اختي تحب شخصا متزوجا

[مشكلتي]

السلام عليكم ورحمة الله تعالى وبركاته
المشكلة هي اختي التي اكبرها بسنتين اي انا عمري 24 سنة وهي 22 سنة
انا وهي كصديقتين اكثر من اننا اختين تصارحني بما يخالجها وانا نفس الشيء
المهم
لاحظت على اختي من فترة وجيزة ان حالها مقلوب اي انها كثيرة التفكير شاردة الذهن تغيب مرات عن الجامعة هدا ما جعلني اقلق يعني خفت عليها تكون مريضة خصوصا خفت عليها من خويا لي بدا يشك وكل مرة يطل فيها يقولها مراكيش نورمال
وكنت نلاحظ ختي الصغيرة لي في عمرها 10 سنوات دايما معاها وختي الصغيرة كي تكون خارجة تخرج معاها ورقة صغيرة كي نسقسيها تقولي سهام بعتتني لصحبتها عادي مديتهاش فيها قلت في نفسي بلاك المهم نهار رحت نسجل فلجامعة هي كانت مريضة من كرشها مرض شخصي قاتلي هاكي سجليني معاك كي وصلت للجامعة تلاقيت بلبنات صحباتها سلمت عليهم وقلت لصحبتها مالكي انتي وختي سهام الرسائل يظلو داخلين خارجين بيناتكم هاو هدرو في البورطابل صحبتها قاتلي لا مكاش منها هادي انا حرت وجبتها على طرف قلتلها فهميني ودوك بدات تتهرب استعملت معاها اسلوب تصغار العقل على سعدي قلتلها اممممم راها حاكيتلي وش هو حبيت نعرف وشبيها برك ايا قاتلي بلي الراجل لي تبغيه دا مرتو وراحو عطلة انا انصدمت قلتلها وشنو ؟ قاتلي ايه انا دخت كلي طاحت عليا بلوكا ثلج بارد رحت لدار لقيتها مريحة بلا منفيق ضربتها بكف وقلتلها متحشميش ايا ناضت بدات تبكي وتسب فيا قاتلي ماما وشبيك يا طفلة هبلتي؟ حكمت ختي الصغيرة تاني خوفتها حتى قاتلي بلي الرسائل كنت نمدهم لواحد راه يجي هنا انا هبلت وهي بدات تقولي نحبو ايه ملقيتش وش ندير قلت لماما ماما انبتها بصح منضعرتش قعدت معاها قتلها انا ختك ونبغيك كن يسمع خوك صح خويا صغير بصح مبرهش ايا هزتلي كتافها انا رحت لهداك الراجل وراتهوني ختي الصغيرة يخدم في حانوت ايا بخصت بيه بصح هدرت معاه قالي بلي ايه نبغيها ونهارات نجي نخطبها ونطلق مرتي ياويلي نخلعت اختي دمرت عائلة محبيتش نقول لماما عندها الظغط والله راني نفكر نقول لخالي ايه خالي انسان رزين وتاني قدي في العمر وانسان متفهم وكنت نقصدو دايما غير هو
دروك راني حابة نصيحتكم كي ندير؟ ربي يخليكم

[ندرومة49]

مشكلة والله

لازم التريث

وتنصحي أختك بالتي هي أحسن

تريد أن تخرب عائلة من أجل عشق

الله يسترنا يارب

أختك ربي يجبلها مكتوبها
وماتحزنش

ومازال كاين الرجال تاع الصح

مش داك الراجل فقط

راهم ملايين وبعقليات متفواته

اذا عقلي اختك وفهميها مليــــــــــــــــح

[becll]

السلام عليكم, عليك أن تبقي الى جانبها ولا تتركيها وحدها أبدا حتى لا يتلاعب الشيطان بعقلها (لها عقل مثلك أخي فهي ليست حيوانا)قلت عليك بنصحها و الصبر عليها كما عليك ان تنسيها هذا الذئب الذي يريد ان يفكك رباط اسرة من اجل شهوة عابرة, ثم من قال انه لن يفعل باختك ما ينوي فعله بزوجته؟؟؟
وفقنا الله و اياكم لما يحب ويرضى

[بلسم غرام2018]

صحيح مقال الاخ
لازم تخبري العائله ولا تشوف شيء واحد تحبو من خلاتك ولا خوالك ويكون متفهم احكيله تره يكلمها بلااك تعقل وعلابالي في حاله هك راها تسمع كلام البراني تشوف بلي يحب مصلحتها
وشوفي شيء صديقة ليها تحبها تاع الصح وتبغي مصلحتها تحكي معاها وتخبرها تفهمها لانو اختك والله مزالها صغيرة

ونشوف بلي يلعب بيها هذا الذيب وقثوليلها انت ثاني الا تزوجك هذا الا صرا يلقى وحد اخرى عمرها 20يزيد يقلك باباي ويروحلها هذا ذئب فاحذري منه احذري
وان تكلف الامر اخبري زوجته بالهاتف على اساس انك فاعله خير وهي توريله شغله ولا خبري باباك علابالي صعيبه مي لازم يوقف وتوقف عند حدها ونشوف بلي هي الي فتحتلو الطريق لانها لوكان صداتو اول مرة ميصراش هك اختك باينة راها غارقة خلاص مالا عندكم عليها ساهل ياسر يلعب بيها ويدير بيها وش يحب اسمحيلي على الكلام هذا مي هذا الواقع والمسلسلات التركية والي يتبعها راهم عزايز وهبلو خلي يا المراهقين
نصيحه من اخت تبلغ 19 سنة

[نيل المنى]

بصراحة أختي فالأمر خطير جدا لأن أختك صغيرة و غير ناضجة و ذاك الرجل متزوج و يكبرها يعني قادر يلعب بدماغها كما يشاء و يخادعها بكل يسر خاصة و أنه يعلم بضعفها.
في اعتقادي هذا الموضوع لن يكون حله ألا بتدخل أحد محارمك ليضع حدا له و لا تتأخري عن أخبار خالك لأنك لو حاولت فقط أنت فلن تستمع أختك لنصيحتك و كذلك ذاك الرجل(بزاف عليه كلمة رجل) لن يعمل لك أي حساب و سيستخف بك بل قد يحاول استدراجها أكثر انتقاما منك يعني وحدك لن تستطيعي فأنت أيضا صغيرة.
لا تستهينوا بالأمر و اقطعي كل الأسباب التي تؤدي الى استمرار هذا التلاعب باسم و شرف اختك.فهي الان لا تدرك أنها على خطأ.
هذا ما جنت الفتيات من المسلسلات التركية.
ربي يهدينا و يوفقك أختي ،و لا تنسي فالأمر ليس بالسهل.

[مطر تشرين~]

أختك ستدمر عائلة


نبهوها و حذروها من هذااااااااااااااااااااا


حراااااااااااااااااااااااااااااااااااااااااااااااا ااااام






أمك و أنتِ لاااااااااااااااااااازم تتصرفو


أمك تستطيع أنتوقف الأمر


تنبه أخاكِ بأن يراقبها 24/24 سااااااااعة

وأالصغيرة تتوقف عن الوساطة بالرسائل



وإذا تمادت و استمر الوضع و لم تجدوا حلا ،، آخر حل خالك يتدخل


ساعتها الرجل يحكي مع الرجل

[بسمة العمر]

فهميها بلي كيما راه يدير مع مرتو راح يدير معاها مع تفلة اخرى..........و دخلي خالك في الوسط راه قدكم و انشاء الله يتفهمالامر.......

[نوارة الخير]

ربي يحفظنا و يسترنا من هذا الوقت وقت الفتن
العقول صارت مغيبة بالكامل و الكل اصبح يلهث و يجري وراء الحب و كانه آخر المطاف
كوارث و مصائب جراء ما يسمى الحب بين الجنسين
تذكرو ذنوبكم و اثقالها و الآخرة و ما يؤول لها و عذاب الواحد القهار
يارب اهدينا و اغفر لنا و اكتبنا مع الاطهار و الأبرار

[وصال7]

اختى الغلطة فى الرجل المتزوج ادا بدانا نحللوا كلامك نلقاوالرجل متزوج يعنى انسان غير ملتزم صاحب نزوات والتانية اختك صغيرة 22سنة مراهقة واستطاع سحبها بالكلام المعسول خاصة ادا كانت تعانى من نقص العاطفة الابوية فى البيت وتالتا الرجل اخد زوجته فى رحلة يعنى يحبها وهم متفاهمين كيف تحب اختك معليش روحو معاها غير بالعقل حطى الرجل فى الامر الواقع طلق مرتك وارواح ابعتى خالك يقولو هكدا وناكدلك بلى راح ينسحب اويبعد لازم الطفلة تحس بلى ميستهلهاش والا بقات معاه ه_و يجوز فى وقت وهى تتعدب

[دلوعة أبي و زوجي]

الله المستعان أختي لقد حدث هذا الأمر مع صديقتي و نصيحتي لكي حاولي أن تبعيديه عنها بشتى الطرق و لكن دون اللجوء إلى العنف فقد يزيد الطين بلة و ما أقوله لكي هو عن تجربي
أولا يجب اقناعها بفسخ العلاقة و يمكنك ذلك أنتي بما أنك أقرب الناس لها أخبري خالكي و تفهما سويا في كيفية اقناعها
و ثانيا مساعدتها على فسخ العلاقة لا تتركي لها مجال أبدا لتفكير و محاولة الرجوع له صاحبيها دائما في مشاويرها كون بجانبها في البيت صدقيني أختي أنا قد لجأت إلى أنني أخذت هاتف صديقتي منها و كنت من يجيب على اتصالاتها و قد طلبت من أخي أن يكون هو من يجيب على هذا الرجل و ذلك لفترة شهرين
أختي إن رأيت أن اخبار أمك سيسهل عليك المهمة فأخبريها و حذاري حذاري أن تزيدي الطين بلة و خصوصا و أنك أشرتي أن أخاك صعب التفاهم معه
كان الله في عونك و هدا أختك و إن شاء الله كل شئ سيحل فقد حكمي عقلك

[بنت الرّحّل]

أنت أخطأت في التعامل مع أختك ....تضربينها بكف
ما هذا ؟
وتريدين فضحها عند الأهل وعند المحارم من الرجال مثل خالك ....
لالالالا لا تفعلي هذا مبدئيا ....
الرجل يكون رزينا لكنه في قضايا مثل هذه يصبح يرى الدم ولا يراها هي

أنت مرأة ولم تكوني حنونة عليها فكيف بالرجل

أختي فلا تستعجلي

عليك بأن تفتحي معها باب الحوار .. أن تفهمي كل نقطة من نقاط فاجعتها هذه التي فجعت بها
من حيث كيف تعرفت عليه ؟ ما الأسباب الذي أدت بها إلى السقوط في هذا المنحدر .. أانت مرأة وأنت أقدر على معرفة مشاعرها هل هي مجرد نزوة ..أم عشق فعلا ... أم ملأ فراغ ....هل معصية ... أو شيء آخر
ثم عليك بمعالجة الأسباب التي أدت بها إلى ذلك
وبيني لها كيف أصبحت تعلّم أختها الصغيرة الأخلاق الفاسدة من حيث لا تدري إذ هي قدوة لها ....

أختي لا تتعاملي مع المشكل في بيتكم من حيث أنه مشكل عظيم لكن تعاملي معه من حيث أن أختك تحتاج الشفقة لأنها تورط نفسها فيما لا يليق شرعا ولا عقلا ولا خلقا

مع أنك أيضا أولى أن تضربي نفسك أنت بكف.. تعرفين لماذا.....

لأنك كنت غائبة عن أختك طيلة هذه المدة .... ولا يوجد بينكما أخوة حقيقية حتى تفهمي أختك وتعلمي ما الذي يحدث لها من مشاكل
لو كنت أختا حقيقية لها كانت استأمنتك على سرها في أول يوم

سامحيني أن ألومك أنت في هذا ....

فعليك أن تبني جسور الثقة بينكما ... وإذا عاملتها بهذه المعاملة ستتحولين إلى عدوة لها تخافك وتخاف أن تعرفي أي شيء عنها وستتكرر أخطاؤها في المستقبل حتى وإن نجت من هذا الخطأ

حسسيها أنك قريبة منها وأنك تحبين لها الخير وحين تدرك ذلك ستتقبل نصائحك

وقد جاء في الحديث : ( لا تعينوا الشيطان على أخيكم )

فكوني عونا لها لا عليها يا أختي
وبيني لها ما معنى أن تكون سببا في هدم أسرة وأن الهذا الرجل لا يستحق أن تفكر فيه لأنه سيرمي الأولى من أجلها ثم يأتي يوم ويرميها هي الأخرى من أجل الثانية وهكذا ... فهميها أنواع الرجال وأن منهم من يحسب المرأة نعلا يلبسه في رجله ثم يرميه ويأتي بآخر وعليها أن تكون حذرة وان لا تجعل نفسها نعلا وقد كرمها الله
والأيام دول ... وليس كتقوى الله زادا يحمينا من غائلة الأيام ودورانها

وحين تستنفذين كل الطرق في إصلاحها وتستيئسين.. هناك فقط الجئي إلى شخص ثالث
وعليك بتهدئته هو الآخر حتى لا يكون شديدا عليها ويتصرف تصرفات مشينة تعود عليها بالضرر
عليك بتعلم الصبر والحكمة والتعقل في حل مثل هذه المشاكل ولا تنسي الرحمة يا أختي فارحمي من وقع في مثل هذه الأمور يرحمك الله ويحمك مما وقعوا فيه


أسأل الله أن يعينك وأن يبصر أختك بالحق


قلبي معك

[الحطاب سهام]

بلعقل اختي برك بلعقل ......اولا اختي اجمعي قواك وشهدي واستغفري وروحي عند اختك سلمي عليها وحضنيها
ثانيا اهدري معاها غير بشويا واقعدي تشكري فيها وانها تستاهل سيد الرجال ماشي واحد متزوج
ثالثا فهميها وقوليلها ....يا الي تحوسي تضيعي عمرك وتبهدلي روحك الراجل راو يحب مرته والدليل راح رحلة معاها
الراجل الي كي شافكحب بكل سهولة يطلق القديمة هذا ثعبان كي يلقا وحدا خير منك يضحي بيك بكل سهولة
الانسان كي نحي حاجة لواحد ويديها بسيف من عند انسان اخر صدقيني والله مايفرح بيها ولا يتهنا بيها
قولي لاختك تحط روحها في بلاصة الزوجة المسكينة الي رايحا تخربلها دارها وحياتها
اوقفي مع اختك ماتخليهاش وحدها عاونيها تقطع الاتصال نهائيا معاه هو يتمسخر بيها قاع النهار وفي المساء يروح عند مرتو الي مخبيها في الدار يدللها ويقلشها ويلعب ببنات الناس
اذا شفتيها كبرت راسها امالا خبري خالك يهدر معاه واذا اضطر يهدده ...ولكن انا اعارض انك تخبري الاب او الاخ خاصة اذا كان دمهم حامي لالا حاولي تحلي المشكل بلا ما تخلي والدك يغير نظرته لاختك الخال ان شاء الله رايح يحل المشكل
وصراحة اختي الحل راو في يد اختك لازم هي تقتنع وتحبس هذي العلاقة لانكم حتى ولوبلعتو عليها الباب ومنعتوها من الخروج رايحا تعمل الف طريقة باه توصله ...والراجل ماخاصر والو ....مطفرا في البنت

والي غاضني اكثر هو اقحامكم للبنت الصغرى في مغامرات كهذه ....والله يا للاسف

[imene12]

لا حول و لا قوة الا بالله
اختي اطلبي من خالك الذهاب إلى هذا الرجل و التكلم معه

[abdel02]

أنا ضد الضرب والفضح...مادامك صديقات قبل ماتكونو خواتات...أنصحيها...قولها تدير روحها مكان زوجة هذا الرجل...قوليلها أن الشيطان يقرب من يفرق بين الرجل وزوجته...فكريها انها مازالها صغيرة وسيبدلها الله زوجا خيرا منه ان هي اتقته...خليها تحتفظ بعواطفها لزوجها الذي يعلن رغبته في الزواج منها امام الناس...ليس من يتبادل معها الرسائل من تحت لتحت...ذكريها فان الشيطان يجري من الانسان مجرى الدم...ذكريها بسير الصحابيات الجليلات اللائي كن حين يمشين لا يعرف الرجل انكانت المارة زوجته أم زوجة فلان...

[z.abdo]

المشاركة الأصلية كتبت بواسطة مشكلتي

السلام عليكم ورحمة الله تعالى وبركاته
المشكلة هي اختي التي اكبرها بسنتين اي انا عمري 24 سنة وهي 22 سنة
انا وهي كصديقتين اكثر من اننا اختين تصارحني بما يخالجها وانا نفس الشيء
المهم
لاحظت على اختي من فترة وجيزة ان حالها مقلوب اي انها كثيرة التفكير شاردة الذهن تغيب مرات عن الجامعة هدا ما جعلني اقلق يعني خفت عليها تكون مريضة خصوصا خفت عليها من خويا لي بدا يشك وكل مرة يطل فيها يقولها مراكيش نورمال
وكنت نلاحظ ختي الصغيرة لي في عمرها 10 سنوات دايما معاها وختي الصغيرة كي تكون خارجة تخرج معاها ورقة صغيرة كي نسقسيها تقولي سهام بعتتني لصحبتها عادي مديتهاش فيها قلت في نفسي بلاك المهم نهار رحت نسجل فلجامعة هي كانت مريضة من كرشها مرض شخصي قاتلي هاكي سجليني معاك كي وصلت للجامعة تلاقيت بلبنات صحباتها سلمت عليهم وقلت لصحبتها مالكي انتي وختي سهام الرسائل يظلو داخلين خارجين بيناتكم هاو هدرو في البورطابل صحبتها قاتلي لا مكاش منها هادي انا حرت وجبتها على طرف قلتلها فهميني ودوك بدات تتهرب استعملت معاها اسلوب تصغار العقل على سعدي قلتلها اممممم راها حاكيتلي وش هو حبيت نعرف وشبيها برك ايا قاتلي بلي الراجل لي تبغيه دا مرتو وراحو عطلة انا انصدمت قلتلها وشنو ؟ قاتلي ايه انا دخت كلي طاحت عليا بلوكا ثلج بارد رحت لدار لقيتها مريحة بلا منفيق ضربتها بكف وقلتلها متحشميش ايا ناضت بدات تبكي وتسب فيا قاتلي ماما وشبيك يا طفلة هبلتي؟ حكمت ختي الصغيرة تاني خوفتها حتى قاتلي بلي الرسائل كنت نمدهم لواحد راه يجي هنا انا هبلت وهي بدات تقولي نحبو ايه ملقيتش وش ندير قلت لماما ماما انبتها بصح منضعرتش قعدت معاها قتلها انا ختك ونبغيك كن يسمع خوك صح خويا صغير بصح مبرهش ايا هزتلي كتافها انا رحت لهداك الراجل وراتهوني ختي الصغيرة يخدم في حانوت ايا بخصت بيه بصح هدرت معاه قالي بلي ايه نبغيها ونهارات نجي نخطبها ونطلق مرتي ياويلي نخلعت اختي دمرت عائلة محبيتش نقول لماما عندها الظغط والله راني نفكر نقول لخالي ايه خالي انسان رزين وتاني قدي في العمر وانسان متفهم وكنت نقصدو دايما غير هو
دروك راني حابة نصيحتكم كي ندير؟ ربي يخليكم

اخبري خالك هو يتصرف