الجزائري و ثقافة النظافة

soso sirin · 2012-10-03, 21:54

اليوم باغية نهدر معاكم في موضوع النظافة و ثقافة النظافة عند الجزائري.مع كل احتراماتي للشعب الجزايري و الي انا وحدا منهم مي ثقافة النظافة عندنا منعدمة .نتمشاو و ناكلو و نرمو نرمو وين جات في الطرقان وين مانكونو مريحين في النقل تقول مكانش وين نرمو .كل واحد يهدر واش شاف واش ماشافش لانو الصح كاين حالات تقول كون جينا عميين خير .الكلمة لكم و الدار داركم

الواثق · 2012-10-03, 22:25

عندنا جارنا فاز في مسابقة البلدة في افضل مساهم للنظافة دائما يرفع المكنسة واي مكان في الشارع يكنسه وينظفه ...........ومرات يستعين بعمال ويدفع لهم المال لتنظيف شارع ليس بشارعه اصلا ................اما البقية لي ينظفها في ايام يرجعوها كما كانت في ساعة والله المستعان

soso sirin · 2012-10-04, 19:29

اقتباس:

المشاركة الأصلية كتبت بواسطة الواثق

عندنا جارنا فاز في مسابقة البلدة في افضل مساهم للنظافة دائما يرفع المكنسة واي مكان في الشارع يكنسه وينظفه ...........ومرات يستعين بعمال ويدفع لهم المال لتنظيف شارع ليس بشارعه اصلا ................اما البقية لي ينظفها في ايام يرجعوها كما كانت في ساعة والله المستعان

والله هذا جاركم الا هايل كون جينا كامل كيما هو الجزاير راح تدي الميدالية الذهبية العالمية للنظافة

سعاذ · 2012-10-03, 22:33

السلام عليكم
صح اغلبية يهدروا على نظافة و انهم يحبوا نظافة بصح هذا في دارهم برك اما برى غير تخطي راسهم برك
انا واحدة من ناس و انطلاقا بلي واحد لازم يبدى من عندوا الحمد الله من نهار عرفت صلاحي ما نطيشتش حتى حجا في بلاصة خاطيا بلاصتها حتى تيكيات تاع بيس نلمهم في ساك و لا اي حجا نكلها بري لونبلاج تاعها نحطو في الساك كي نروح لدار ساكي يبان زبالة حتى خواتاتي باش يعرفوا واش كليت و لا وين رحت كي نفرز ساكي يقعدوا قدامي يقرعجوا من لحوايج لي نخرجهم من ساك يعرفوا كلش بلا مانهدر اي كلمة
بصح تعرفي دنيا مزالها بخير عندي يومين برك من سمعت بحملة تنظيف داروها لولاد تاع واحد حي من عندهم بلا مايقلهم حتى واحد
ربي يهدينا و يثبت علينا العقل و الدين
دمتم في رعاية الله و حفظه

soso sirin · 2012-10-04, 21:56

اقتباس:

المشاركة الأصلية كتبت بواسطة سعاذ

السلام عليكم
صح اغلبية يهدروا على نظافة و انهم يحبوا نظافة بصح هذا في دارهم برك اما برى غير تخطي راسهم برك
انا واحدة من ناس و انطلاقا بلي واحد لازم يبدى من عندوا الحمد الله من نهار عرفت صلاحي ما نطيشتش حتى حجا في بلاصة خاطيا بلاصتها حتى تيكيات تاع بيس نلمهم في ساك و لا اي حجا نكلها بري لونبلاج تاعها نحطو في الساك كي نروح لدار ساكي يبان زبالة حتى خواتاتي باش يعرفوا واش كليت و لا وين رحت كي نفرز ساكي يقعدوا قدامي يقرعجوا من لحوايج لي نخرجهم من ساك يعرفوا كلش بلا مانهدر اي كلمة
بصح تعرفي دنيا مزالها بخير عندي يومين برك من سمعت بحملة تنظيف داروها لولاد تاع واحد حي من عندهم بلا مايقلهم حتى واحد
ربي يهدينا و يثبت علينا العقل و الدين
دمتم في رعاية الله و حفظه

واش راكي سعاد ان شاء الله بخير.ربي يبارك فيك و يقوي من امثالك امالا تشري حاجة و ماتجيبيلهمش راهي طفرت فيك ههههه.والله اذا تلقايي واحد ينظف تلقاي عشرة يوسخو و منبعد يقلك وعلاه قوا الوسخ في الطرقان .اللهم امين

SOUSOU. DZ · 2012-10-03, 22:33

السلام عليكم وي اختي وسيلة والله ثقافة النضافة في الجزائر معدومة تاع الصح

ربي يهدي نحاول نربو روحنا ومبعد الغير

شكرا على الموضوع ختيتو وتقيم خليه للمبعد

soso sirin · 2012-10-04, 21:58

اقتباس:

المشاركة الأصلية كتبت بواسطة sousou. Dz

السلام عليكم وي اختي وسيلة والله ثقافة النضافة في الجزائر معدومة تاع الصح

ربي يهدي نحاول نربو روحنا ومبعد الغير

شكرا على الموضوع ختيتو وتقيم خليه للمبعد

وعليكم السلام الواحد يبدا بروحو و اذا كل واحد دار الي عليه الحال راح يتصلح.راني نستنى في التقييم مع انو المرة الي فاتت مامديتيليش بزاف ههههه

الواثق · 2012-10-03, 22:35

فكرتوني مرة خرجنا من المركب الرياضي فنزل المطر بغزارة فجريت انا واصدقائي و2 نت اصدقائي لعبوها اذكياء صبت عليهم امرأة شكارة تاع زبل حاشاكم من الطابق الخامس هههه...............هربو من المطر تاع ربي طاح عليهم النفايات تاع العبد هههه

والله المستعان ..............حاشاكم الزبل يطيشوه من الفوق ؟؟؟؟

SOUSOU. DZ · 2012-10-03, 22:48

اقتباس:

المشاركة الأصلية كتبت بواسطة الواثق

فكرتوني مرة خرجنا من المركب الرياضي فنزل المطر بغزارة فجريت انا واصدقائي و2 نت اصدقائي لعبوها اذكياء صبت عليهم امرأة شكارة تاع زبل حاشاكم من الطابق الخامس هههه...............هربو من المطر تاع ربي طاح عليهم النفايات تاع العبد هههه

والله المستعان ..............حاشاكم الزبل يطيشوه من الفوق ؟؟؟؟

يععععععععععع مقرف ربي يهديهم

لؤلؤة الفردوس · 2012-10-03, 23:22

اقتباس:

المشاركة الأصلية كتبت بواسطة الواثق

فكرتوني مرة خرجنا من المركب الرياضي فنزل المطر بغزارة فجريت انا واصدقائي و2 نت اصدقائي لعبوها اذكياء صبت عليهم امرأة شكارة تاع زبل حاشاكم من الطابق الخامس هههه...............هربو من المطر تاع ربي طاح عليهم النفايات تاع العبد هههه

والله المستعان ..............حاشاكم الزبل يطيشوه من الفوق ؟؟؟؟

لآ حول و لا قوة الا بالله ، اختصرو الطريق رماوه من الفوق
ربي يهديهم و يهدينا

اِشراقـة أمل · 2012-10-03, 22:41

ذلكَ تابع لنظرة الفرد للخاصة وليست العامة

فكل شخص ينظر الى الآخر ويودّ أن يعتمد عليه

ولكن هناك من لا يهنأ الا اذا قام بواجبه

الله المستعان

بوركتِ

soso sirin · 2012-10-04, 22:04

اقتباس:

المشاركة الأصلية كتبت بواسطة الواثق

فكرتوني مرة خرجنا من المركب الرياضي فنزل المطر بغزارة فجريت انا واصدقائي و2 نت اصدقائي لعبوها اذكياء صبت عليهم امرأة شكارة تاع زبل حاشاكم من الطابق الخامس هههه...............هربو من المطر تاع ربي طاح عليهم النفايات تاع العبد هههه

والله المستعان ..............حاشاكم الزبل يطيشوه من الفوق ؟؟؟؟

ايه و تلقى هذا المشكل عند اكثرية سكان الباطيمات يعياو باه يهبطوه للتحت والله يحتاجوهم في المنافسات العالمية الرياضية سوغتو تاع رمي الجلة بلاك يحطمونا ارقام قياسية

اقتباس:

المشاركة الأصلية كتبت بواسطة اِشراقـة أمل

ذلكَ تابع لنظرة الفرد للخاصة وليست العامة

فكل شخص ينظر الى الآخر ويودّ أن يعتمد عليه

ولكن هناك من لا يهنأ الا اذا قام بواجبه

الله المستعان

بوركتِ

كاين ناس تلقايهم عندهم وعي ماشاء الله و كاين ناس والله مايهمهم كامل يقلك كاين الي يجي مورايا يلمهم و منبعد يقلك اووه عمال النظافة ماراهمش يخدمو نيشان و الي يسمعو يحسب هو راه يخدم خدمتو

عميروش الحر · 2012-10-03, 23:13

ثقافة النظافة ما عندناش للاسف الشديد والسبب اولا فينا كشعب و ثانيا السبب في المسؤولين ... لاني انا كفرد نكون ناكل ولا نشرب برا اي حاجة ما نلقاش وين نرمي هذاك الساشي ولا هاديك القرعة وبالتالي نرميها فالارض ... و هنا على البلدية على الاقل دير سلل مهملات فالشارع الواحد يرمي فيها ولكن رغم ذلك كاين بعض الناس زكارة يرمي فالارض حتى لو تكون السلة حداه ...
ذكرتيني بوحد الاستاذ كان يقريني فالثانوي .. . كان يهدرلنا على النظافة فالقسم .. قاللنا لازم نتوما تاني تعاونو الكونسييرجات و ما توسخوش اللرض راكم كبار..و..و..و..و..
كان يكمي سيجارة كي كملها رماها فالارض وعفس عليها و خرج هههههه
هنا تعرفي بلي المستوى الثقافي ولا التعليمي لا يدل بالضرورة على ان الشخص عندو ثقافة النظافة لانو هاذ الثقافة تكبر مع الشخص و تبدا مالوالدين هوما لي يعلمو ابنائهم ذلك ...

soso sirin · 2012-10-04, 22:14

اقتباس:

المشاركة الأصلية كتبت بواسطة عميروش الحر

ثقافة النظافة ما عندناش للاسف الشديد والسبب اولا فينا كشعب و ثانيا السبب في المسؤولين ... لاني انا كفرد نكون ناكل ولا نشرب برا اي حاجة ما نلقاش وين نرمي هذاك الساشي ولا هاديك القرعة وبالتالي نرميها فالارض ... و هنا على البلدية على الاقل دير سلل مهملات فالشارع الواحد يرمي فيها ولكن رغم ذلك كاين بعض الناس زكارة يرمي فالارض حتى لو تكون السلة حداه ...
ذكرتيني بوحد الاستاذ كان يقريني فالثانوي .. . كان يهدرلنا على النظافة فالقسم .. قاللنا لازم نتوما تاني تعاونو الكونسييرجات و ما توسخوش اللرض راكم كبار..و..و..و..و..
كان يكمي سيجارة كي كملها رماها فالارض وعفس عليها و خرج هههههه
هنا تعرفي بلي المستوى الثقافي ولا التعليمي لا يدل بالضرورة على ان الشخص عندو ثقافة النظافة لانو هاذ الثقافة تكبر مع الشخص و تبدا مالوالدين هوما لي يعلمو ابنائهم ذلك ...

المشكل راه في التربية لانو الطفل ماشفتوش بلي كي يكون يتربى راه ياكل في الياووغت و كي يكمل يقيس القوط و المغرف و يروح و كون ماتبعوش و ماتخليهش يرجع و يرفدهم راح يوالف و كي يكبر يولي ياكل و يقيس برا.هي صح من المسؤولين مي واحد يدير الي عليه و هوما بينهم و بين مولاهم .هذا شيخكم حاجة الا صرات كارثة نيشان مي كاين منو بزاف يهدر على الغاشي و ناسي روحو

mohamed160 · 2012-10-04, 19:37

سلام عليكم بارك الله فيك على الموضوع والله هدا موضوع حساس بزاف كل الجزائرين رانى نعنيوا منوا انا واحد من الناس خطرى فى الطريق السيرى شرق غرب كنت رايح لتمسان واحد ارمى من نافدة السيارة قرعى نتع الماء قريب اقتلنى قريب اتقلببت بى السيارة