مساعدة يا فنانات الكروشي من فضلكن

-رودينا- · 2012-06-20, 09:31

السلام عليكم ورحمة الله وبركاته
حبيت تساعدوني يا اهل فن الكروشي في اختيار نوع الخيط اي النوعية الجيدة قالولي خيط الاصلي هو المليح
مول الحانوت قالي ساعات يكون مليح وساعات لالا
والله غير حبيت نساعد وحد الاخت باش تخدم الكروشى حبت تخدم لي زابليك وحدات كروشي باش تخدم بيه كوفرولي قلتلها نسقسيلك ونرجعلك بالخبر اومالقيت غير هذا المنتدي لي موالفين نتعاونو فيه
وحبيت نعرف رقم السنارة لي يتخدم بيها ويوالم الخيط
وبوبينة خيط شحال تخرج من وحدة
وجزاكم الله كل خير

انا في انتظاركم

هاجر المسلمة · 2012-06-20, 12:54

كيفك صحراوية
حسب تجربتي الخيط القطني الي في النيلون احسن من القطن الصافي
والسنارة على حسب الكوطو الي تشريه كاين الرقيق وكاين الخشين وكل ما كان الكوطو رقيق لازم سنارة رقيقة
اما الخيط او الكوطو كنت زمان نخدم بتاع المحقن والان تاع الكبة لكبيرة تدير عشرة لاف راه هايل ومتوفر بالالوان وبالحجم رقيق وغليظ
اما الكمية تكون حسب لبياسة كبيرة او صغيرة وغرزتها تدي الخيط او شوية برك وتاني شحال من بياسة راح تعملي ممكن تجربي وحدة وتشوفي
وانتظري الاخوات يمكن يفيدوك اكثر هدرت على تجربتي وكل اخت ورايها

-رودينا- · 2012-06-20, 14:50

اقتباس:

المشاركة الأصلية كتبت بواسطة هاجر المسلمة

كيفك صحراوية
حسب تجربتي الخيط القطني الي في النيلون احسن من القطن الصافي
والسنارة على حسب الكوطو الي تشريه كاين الرقيق وكاين الخشين وكل ما كان الكوطو رقيق لازم سنارة رقيقة
اما الخيط او الكوطو كنت زمان نخدم بتاع المحقن والان تاع الكبة لكبيرة تدير عشرة لاف راه هايل ومتوفر بالالوان وبالحجم رقيق وغليظ
اما الكمية تكون حسب لبياسة كبيرة او صغيرة وغرزتها تدي الخيط او شوية برك وتاني شحال من بياسة راح تعملي ممكن تجربي وحدة وتشوفي
وانتظري الاخوات يمكن يفيدوك اكثر هدرت على تجربتي وكل اخت ورايها

شرفتيني عزيزتي هاجر كيفك لاباس واش راهم الاولاد
الخيط لي شفتو اسمه الاصلي يتباع 270 دج انا منعرفش الكروشي وحدة وصاتني وحبيت نفيدها
انت تقصدي كوطو بارلي لالالا هذا خيط الاصلي يجي محقن بوبينا كبيرة
مشكورة جدا على الافادة ربي يجزيك كل خير ويفرح بعمرك وولادك امين

-رودينا- · 2012-06-20, 15:51

45 مشاهد و رد واحد متحبوش تعملو الخير وعلاه بصح مشكورين

قمر الخلق · 2012-06-20, 19:56

السلام عليكم
ختيتي أنا نحب بزاف ندير الخير ههه
أم الخيط أخدمي بخيط الأصلي أحسن رقم 16 وخيري اللي مكتوب فيه بوقاعة يعني مصنوع هنا في الجزائر هو الأحسن وزيد شوفي اللي يكون اللون نتاعو أبيض ناصع هداك هو المخير وبالنسبة للكمية أنا راني نخدم في واحد ليا شريت 4 كبات يديرولي الكوفروي وزيد التلايق والنابخوات والكرشي قويلها تخدم برقم 21 او رقم 22 تجي الخدمة بيهم متحوفة بزاف
ان شاء الله نكون عاونتك

عايدة عربية · 2012-06-20, 21:45

صح عندها لحق قمر الخلق أنا ختانك خدمت لنابرو بهذا الخيط و بالكروشي 22 ايجي هبال تقدري تضربي طلة على المواضيع انتوعي.

-رودينا- · 2012-06-21, 10:03

اقتباس:

المشاركة الأصلية كتبت بواسطة قمر الخلق

السلام عليكم
ختيتي أنا نحب بزاف ندير الخير ههه
أم الخيط أخدمي بخيط الأصلي أحسن رقم 16 وخيري اللي مكتوب فيه بوقاعة يعني مصنوع هنا في الجزائر هو الأحسن وزيد شوفي اللي يكون اللون نتاعو أبيض ناصع هداك هو المخير وبالنسبة للكمية أنا راني نخدم في واحد ليا شريت 4 كبات يديرولي الكوفروي وزيد التلايق والنابخوات والكرشي قويلها تخدم برقم 21 او رقم 22 تجي الخدمة بيهم متحوفة بزاف
ان شاء الله نكون عاونتك

ربي خليك حبيبتي قمر على الرد الوافي والكافي وجزاك الله كل خير ربي يعطيك ماتتمناي ان شاء الله
شفت مول الحانوت صبت عندو زوج خيوط الاصلي واحد الورقة ديالو حمراء وحدة اورونج علابيها تخلطلي الامر اليوم نشوف لي قولتيلي عليه
مشكورة حبيبتي ربي ينورك

-رودينا- · 2012-06-21, 10:05

اقتباس:

المشاركة الأصلية كتبت بواسطة عايدة عربية

صح عندها لحق قمر الخلق أنا ختانك خدمت لنابرو بهذا الخيط و بالكروشي 22 ايجي هبال تقدري تضربي طلة على المواضيع انتوعي.

جزاك الله كل خير حبيبتي عايدة ربي يوفقك في مبتغاك ان شاء الله اعمالك متحوفة ومتقونة تبارك الرحمان

قمر الخلق · 2012-06-23, 21:08

لا شكر على واجب أختي حراوية نزيدلك نصيحة الخيط الجزائري المليح يكون ملفوف على أسطوانة صفرا والخيط تع الصين تكون الاسطوانة نتاعو بيضا حطي بالك وشوفي اللي ابيض زيادة كيما قلتلك