لافراحكم ومناسباتكم السعيدة مقروظ رويال بالخطوات حصريا من مطبخي

[ام اماني77]

السلام عليكم اخواتي
مقروظ رويال وصفة جديدة و هو عبارة عن مقروظ اللوز في حلة جديدة يجي محشي بالبيستاش ملائم للاعراس والمناسبات السعيدة ادام الله الافراح في كل البيوت.

المقادير:

3كيلات لوز مرحي رقيق
نصف كيلة سكر احرش
زاست ليمون نكثرو منه لان هو لي يعطيه البنة ونستعمل الليمون الاصفر لان الاخضر اذا كثرنا منه يعطينا ذوق مر
فاني
بيض وصفار بيض

الحشو:
3كيلات بيستاش مرحي
كيلة ناقصة شوية سكر احرش
فاني
ماء الزهر

لتحضير السيرو نحتاج الى:

3كيلات ماء
كيلة سكر احرش
عصير ليمونة

نحتاج ايضا الى

سكر رطب
عجينة اللوز الاصطناعية
ملون اخضر ووردي

الطريقة:

اولا نحضر مقادير اللوز

https://

نخلط اللوز والسكر والفاني وبشر الليمون ونجمع بالبيض نستعمل بيضة كاملة مع صفار بيضة حتى نتحصل على عجينة متماسكة نعجنها قليلا باليد حتى يذوب السكر نغطيها ونخليها ترتاح في الثلاجة عالاقل 3 ساعات

https://

من جهة نحضر مقادير الحشو

https://

نخلط المقادير السابقة ونضيف تدريجيا ماء الزهر مالازمش نكثر قيس مايتلم الحشو كيما نعملو في حشو التشاراك

نرش طاولة العمل بشوية نشاء ونشكل حربوش من عجينة اللوز لي حضرنا وحربوش اقل سمك من حشو البيساش

https://

نفتح حربوش اللوز ونحط داخله حربوش البيستاش

https://

ونعاود نغلقه

https://



نقطعه مقروظات

https://

نحطه في بلاطو فوق ورق الطهي ونثقب كل حبة في المنتصف

https://

ندخله للفرن على150درجة لازم يبقى لونه ابيض
بعد الطهي نخرجه من الفرن ونخليه يبرد تماما
في هذا الوقت نحضر السيرو بخلط السكر والماء نحطهم فوق النار على درجة متوسطة لمدة 15د نضيف عصير ليمونة
بعد مايبرد السيرو نحط الحلوى داخله ونحطها تقطر
ناخذ كيس نحط فيه السكر الرطب بعد مانكون غربلناه ونحط فيه الحلوى

https://

نغلق الكيس ونحرك نحط حبات الحلوى فوق مشبك حتى تجف
بعدها نعاود نحطها في السكر الرطب وهذا المرة نستعمل اليد ونضغط حتى السكر يتثبت فوقها وبواسطة الاداة لي استعملتها في ثقب الحلوى من فوق نعاود ننزع السكر الموجود داخل الثقب
لتزيين الحلوى نحتاج الى عجينة اللوز الاصطناعية جزء نلونه بالاخضر وجزء بالوردي وراح نحتاج الى طابع السليكون على شكل وردة وطابع الورقة

https://

نشكل اوراق بالعجينة الخضراء ونثبتها فوق الحلوى بشكل مائل
نحط كمية من عجينة اللوز الوردية داخل مول السليكون

https://

نثبتها في الثقب لي عملناه فوق الحلوى
نحط الحلوى داخل حاويات ورقية ونزينها بالملمع الفضي وهذا شكلها النهائي

https://

https://


عن قرب

https://


https://


نتمنى تعجبكم الحلوى ولا تنسوني غالياتي من صالح دعائكن
في امان الله

[ادرارية]

يسعدني ان اكون اول وحدة ترد تبارك الله عليك كل حلوياتك متقونة ومقاديرها مضبوطة

[حياتي نبع امل]

الله يبارك ربي يحفظك

[dalila2010]

انا جد سعيدة لاني الاولى ارد عليك شكرا لك جاك علامة انتاع حطات وهذيك الحبة المقروض نستاهلها انا.
وهذه الحلوة تستاهل ان تثبيث روعة 4444444444444444

[dalila2010]

هاه عندبالي انا الاولى دوها القافزات

[nawelz]

يعطيك الصحة وصفاتك دايما رائعة فوق اللازم ربي يحفضك و شكراعلى كل المجهودات المبدولة من طرفك

[leilaz]

الله يبارك مبدعة واحلى تقييم لاحلى ام اماني

[بنت عين وسارة]

روووووووووووووووووووووووووووووووعة

[المستغفرة]

هايل. يعطيك الصحة ام اماني
دائما تبهرينا بخرجاتك
رزقكي الله الفردوس و المسلمين و
رمضان كريم و كل عام وانت بخير
ربي يتقبل الصيام و القيام

[rimane mery]

واش كامل هاد الابداع والله روعه تسلم الايادي ربي يخليك لينا ام اماني

[melissat]

وااااااااااااو ماشاء الله بسم الله تبارك الرحمن كل نوع من يدك احلى من الثاني ربي ينورك ويفرحك اختي
راني سالتك هذ الاسئلة في صفحة قلوب الجلحلان والشكولاطة وماجاوبتينيش ربي يعيشك ردي عليا..
الشكولاطة اللي ستعملتيها ذوبتيها في حمام ماري ومن بعد ما نزعتها من النار ضفتيلها الحليب او ظفتيه من قبل معاها في رحبة في حمام ماري
والشكولاطة البيضا هل هي ثاني في حمام ماري وياريت تعطيلنا اسمها لانه بالسيف ويلا صلحت معانا
الكوكاو مرحي رقيق يعني بودرة او متوسط كيما تع البحلاوة ولا كيفاش
والجلجلانية مرحية ولا حب
وحبيت نسقسيك من فضلك اللوز المستعمل في المشكلة مرحي هو ثاني بودرة او متوسط ولا خشين برك بغيت نفهم مليح بش نجرب
وحبة الجوز في المشكلة كيفاش لصقتيها
راني عارفة طولت عليك وهذا مش موضوعك بصح انت كريمة ربي يخليلك اماني ويحفظها
واجمل تقييم ليك

[أم سيرين3]

وعليكم السلام ورحمة الله وبركاته
جزاك الله خيرا،ليس غريب عليك هذا الفن والإبداع وما زاد وصفاتك جمالا هذا الإتقان الرائع ،لك مني بالغ التقدير والإحترام .

[oum anas 69]

لاتعليييييييق سوى كلمة روعة ماشاءالله ... ربي يحفظلك كل غالي و عزيز عليك
أم كوثر أم رامي أين أنتما لتثبتن موضوع أم أماني رائع كروعة أم أماني

[طهراوي ياسين]

يعطيك الصحة وصفاتك دايما رائعة

[ام اماني77]

المشاركة الأصلية كتبت بواسطة melissat

وااااااااااااو ماشاء الله بسم الله تبارك الرحمن كل نوع من يدك احلى من الثاني ربي ينورك ويفرحك اختي
راني سالتك هذ الاسئلة في صفحة قلوب الجلحلان والشكولاطة وماجاوبتينيش ربي يعيشك ردي عليا..
الشكولاطة اللي ستعملتيها ذوبتيها في حمام ماري ومن بعد ما نزعتها من النار ضفتيلها الحليب او ظفتيه من قبل معاها في رحبة في حمام ماري
والشكولاطة البيضا هل هي ثاني في حمام ماري وياريت تعطيلنا اسمها لانه بالسيف ويلا صلحت معانا
الكوكاو مرحي رقيق يعني بودرة او متوسط كيما تع البحلاوة ولا كيفاش
والجلجلانية مرحية ولا حب
وحبيت نسقسيك من فضلك اللوز المستعمل في المشكلة مرحي هو ثاني بودرة او متوسط ولا خشين برك بغيت نفهم مليح بش نجرب
وحبة الجوز في المشكلة كيفاش لصقتيها
راني عارفة طولت عليك وهذا مش موضوعك بصح انت كريمة ربي يخليلك اماني ويحفظها
واجمل تقييم ليك

اهلا غاليتي
اولا سعدت بمرورك نورتي الموضوع
ثانيا نقولك اسمحلي ماشفتش سؤالك لان بزاف الردود وانا كنت غايبة
راح نجاوبك بالتدريج حسب الاسئلة
الشكولة قطعيها قطع كبيرة حطيها في صحن وزيدي القليل فقط من الحليب وحطيها على حمام مائي مرة على مرة حركي والنار تكومن متوسطة كي تذوب اذا شفتيها عاقدة بزااااف زيدي غير شوية حليب.
اما الشكولة البيضا اعمليها على حمام مائي من دون اضافات وعلى نار ناقصة بلا ماتحركيها حتى تذوب
ماعنديش اسم معين كي نروح نشري نقولو اعطيني نتاع الخارج تجي قريصات كبار كاين لي تجي بيضا وكاين لي تجي باج
الكاوكاو في انواع الصابلي اعمليه رقيق لان لكان يكون خشين الحبة تتكسر
والجلجلانية خليتها حب لان اذا ترحيها بزاف تعطي ذوق مر
بالنسبة للمشكلة اللوز يجي رقيق والجوز لصقتو ببياض البيض اهم حاجة في المشكلة لازم تخليها بيضا من الاسفل والاعلى كي تطيب باه تجي طرية وحذاري يكون الحشو جاري لازم يكوون متماسك كيما وضحت
اي سؤال انا في الخدمة