دلاّع بقشورو وبذورو...دلاّع ...دلاّع ..دلاّّّّّّاااااااااااع

[ابداع جزائرية]

اللهم صل على سيدنا محمد صلاة ترضيك وترضيه وترضى بها عنا يا رب العالمين
وعلى اله وصحبه اجمعين والتابعين باحسان الى يوم الدين:



وش احوالكم بناويت
نتمنى تكونو بخير وفي صحة وفي رضى من رب العالمين

اليوم حبيت نشارككم بكيكة الدلاع
كنت درتها كتطبيق من مدة شفتها في منتدى عربي ربي يجازي صاحبتها خير
وعجبت للولاد خاصة وحتى نالت استحسان الكبار وبنينة
هاذي صورتها

جات هايلة والله
ماصورتش كامل الخطوات لكن سهلة مافيهاش حاجة معقدة
المقادير:

2ونص كاس فرينة + 4 بيضات +كاس ونص سكر بودرة + كاس وربع زبدة او مارجارين طرية+ربع كاس حبيبات شوكولا سوداء+مغرف كبيرة خميرة حلويات+فاني +قرصة ملح+لونين احمر واخضر

الطريقة

نخلطو الزبدة مع السكر بودرة ولافاني مليح حتى يولي خليط كريمي

ومبعد البيض واحدة بوحدة مع التحريك المستمر

بعدها الفرينة مغربلة مع خميرة الحلوى

حتى تتحصلي على خليط شوي ثقيل على نتاع الكيكة او المسكوتة العادية

اقسميه :
ثلث لونيه بالاخضر ماتكثريش بزاف
كما هك:



والباقي باللون الاحمر وزيديله حبيبات الشوكولا




ادهني المول نتاع الكيك المثقوب بالزيت ورشةفرينة
وحطي بالعقل الخليط الاول بمغرف او سباتولا


ومبعد ضيفي بالعقل باقي الخليط فوقه
حطيه يطيب في فرن حوالي 180 درجة مسخن مسبقا حوالي 40 الى 45 د

كي نخرجو الكيكة من الفور نخلوها تبرد
وننحّيو وجهها بالعقل بالسكين حتى تكون مستوية
ونقلبوها في طبق التقديم

او تتقطع كما نقصو الدلاع

وهذا الشكل النهائي


نتمنى تعجبكم


وفقط ماتنساوش


المرة هاذي ماترميوش بذور الدلاع


كالعادة نقولكم ماتنساوش ام انيس من صالح دعائكم
ربي يرضى علينا ويبلغنا رمضان ويجبر كسر امتنا في كل مكان

اني احبكن في الله