كرهت من هاذي العقلية

nouv-mariée · 2012-09-30, 00:26

السلام عليكم^حبابابي وعزازي
اليوم جبتلكم مشكلة صديقتي المقربة ، غاضني حالها وديما تبكي ،، والله ما لقيت وش ندير بش ترضى بوضعها

حبيت نحكيهالكم بعد ما طلبت اذنها طبعا ، ونتمنى اننا نلقالها حال

صحبتي تقول :

عمري 22
قصتي تتلخص في اني نشأت في عائلة محافظة جدا جدا جدا جدا ، بل ومعقدة ايضا

كرهت من الضغط من طرف الام وتدخلها الدائم في شؤوني ، ماعنديش الحق حتى بش نخير كلاكيت وحدي اكرمكم الله ،، لازم كل شي تخيروا هي ، ولازم نقبل سينو كي نورح للدار نتبدهل ونتضرب ونتسب من طرفها هي ومن طرف الوالد ، والله كرهت معيشتي ، حابة نحس بشوي استقلالية راني كبيرة وعاد عندي راي

الى متى هذا الضغط ، عدت نحشم من لبستي في الجامعة لانهم هوما اللي يخيروها مش انا

والمشكلة مش مشكلة لباس فقط ،،

المشكلة حتى كي نكون في الدار ونحب نغير الغرفة لازم نستأذن تخيلوااا ، لازم نقول راني رايحة لغرفة الاستقبال سينو يشكوا بلي راني نهدر مع واحد في التلفون ، واناااا ربي الشاهد عمري مادرت حاجة غالطة وعمري ماخيبت ظن عايلتي فيا ولله الحمد ،،، بصح شكهم الزائد وخوفهم عليا زاااااااد

كرهت ، مانيش حاسة بالراحة ، طول حاطيني تحت المراقبة ، ماعنديش الحق نزور صحاباتي ، و صحاباتي كرهوا مني لانهم هوما ديما اللي يزوروني و زعفوا مني قالولي زورينا حتى انت

ماعنديش الحق نقعد مع روحي نخمم شويا

ما عنديش الحق في المصروف الشهري او نشري حاجة وحدي مستحيل ،، لازم الكل يتدخلوا ويتشرطوا حتان نكرهها الحاجة

حتى خمار بش نشريه يبدوا الكل يمدوا في رايهم

هذا كاااااامل معليش
بصح الضرب والمعاملة السيئة هوما اللي عقدوني ، يعاملوا فيا كالخادمة مش بنتهم الوحيدة ، نبرة صوتهم ديما خشنة معابا ومع خويا حناااان
كي نوض الصباح ونقولهم صباح الخير مايردوش وخويا هوما اللي يصبحوا عليه
كي نجي من القراية ونقول السلام عليكم ما يردوش

مرة ماقلتش السلام عليكم ، كرهت من الحقرة ، كليت طريحة ، هوما يحسوا رواحهم واما مايحسونيش كي نتحقر يشوفوني كالحشرة

والله كرهت
والله عييت
والله مليت من عقليتهم

ولله شحال من مرة نخمم في الانتحار بصح نخاف من ربي ونقول انا في دنيتي ما ربحتش مش حابة نكملها في الاخرة مانيش رابحة تاني

عمري مادعيت عليهم ، وعمري ماتمنيتلهم الشر ،، لدرجة باعد مانتضرب نقول في قلبي ربي يهديك يا ماما ولا يابابا
ونقول يا ربي اصلحنا واصلح شأننا

دبرواااا عليا وش ندير مع العايلة هاذي

كرهت من الحقرة ، كرهت من القهر ، والكبت اللي راني عايشة فيه والله عييت

انتهت القصة

نتمنى انه نلقى تفاعل كبير خاطر صحبتي والله حالتها مؤثرة بزاف

Abdou83 · 2012-09-30, 00:45

السلام عليك يا أختي
و الله يا أختي بعد العسر يأتي اليسر
فاصبري و اثبتي فإن الله يرى

اسعى لرضى الله · 2012-09-30, 00:53

لا حول ولا قوة الا بالله

ربي يرزقها بزوج صالح تقي يعوضها يا رب وبذرية صالحة وربي يهدي عائلتها

قولها تصبر لعلو ربي مخبيلها حوايج ملاح في حياتها

nouv-mariée · 2012-09-30, 00:55

شكرا لكما على المشاركة

والله راهي صابرة وماعندها وش دير ،

الله غالب مسكينة سلاحها الوحيد هو الصبر

aihemsara · 2012-09-30, 01:10

ربي يفرج عليها ان شاء الله
ما تشفيش اختي بالاك ربي يبعتلك وليد حلال يعوض على الوقت لي فات قاع لي كنتي همومة فيه
ربي يهدي والديكي و يهنيكي و يفرج عليكي و يعوضك يااااااااااا رب

مريم الصابرة · 2012-09-30, 09:20

السلام عليكم اختي
لا حول ولا قوة إلا بالله صح كاين اهالي هكذا معقدين من كثرة واش راهم يشوفو برا هي راهم غالطين الف بالمية لكن واش دير يبقاو اهلها ما عليها إلا تلجأ لربي يهديهم ويحنن قلبهم عليها حد وين ربي يبعثلها راجل يا رب يكون خير من أهلها ويعوضها تخافي يكون معقد اكثر من اهلها سور راحين هوما يخيروه مسكينة يا ربي يفرج عليها يا رب قوليلها صلي بزاف و إدعي إدعي راه الفرج عند ربي وشوفي ربي واش كاتب وتنحي فكرة الإنتحار من راسها ما داويش الشر بالشر وأي شر نار جهنم ربي معاها وشكرا لك راكي تساعدي فيها بارك الله فيك.

السي محمد · 2012-09-30, 11:36

عليها بالصبر و الصلاة و الدعاء

و إنّها لكبيرة

nouv-mariée · 2012-09-30, 14:14

شكرا لكم

جميعا

sarl02 · 2012-09-30, 14:22

تاكدي بان حساب الوالدين عند الله عسير لمعاملتهم القاسية لهذه البنت ...الحل الوحيد انها تصبر نعم الصبر هو الدواء الوحيد في مثل هذه الحالات وان شاء الله ربي يرزقها بولد حلال الي يعرف قيمتها واعوضها وتروح تريح من هذا المحيط القاسي والظالم.

nouv-mariée · 2012-09-30, 14:26

آمين يا رب شكرا اخي

شاملة لينة · 2012-10-01, 14:33

إن الله مع الصابرين

فخورة بحجابي · 2012-10-02, 14:56

ما لقيت مانقول ربي يهدي الاهل تاعك وجعل الله لك من كل هم مخرجا .

nouv-mariée · 2012-10-02, 14:58

للتوضيح : المشكلة مشكلة صديقتي ،،

انا خاطيني هههه بعدي الشر ، الحمد لله الحمد لله الحمد لله اهلي ملاااااح ياسر وحنان معانا ،،،،،

ربي يخلصها منهم ياااا رب

soheib+206 · 2012-10-04, 16:00

لا حول و لا قوة الا بالله

ربي يهديهم هاد الوالدين و الله ما هاك

وصانا الرسول عليه الصلاة و السلام

نشالله يا ربي يرزقها بزوج شهم حنين

يعوضها على هاد السنين العذاب

أميييييييين يا رب العالمين

soha1987 · 2012-10-04, 17:53

مسكينة ربي يفرج عليها وهادو ماهومش والدين ياحفيظ ماكانش رحمة في قلوبهم صح الوالدين يديرو طفل خير من طفلة ويميزو وكاين عندنا فالدار بصح شوية ماش بزاف مي هادو عماوها ديراكت ربي يرزقها بولد حلال يخرجها من هاد الهم لي عايشاتو