تفضلوا طبق رئيسى القاضي وجماعتو

rajaa mstafa · 2013-07-24, 15:10

هاد الماكلة سمعتها في إذاعة تلمسان ان شاء الله تعجبكم تجي بنيينة وحطة للعرضات

المرحلة الأولى :كرفجي البصلة ودريها تتقلى مع اللحم الدجاج مين يتقلى مليح مليح،ظيفي طماطم مكرفجة + +زعفران +وتخليهم في الطمنجرة يتقلي قد الوقت لي يساعدك المهم يتقلى غاية اللحم ومبعد مرقي بالماء غي على حساب ميطيب متكثريش وبلعي الكوكوط لمدة 30د على نار هادئة.

المرحلة الثانية ،وفي ذاك الوقت لي تكون توجد فيه مرقة الدجاج انتِ جيبي الكفتة وديري فيها حبة بصلة مكرفجة +ثوم+معندوس كمون +فلفل اسود + شوية قرفة وشوية ملح ،وديريها كويرات صغار مين تطيب المرقة نحي الدجاج وارمي الكفتة فديك المرقة حتى تحسيها طابت ح ل20 د ولازم تكون المرقة خاثرة.

المرحلة الثالثة:الدجاج لي وخرتيه مرمديه في الفرينة وقليه

المرحلة الرابعة، حطي القاضي-الدجاج- وجماعته –الكفتة- والمرقي الخاثرة طبعا

هاد الماكلة تجي تهبل ،اللحم يجي كأنه مشوي المهم متكثريش الملح

هده أول مشاااركة لي أرجو منكم التشجيع ،دمتم في حفظ الرحمن

صورته ومعرفتش نحط صورة في المشاركة