الوصفه لي طلبتوها تارتلات بالفواكه من عندي بالتفصيل

ريمه · 2013-07-19, 23:25

السلام عليكم
نزولا عند رغبة بعض العضوات حبيت نحطلكم الوصفه لي نتبعها لتحضير التارتلات بالفواكه و كريم باتسيار
اولا العجينه
انا نستعمل لابال 75 غرام وتكون بارده هذا السر الاول
الفرينه نستعمل 150 غرام وتكون مغربله مع 50 غرام سكر رطب وقرصه ملح ونخلط الكل
ومن بعد نزيد صفار بيضه و نجمعها مليح بدون عجن و نشكل كريات و نخليها بصاشي ونحطهم في الكونجيلاتور

نجيبو مول تاوعنا والا مول كبير ندهنوهم مليح
بالنسبه للمول انا نستعمل مول لي فيه القعر من تحت كيما الصور حتى يسهل عليه المهمه

نجيبو العجينه ونفرشوها فوق من الصاشي و نورقوها ونحطوها في المول ونثقب بالفرشيطه
وحتى نضمن العجينه ماتنتفخش هذا سر ثالث وقت الطياب نخلي صاشيات صغار من فوك المول و نحطو باقوليات عليها تخلوها بشكل خاص لهذا الاستعمال ونخلي المول في الكونجيلاتر شوي ونشغل الفرن
من بعد نحطو المولات في الفرن غير شوي ونخرجوهم نوخرو الصاشيات ونرجعهم نخليهم يطيبو مليح في درجة 200

نوجدولاكرام باتسيار في هذاك الوقت ونخليها تبرد
الكيفيه
نغلي نصف لتر حليب
نضرب بيضتين و نزيدلها 150 غرام سكر ثم 70 غرام فرينه ونضيف شويه من حليب مغلي ثم نرجع الكل مع الحليب الباقي على النار ونخليها تثقال ونضيف الزاست لي حبيت ليمون او برتقال انا ضفتهم الاثنين
خرجوهم و عمروهم وزوقوهم كيما تحبو وتقدرو ديرو جلي من فوك باش يلمع انا ماكانش عندي
والصور هنا بالموضوع
https://www.djelfa.info/vb/showthread.php?t=1365336
وشهيه طيبه

نور الهدى06 · 2013-07-20, 00:18

من فضلك قوليلي علاه تتكسر راهي مبسة ياسر قهرتني

om kheiyrour · 2013-07-20, 00:36

بارك الله فيك
رائع ربي يعطيك ما تتمناي على هاد الوصفات
يسلمو يديك يا شاطرة

ريمه · 2013-07-20, 01:04

اقتباس:

المشاركة الأصلية كتبت بواسطة minouch23

من فضلك قوليلي علاه تتكسر راهي مبسة ياسر قهرتني

وعلاش جربتيها
شوفي حنونه هي مبسه مي لازم تخليها في الكونجيلاتور اول حاجه
واقعدي تخرجي بلكريه وديريها في وسط الصاشي وتورقي
كي تحبي ديريها في المول رفديها بالصاشي قلبي وحطيها في المول
ونصيحه كل ما تجي مبسسه كل ما تجي بنينه عن تجربه ما تكثريش الفرينه
منورين

ريمه · 2013-07-20, 01:06

نسيت حاجه ماتورقيهاش بزاف يعني خليلها شويه ايبيسور ولا تتكسر

نور الهدى06 · 2013-07-20, 01:55

شكرا حنونة مي راهي تتكسر بعد منحيها من المول مع اني نخليها تبرد خاصة تاع القارص من لفوق مورانغ حتى وليت ندير لا بات تاع السكر
نصائحك رائعة ربي يعطيك متتمناي

ريمه · 2013-07-20, 11:39

اقتباس:

المشاركة الأصلية كتبت بواسطة minouch23

شكرا حنونة مي راهي تتكسر بعد منحيها من المول مع اني نخليها تبرد خاصة تاع القارص من لفوق مورانغ حتى وليت ندير لا بات تاع السكر
نصائحك رائعة ربي يعطيك متتمناي

حبيبتي كي تستعملي الزبده بارده ماشي كيما تستعمليها وهي رامولي ما تعطيش نفس النتيجه حتى في الميزان
استعملي زبده بارده واتبعي نفس الوصفه وبالنسبه لصفار البيض مرات يكون بزاف ما تحطيهش كاع ديري غير قيس ما تلتم لعجينه
واذا راح تتكسر من تنحيها لازم الايبيسور في المول يكون كبير تاع العجينه واذا استمر نفس الشي انا عليه نقولك نقصي لوكان مغرفه زيده كي تديريها بالقارص و بالمورانغ