ساعدوني يا ناس ....

[مشكلتي]

السلام عليكم ورحمة الله تعالى و بركاته

انا فتاة عمري 16 سنة مشكلتي اني ماعنديش ثقة بنفسي مانحبش نخالط الناس صحا فالليسي نزعق و نضحك مي مرات نسمع كلام يزعجني عندي واحد كان يقرا معايا دايما يديرونجيني يقعد يعيب عليا و الله عقدني مع العلم اني مانتعايبش و الحمد لله مي هو يشوفلي اي حاجو نديرها يعلق عليا انا كرهلي حياتي و زيد انا نكره نبقا فالدار سيرتو في العطلة نحب نخرج مع ماما مي نقول بلاك مانيش شابة دوك يعيبوا عليا والله تعقدت مانحب نروح لحتا بلاصة مالغي دايما كارهة في الدار
بليز عاونوني كيف نسترجع ثقتي بنفسي ؟ و نولي نروح و نتمشا وين نحب ؟ بف و الله كرهت

ساعدوني يا ناس الخير

سلآم

[Assouma 93]

خلي ثقتك بنفسك كبيرة و لا تسمعي كلام الناس الذي اصبح بالنسبة لهم هواية انهم يستغلون ضعفك هذا و يستهزؤون بك اثبتي لهم العكس

[ranou gigi]

حطي حاجة وحدة في رأسك بلي الي يضحك على الناس ماينتظرش منك انك تعطيلوا قيمة مازالك صغيرة اضحكي العبي حوسي خالطي الناس و تقربي منهم الناس الفاهمة تحب الشخص من عقليتوا ماشي من شكلوا و ثاني عودي دخلي روحك في اي موقف ماتخليش روحك غريبة باش مع الوقت احسوا بوجودك و لكن اذا جبدت روحك الناس كل راح تنساك

[سرور]

ديرا ثقة في نفسك انا كنت هاك كيما نتي مي حمد الله نصحوني صحباتي درت ثقة في نفسي وليت خير من لي كانوا يقولولي معقدة حمد الله

[kab_66]

اختي انا أيضا عمري 16 سنة و تاني يهدروا عليا و خواتاتي دايما ينصحوني و يقولولي ماديريش على هدرتهم
و انا نقلك رميهم فالثقيل يعني ماتعمريش هدرتهم في راسك خليهم يهدروا حتى يعياو و كي يشوفوك ماكيش ديري عليهم يحبسو وحدهم
و خلي ابتسامتك دائما موجودة

[mimi best]

سلاااااااااااام اختي انا كيفك بعد وعمري 16 ستة الناااااااااس دايما يحكو فيا وصلت بيهم انهم يعملولي مشاكل وهوما اقرب صديقاتي لكن الحمد لله انا وكلت عليهم ربي واسترجعت الثقة بنفسي والحمد لله
ولكن اياكي اياكي ان تثقي في جميع الصديقات يا اختي انا عندي صديقةوحدة والحمد لله

[YouCefo_dz]

انت لماذا تتكلمين معه؟؟؟؟

[translatorEn]

رضا الناس غاية لاتدرك

[حميد.ص]

لا تجعلي كلام الناس يؤثر عليك............

[hadjadj7283]

عيشي عمرك و مرحلة المراهقة كيما كل المراهقين و لكن فيما يرضي الله سبحانه و تعالى

[achwak crazy girl]

متخلي حتى واااحد يسوسك علاه مديري على حتى واااحد انا تاني عمري16 سنة وجااامي نسمع لهدرة نااس ملقري معندي حتى واحد يعلق علياا

[sarsoraa]

اختي مازلتي صغيرة عيشي حياتك فيما يرضي الله وخليك من هدرة الناس و خلي ثقتك بنفسك و بالله سبحانو كبيرة انا عمري 17سنة و ما نسمعش للناس و الحمد لله حنا نعيشو الحياة مرة واحدة مالا خلينا نرضو المولى عزووجل احسن ومنحققوش للاعداء واش يحبو
ربي يوفقك اختي

[ام نسمة]

عليك ان تتخلصي من هوس الاهتمام بكلام الناس لانو مع الطول يرجع مرض ويحرمك من كل شيئ تحبينه لان بطبيعة الحال لاشيئ يرضي الناس وكلامهم ..........عززي ثقتك بنفسك ...........احكي مع روحك وتقربي من ناس يشحنوك بمشاعر ايجابية واعلمي انه هناك حكمة تقول ...........................لااحد يرفس كلبا ميتا ............هدا كلام عالم النفس اسمو ديل كارنيجي .......ساقول لك قصة صغيرة عندما كنت في 17 من العمر كانت لدي عقدة هي ان كل الناس والبنات في مثل سني احسن مني وكنت اشعر بالحزن والحيرة مثلك ودات يوم كنت مارة بجانب مكتبة كبيرة لفت انتباهي في الواجهة كتاب ليوسف الاقصري اسمه اكتشف نفسك وقدراتك يحتوي على خمسة اجزاء مهمة جدا 1-كيف تفهم شخصيتك وتتخلص من سلبياتك 2-كيف تتكلم وتتحاور بطريقة افضل 3-كيف تواجه مشاكلك مع الاخرين 4-كيف تحقق طموحاتك وتصبح مميزا في عملك 5-ابحث عن نقاط النجاح في شخصيتك
والله هاته السلسلة فدخلت واشتريت رقم واحد وقرءته ومنها كانت نقطة التحول في شخصيتي من انسانة ضعيفة وخوافة الى انسانة ثقتي بنفسي لا يهزها اي احد مهما كان تقدري اتقولي من هداك الوقت حطيت مبادئ حياتي .............انصحك بقراءة مثل هاته الكتب فهي تنضج الفكر وتكسبك افكار ايجابية حول نفسك .......كما كنت متابعة لكل برامج الدكتور ابراهيم الفقي رحمه الله تقدري تطلعي محاضراته وحصصه من النت والله عن تجربة راح تساعدي نفسك وتدعيلي في ظهر غيب عندك النت يلا جددي هويتك ونفسيتك وفكرك ........حظ موفق

[مريم الصابرة]

السلام عليكم
انا نحير فيكم كيفاه تعمرو راسكم بالناس
يا اختي شكون كامل هذا اللي يعيب عليك علاه هو ما فيهش العيب وإنت علاه تتقلقي اصلا لو انا منك بالناقص من الناس محترمة نفسك متربية والديك فخورين بيك خلاص لو انا عندي 4 ريسان نخرج راسي مرفوع ما تعكريش راسك الناس كي تكون إمام يهدرو فيك إمالا عيشي حياتك ورضي ربي ووالديك وخليك من الغاشي الراشي موفقة

[سارةالتلمسانية]

اللي خلق ما يضيع وتبعي طريق ربي تنجحي ولعني الشيطان هو اللي يوسوسلك في راسك وربي خلق وفرق وكل واحد عطاله حاجة تميزه شوفي الناس اللي قل منك شوفي الاعمي اللي ميشوفش والموعوق اللي ميمشيش يتمنى غير يكون كيما الناس وتيا راكي بصحتك وربي خلقك كاملة والكمال لله وراكي تحكي هاكا