت ريحتو رائعة)
كيلة ماء

نبسسو السميد مليح بالسمن

و هذا شكلو بعد التبساس (ما تخافيش اذا لقيتيه مبسس بزاف ) اذا كان الدقيق يشرب ليدام راح يكون مليح

نملح العجينة و نرشها بشوية ماء زهر و نكمل نبل بالكيلة تاع الماء
ما نحطش الماء دفعة واحدة بالشوية ونخلط حتى نحصل على عجينة ما هي يابسة ماهي جارية بزاف

و هاذي هي العجينة


على حسب نوع الدقيق يمكن تستعملي كيلة الماء كاملة وممكن لا
اذا كان الدقيق ما يشربش ليدام راه تشوفي بلي العجينة جارية قبل ما تحطيلها الماء و كي تحطي الماء تزيد تجرى
ما تخافيش اضيفي الفرينة (او الدقاق ) حتى تتحصلي على عجينى طرية
غطي العجينة و حطيها ترتاح (كل ما ترتاح اطول مدة كل ما تكون مليحة للعمل
ملاحظة: انا نعجن العجينة باه الحبة تاع الدقيق ما تكونش حرشة و ما يكونش المقرود حرش و كاين لي تحب المقرود مدشش(حرش)اذن ما تعجنش بزاف تلم العجينة برك
الحشو
تمر منقي و مرحي (حنا نقلولو الغرس)
جلجلانية محمصة
قرفة و قرنفل مرحيين
ماء زهر

ينقىالتمر و يرحى و نداويوه بالقرفة و القرنفل و الجلجلانية مرحية او حب (مرحية افضل للنكهة) و نبلو بناء زهر ما لازمش يكون الحشو يابس و لا جاري بزاف باش يمشي وسط الحربوش مثل الصورة

كيما نخلصوا ناخذ قليل من السمن و ندهن بيه الغرس باش يبقى طري

ناخذ العجينة اللي كانت ارتاحت
تلقايها يبست (خاصة في الشتاء) ما تزيديش الماء دخليها في بعضها و خذي جزء مثل الصورة

اعملي حفرة باصابعك و ضعي حربوش من الغرس و لمي عليه العجينة

ابرمي الحربوش تاعك ما يكون خشين و لا رقيق اذا كان طويل اقسميه على اثنين

اطبعي بالطابع واعدلي الحراف بيه(لا تضغطي كثيرا باه ما يكونش المقرود رقيق بزاف)

قصي المقرودات و زيدي اعدلي مرة اخرى بالطابع و حطي في صينية الفرن

حطي العجينة الزائدة على الحراف باش ما يتحرقوش

طيبيه بلون ذهبي ما تخليهش يحمار حتى ما يبسش
اخيرا انتهيت و اسفة على الاطالة و الشرح الممل
انا هنا لكل استفساراتكم
لا تنسوا التقييم (5نجوم)
كما ارجو من المشرفات التثبيت لتستفيد الاغلبية
دمتن