خطبتي و نفسيتي

[مشكلتي]

السلام عليكم و رحمة الله و بركاته
اخواتي و اخواني في الله حبيت نحكي اليوم على مشكلتي و اللي هي انو من فترة تقدم لخطبتي شاب يعني يعتبر من اقاربنا المهم انا ماحبيش نقبل بامر الخطبة هادي بصح الوالدة خاصة ماعجبهاش الحال كي قلت لها مانيش قابلة بيه و الوالد مابينليش بلي ماعجبوش الحال بصح هو تان ماحبش كي قلت لالا المهم ممبعد قلت لهم ايه و درنا الفاتحة و كل شي بقا العرس منا على شهور ان شاء الله
المشكلة خاوتي اني مرات لما نقعد مع روحي و نفكر ف اني قبلت بيه نحس اني ضيعت احلامي كامل راكم عارفين كل واحد و واحدة كيفاش يتمناو النصف ديالو يكون انا كنت متمنية واحد ملتحي و دو مظهر اسلامي الله غالب اغار لما ارى شباب بهده الصفة على هاديك كي نتفكرو نحس باكتئاب و انو ماشي هو لي راني حاباتو بصح واحد مافهمني رغم اني قلت لهم حابة واحد ملتزم و كدا لكن خطيبي لما اراه نتقلق و تان كي رحت نعقد حسيت بلي غلطة اني قبلت و بدات افكار براسي يعني ماشي كيما البنات يفرحو و ماشابه و حتى العرس ماشي مقلقة عليه و لا مانحسش بطعم الفرحة تاع اني رايحة نتزوج رغم اني اسال الله يغفر لي على هاد التخمام لانو ماشي حق علي نخمم عليه هكا
و الحق الحق هو يحبني و يعاملني مليح و يسايرني و طيب و لما يسألني ادا نحبو و ماشابه اكيد مارانيش رايحة نقولوا ماشي نتا لي تمنيتك
علابالي بلي الخيرة فيما اختاره الله بصح حبيت نسقسيكم بالله زعما يمكن ان هاد الشعور مني يتبدل و نعيش مرتاحة و لا درت غلطة من الاساس كي قبلت و من جهة نسأل الله اني مانكونش ظالماتو بتخمامي