عقدة حياتي

[مشكلتي]

قد تبدو مشكلتي للبعض بسيطة إلا أنني أتعذب منها
حين كنت أدرس بالصف الثالث متوسط كنت تلميذة ممتازة و معدلي لا يقل عن 18 هذا ما دفع بأستاذتي - سامحها الله - بأن تجلسني مع أسوأ التلاميذ أملا في أن يتحسن مستواهم و يقتدو بي
كانت تجلس ورائي فتاة قمة في الوقاحة - حشاكم - و كانت ما تقراش خلاااااااص تجيب معاها الكاوكاو و تبقى توكل و مبعد كي تكمل تولي تصدر وحد الأصوااااات بأسنانها مزعججججججة جدا باش تتخلص من بقايا الطعام في أسنانها
( آسفة و لكن علي نقل معاناتي )
تصورو اننا نقراو من 8 إلى 12 و من 14 للـ 17 نعديها كاملة و أنا نسمع في هذاك الصوت :'( و كي فاقت بللي ما نحملش تعمدت تكثر باش غير تغيضني ... عام كامل و أنا متحملة لدرجة أني وليت نحب نطلع للسبورة و نكتب في مكان الأساتذة غير باش ما نبقاش نسمع في هداك الصوت و كي قلت للأستاذة قتلي مستحيل أنتي الأمل في صلاحهم ابقاي برك
هي ما نجحتش في قرايتها و تزوجت صغيرة خلاص و أنا بقاتلي هاد العقدة في حياتي
صدقوووني و الله و الله و الله أحيانا نتمنى أني خلقت ما نسمعش و مبعد نستغفر ربي و نقول الحمد لله على هادي النعمة
درك أبي بعد كل وجبة يعملها لأنو مركب طقم و يا ريت بعد كل وجبة يكون يدور يدور في الدار يهز طرف gاطو ( خصوصا هاد الايام تع العيد ) يوكلو و يبدا .... قتلو يا ابي راني ما نحملش و عندي عقدة منها و الله تجيني البكية و لحمي كااامل يشوك كي نسمعها الله غالب يقوللي راني ما نفيقش بروحي
درك ولليت نخاف كي نشوفو يوكل و أول حاجة نديرها نحط الكيت في ودني و نسمع قرآن و أحيانا أغاني
نركب في حافلة ولا .. الشباب و الناس الكل يعملوها تقول نطيش روحي من الطاقة نولي نحط صوابعي في ودني و ما نسمع واااااااااااااالو

في الباك كنت متخوفة منها خلاص و قلت لوكان يحرس علي أستاذ(ة) يعملها راني نخللي الورقة و نخرج و حبيت ندي stop bruit و لاكن نسيت
نهار الرياضيات تقول حسيت ... كنت محضرة جيدا و معولة على 20 أنا قلت بسم الله راح نبدا و الاستاذ بدا يعمل فيها و المشكلة أني نسمعها على بعد كيلومتر و حساسة جدا ليها تقول نعس الناس باش يديروها و نقلق مبعد
ما قدرتش نقوللو حشمت منو ( أنا طبعي حشامة بزاف ) و السوجي كان ساااااهل ... نكتب و نبكي
تصورو واحد يحل في المات اللي لازمها تركيز كبير و في باك قافلة ودني بكتفي الأسمن و نكتب جاني قاللي واش بيك يا بنتي ( شافني نتحرك و مقلقة حط بالاك حاجة أخرى ) قتلو وااالو
عدا الوقت كامل و أنا نبكي و هو جاب كرسي قدامي باش زعما يونسني و ينحي عليا الخوف و بدا يدير فيها
حتان عن غير قصد ضربت الطابلة و خزرت معاه و قتلو ربي يخلليك يزيييييييييييي ( توقف !!!! )
المهم ديت 14.5 في المات و هي اللي طيحتلي المعدل تيعي لـ 15 فاصل
أنا كنت حابة طب و كون نقللكم واش بعثوني تموتو عليا بالضحك : طب أسنان - عقدتي في الحياة - و درك راني معولة ان شاء الله نداوي الناس الكل باطل غير باش نقضي على هاد الآفة ( الصوت المزعج ) اللي حطملي حياتي
و الله راني متعذبة و راني نكتب معاكم و الكيت في ودني و حتى خاوتي الصغار كي نتعارك معاهم يبداو يديروها باش يقلقوني
راني قريب نمرض بودني تالمون ديما حاطة موسيقى أو قرآن فيها باش ما نسمعهاش
و الله ما راني نبالغ حاولت نعالج روحي حاولت نحي العقدة لكن مستحييييييييييل ما نحملهااااااش و ربي يسامحها هاديك الطفلة اللي كانت سبب فيها
قولولي درك . هل أنا محتاجة لطبيب نفسي ؟ كيف اتخلص منها ؟