خطيبي مادي ماذا افعل 89

[مشكلتي]

السلام عليكم

لا أعرف ماذا يحصل لي هذه الأيام صرت مشتة الأفكار

انا فتاة عمري 23 سنة تعرفت على شاب في مرحلة الجامعية هو دركي و ماشي من الولاية ديالي عرفتو 3 سنوات و عند تخرجي بعد اشهر ربحت في وظيفة عمومية و تقدم الشاب اللي كنت نعرفو لخطبتي قبلت بيه من غير من خمم قلتت راني نعرفو بيان و الحمد لله عمرو ما دار حاجة خايبة معايا المهم الحاجة اللي تغيرت صرت نلاحظ انه صار مهتم جدا بالجانب المادي يعني صار يخطط للتحضيرات ديال العرس و المصاريف النصف بالنصف يعني مثلا المهر هو يدفع 3 ملاين و انا 3 ملاين و الذهب هو يشري سنسلة و انا منقوش لا شومبر نشروها نصف نصف للعلم يقرر هاذ الشي لوحدو يمكن البعض منكم راح يقولي عادي كان يكون عادي لو كان ماشي خدام و لا الاجر ديالو ماشي بزاف لكن الحمد لله الاجر ديالو يكفي و يوفي لكن انا حابة نكون كيما كل البنات تحس ان لها قيمة و يكبرو بيها . من العمل ديالي درت حساب بنكي محترم يعني قلت ما نخلي والدي مايحطو حتى دينار في الزهاج و العرس ديالي يكفي واش صرفو عليا لكنه صار كل مرة يجبدلي عليه يقولي نشرو بيه و نشرو بيه لكن الواضح اني راح نعمل عرس و نصف و راني عارفة والدي لوكان يسمعو ماراحش يوافقو .

من جهة اخرى تقدمت باش ندي رخصة سياقة التقيت بشاب يدرس معايا ما شاء الله و من نفس دائرتي تقدم ليا قالي اختي راني ناوي لحلال اذا ماشي مخطوبة حابة نبعث يما لداركم ما رديتش عليه و صرت نخمم في هاذ الراجل اكثر من خطيبي راني عارفة هاذا غلط لكن هاذي هي الحقيقة

مشكلتي الآن راني نخمم نفسخ من خطيبي خاطرش راني نحس انه يحب الراتب ديالي كثر ماللي يحبني و قاع المشاعر اللي كنت نحسها من جيهتو راها تتلاشا و صرت مانقدرش نهدر معاه او نشوفو يعني حتى اذا رديت على الهاتف نرد غير باش ما يقولش راها تتهرب

و ثانيا واش نعمل من جهة الشاب اللي معايا في مدرسة السياقة يعني نصارحو اني مخطوبة او نقولو راح نفسخ او نقولو تقدم ماني عارفة حتى حاجة

ساعدوني ارجوكم