صديقتي بحاجة ماسة الى مساعدتكم

[عذراء الصحراء]

السلام عليكم اخواني اخواتي
عندي صديقة حابتكم تساعدوها في مشكل
هي عندها 29 سنة تقريبا
تحب انسان اكثر منها بعام وهو تانيك يبغيها من 2011 كان خدام ولاباس بيه ووعدها كي يجد روحه يخطبها ومن بعد 9 اشهر خرج من الخدمة وجاء واحد نهار هدر معها نورمال في الهاتف ومنبعد ساعة ابعث ليها ميساج قالها بلي انت بنت زينة وتستاهلي كل خير ومن الافضل انك تنسايني من دون اي سبب وغلق بوطابله حوالي شهرين ومن بعد كان يرسل ليها ميساج يسول على اخبارها ومن بعد عام بالضبط رجع ليها وماقدرش يستغنى عليها بصح هداك الوقت كانوا جيينها خطابين ومن كثرة حبها ليه بطلت ودروك يجوها وتوافق المرة الاولى ومن بعد ترجع في كلمتها لانها مازالت تبغيه بزاف بزاف وماقدرتش تنساه وكلما فتحت معه موضوع الخطوبة يقولها اللي ماعنده خدمة مايتزوج اذا بغيتيني استنيني وان شاء الله تفرج والمشكلة قالت ليه دير غير كلمة مع اصحاب الدار مارني باغيا والو ماقبلش لانه خايف مايقدر يسعدها وقالك لازم
الاصول والعادات
ودروك جاءها واحد خارج ولايتها وحاب يجيب ناسه قبل رمضان بصح هي خايفه انها ماتقدرش تنسى حبها وماتسعد هدا الانسان وخايفة تصبح في خيانة انها تعيش مع انسان وتبغي انسان اخر
الله يخليكم ساعدوها اعطوها حل ؟؟؟؟؟؟؟؟؟؟؟؟

[نورسين.داية]

السلام عليكم

من جهة هذا الذي تقول أنها أحبته مند 2011 ركزي في السنة ....معه حق من جانب العمل ....لأن الزواج له مصاريف بطبيعة الحال

أما من جهتها هي ....فإنسان قالك أنسيني ..........ماذا تبحثين معه .......................

أنا نعرفو راجل تناع الصح ....مامنعه من خطبتها على الأقل .......صدقيني الراجل إذا لم يظهر مسؤوليته و رجولته في هذه النقطة بالذات .......حتى تصبح على الأقل العلاقة بينكما ترضي جميع الأطراف ....................
صدقيني هذا النوع .....................أرمي عليك .........................الزواج له عدة معطيات أولها قوة إلتزام و الشخصية السليمة ...و يخليك تقولي ........و الله راجل ونص ....و نعتمد عليه ......لأنه رجل نتاع كلمة .......................ماش يبقى يدي و رد فيك ....فهمتي حنونتي ........................

و صدقيني أنتي الخاسر الوحيد .....................إستخيري في من خطبك ................................و توكلي على الله عز وجل

وفقكي الله أختي

[آلاء فهد محمد]

نورسين.داية

كفيتي ووفيتي اختي

[knives.55]

والله غير تحيروا اذ جاكم واحد في حلال ترفضوه واذ جاء فلحرام تحبوا

ربي يسهل هي حرة في حياتها

[oulfa]

أنا نصيحة مديعيش عمرك على جالو الأن نتي تفلة و هو رجل كي حب بدل رئي تاعو وحد مايحاسبو و حد همو توكلي على ربي هو لي خرجك لتريق صواب ربي فرج عليك

[* الحلم سكر *]

المشاركة الأصلية كتبت بواسطة عذراء الصحراء

السلام عليكم اخواني اخواتي
عندي صديقة حابتكم تساعدوها في مشكل
هي عندها 29 سنة تقريبا
تحب انسان اكثر منها بعام وهو تانيك يبغيها من 2011 كان خدام ولاباس بيه ووعدها كي يجد روحه يخطبها ومن بعد 9 اشهر خرج من الخدمة وجاء واحد نهار هدر معها نورمال في الهاتف ومنبعد ساعة ابعث ليها ميساج قالها بلي انت بنت زينة وتستاهلي كل خير ومن الافضل انك تنسايني من دون اي سبب وغلق بوطابله حوالي شهرين ومن بعد كان يرسل ليها ميساج يسول على اخبارها ومن بعد عام بالضبط رجع ليها وماقدرش يستغنى عليها بصح هداك الوقت كانوا جيينها خطابين ومن كثرة حبها ليه بطلت ودروك يجوها وتوافق المرة الاولى ومن بعد ترجع في كلمتها لانها مازالت تبغيه بزاف بزاف وماقدرتش تنساه وكلما فتحت معه موضوع الخطوبة يقولها اللي ماعنده خدمة مايتزوج اذا بغيتيني استنيني وان شاء الله تفرج والمشكلة قالت ليه دير غير كلمة مع اصحاب الدار مارني باغيا والو ماقبلش لانه خايف مايقدر يسعدها وقالك لازم
الاصول والعادات
ودروك جاءها واحد خارج ولايتها وحاب يجيب ناسه قبل رمضان بصح هي خايفه انها ماتقدرش تنسى حبها وماتسعد هدا الانسان وخايفة تصبح في خيانة انها تعيش مع انسان وتبغي انسان اخر
الله يخليكم ساعدوها اعطوها حل ؟؟؟؟؟؟؟؟؟؟؟؟

بكل صراحة هدا ماشي يحبها هذا حب امــتــلاك ... كان خــدام علاه ما تقـدمش ليـــها ؟؟ يــوجد روحو علاه لازمو عمر كامل الناس تــدير خطوة و منبعد يوجدو رواحهم لاثنين على قد الحال
حـــكايــة انـــسايني انتي زينة و انا ما نعـــرف واش قــديـــمة و ما نــؤمنــش بيـــها لي يحـبك يتــمسك بيــك اذا قلك ربي يســـهل قــوليــلو ان شــاء الله و بــالـسلامة
ما يقــدرش يســتغــني عليــها يثـبت
هي عملت احسن حاجة كي قالت نديرو كلمة برك و هو احسن حل هو رفض خــلاص ربي يسهل عليه
خايف ما يقدرش يســعدها عــلاه رابــطها مــعاه
الأصول و التقاليد .. و الله كلنا نعرفوها يدخل البيوت من ابوابها هاذي الاصول

انا رايي تخـــيــروا و تقـلو راهي في ضغط اما يدير كلمة و هي تاني تخفف عليه الشروط و تكون ليه قدام ربي و عبادو ... اما تسال مليح على الخاطب الثاني و تعيش حياتها
و اللي عملها مرة و قالك انسايني بلا سبة قادر يعاودها بعدما تخسري عمرك عليه

انا هذا رايي مليحة واحد يـحب و يسـعى للي يحـبو و مليحة تاني يتــحب و يسـعى ليـه اللي يحــبو

ربي معاك

[wafa16]

لازم تتاكدي مليح من مشاعرك و تحاولي تنسايه
ما تخدعش الخاطب ديالها و ما تتمسخرش بيه ايه امبعد لالا
هدا ماشي لعب دراري
ولازم كي تتزوج تكون مشاعرها خالصة لزوجها ما تخدعش زوجها من ناحية المشاعر

[sali-sali]

السلام عليكم
اختي الحب يجي بعد الزواج و العشرة

و كما جاءفي الحديث : قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره.

اختي قلها اخطيك من علاقة غير شرعية و لي يحب يحوس عليك في الحلال
وربي يهنيك

[achwak crazy girl]

لازم تتاكد قبل من مشاعرها ماشي تلعب بيه تديه اومبعد يرميها ملقة ولكن هيا راهي 29 سنة كون تبقى تستناااه كون تبووور معليش تتزوج وتنساه نورمال

[مريم الصابرة]

السلام عليكم
ولا واحد حكى على الشاب خليكم من باب الحرام والحلال
السيد ما عندوش فقير زوالي تخيلو رواحكم يا شباب ما عندك والو وحاب تتزوج والله غالب ما عندكش والزمن ما يرحمش اللي ما عندوش ما قدر يفرط فيها وما قدر يتزوج بيها لأنو عارف أول ما يدير خطوة لدارهم يتربط بمسوؤلية وخطبة ومهر وزواج يا ناس أعذروه شوية
شوفي اختي هي كان تحبو وتقبل بلاخر تلعب بيه ومن بعد ترميه لالا حرام عليها كان تحب لاخر وما راهيش قارة تزوج تستناه لأانو حاجة من زوج ما تلعبش بزوج رجال وهذاك ما لعبش بيها بينلها ظروفو وصارحها وخلاها في يدها تستناه او تتزوج وهي ضرك إما تزيد تستنى إما تقبل بلاخر وتقطع صلتها نهائيا بيه ما تبقاش تلعب بولاد الناس لأنو اللي جاي يخطبها ما عندو حتى ذنب موفقة

[yacine-08]

الزواج راه قدرة مالية وقدرة جسدية

ماشي غي ارواح واتزوج

هدا لا يعني ان الفقير لا ييتزوج

لكن المجتمع الدي نعيش فيه حاليا لا يرحم

فادا تزوج هدا الفقير من بعد يجد المشاكل مع زوجته فلاداعي للزواج في المقام الاول

[naamane3]

ساعة يقول اخطيني راني ما نيش خدام
وساعة يقول استنيني حتي نلقي خدمة
وساعة هاك وساعة هاك
وزيد ماشي باغي يمد كلمة لاصحاب الدار
وزيد عمرك 29 سنة وتحبييييييييييييييه
انا من رأيي انساي هذا الحب الذي صاحبه
في حيرة من امره واضن انه لن يسعدك في زواجك
اقبلي ممن يخطبك الآن قبل فوات الاوان
واقطعي علاقتك به فورا وبلا سبب
وادعي الله واستغفريه كثيرا
والله المستعان

[moka tiartia]

troh tetzawaj ana seratli ki kont f jami3a w man ba3d nhar li ftah alih rabi w rah l ètrangè nsani khalik mano tezawji jibi wlad l 3kaybak

[الرڨيڨ]

المشاركة الأصلية كتبت بواسطة achwak crazy girl

لازم تتاكد قبل من مشاعرها ماشي تلعب بيه تديه اومبعد يرميها ملقة ولكن هيا راهي 29 سنة كون تبقى تستناااه كون تبووور معليش تتزوج وتنساه نورمال

واش بيكم يا نساء هل الخوف من البوران يدفعكم انكم تتزوجون شخصا لا تحبونه و في قلبكم شخص اخر هذا ظلم للرجل الثاني

عليها ان تنزع من قلبها هذا الانسان اولا ثم تفكر في الزواج

[Assouma 93]

انا يظهرلي تنساه احسن و الله تندم على هذا اللي راه يماطل فيها و زيد راهي قريب تفوت سن الزواج الله يبارك الى متى ستنتظر هذا الشخص لايجاد عمل ربي معاها ان شاء الله