اعترافات على ضفاف الحياة - الصفحة 8

ميمنة الجزائر · 2014-07-13, 15:54

يييييييييي يا حياتي كلها امل والله خلعتيني كي لقيت روحي هنا بينكم وشكرا على دعوتك حبيبتي

وان شاء الله لي عودة على حياتي الزوجية واضنها غير مشاكل وحلول

ميمنة الجزائر · 2014-07-13, 16:06

السلام عليكم ورحمة الله وبركاته وصح رمضانكم للجميع

زواجي كان تقليدي لابعد حد تتصوروه مع انو عندي شهادة مهندسة معماري وكنت نخدم لكن كنت ااؤمن انو الزواج هو بيد ربي

ماشي معنتها انو منيش خلوقة ولا منيش شابة العكس لكن كنت نقول انو الواحدة لازم تحترم باباها ووالديها لانو مهما كانت درجة الحرية للمراة الا انو تخلي في ذهنها انها كلما تخرج راهي بنت فلان وسمعتو لازم تكون 10 على 10 واخر مرة كنت مع بنت عمي لقيتها مع الشخص اللي رايحة تتزوج بيه واسمحولي على ذكر هذه الحادثة لانو من بعدها مابا اسبوع ولا اكثر تخطبت هي لقيتها مع زوجها الحالي لكن مكانش حتى خاطبها قلتلها عيب عليك انك تتتلاقاي بيه في الشارع اللي يحوس عليك يجيك طول من الباب قالتلي رانا في الالفية الثانية يعني شغل انا عقلية قديمة قلتلها معليش انا عندي عقلية انو نهزها من عهد الرسول عليه افضل الصلاة والسلام وش نقولكم انو زوجي نهار الخطبة جاوني جيرانا نهار اختو وبنت جيرارنا لانو هي بنت خالتو ايضا جاوني وانا كنت في حالة منيش مليحة لضروفف المهم هي جات تخطب وانا قاعدة نهدرلها على حاجة اخرى وكي قالتلي على الخطبة عقبتها عادي شغل مكان والو لكن هي اصرت وقلتلها معليش المهم يومين تخطبت ومتقوليلش كيفاه في يومين لانو يوم جا هو للغدوة تفاهم مع بابا على الشرط بعد يويمن دار الخطبة الرسمية والفاتحة اللي هي الزواج خلاص يعني بعد سمانة لقيت روحي مربوطة مع انو كنت اكثر وحدة تكره الزواج لكن معرفتش كيفاه حتى قلت نعم شغل كنت ممغنطة بعدين بديت نفيق هههههههههههه ومن هذيك وانا زوجة مع زوجي رانا في قريب 11 عام زواج زوجي معاه المرة والحلوة اللي يشوفنا يقولك هذو عام ميكملوهش عندي من الزواج طفل واحد ربي يحفظولي المهم مهما كان المشاكل الزوجية رانا نتخطاوها وكل عام يخرجلي مشكل لكن معليش المهم 5 سنوات الاولى كنا نعمرو ودرنا بيت والحمد الله بالسيف بعدين مقدرتش على التعب برا وليت استسلمت للبيت والحمد الله المهم نكونو هانين واللقمة تجينا والزواج محن ومنح ساعة تكوني مليحة فيها وساعات تكرهي النهار اللي زدتي فيه لكن الحمد الله نعمة الزواج ربي يدومها ويهنيا يارب انا زوجي وابني ربي يحفظولي اللي هو عمري واحلى حاجة خرجت بيها من الزواج كااامل والحمد الله

نسائم الصباح · 2014-07-15, 12:29

السلام عليكم .بسم الله ما شاء الله موضوع رائع راني متأخرة في رؤيته
شكرا لي صاحبة الموضوع وللمشتركين والشكر الخاص للغالية ميمنة الجزائر لي دعاتني لهذا الموضوع .ربي ما يحرمني منك ولا من كل الأخوات
تجربتي في الحياة الزوجية .كانت صعبة جدا .يعني الشيئ لي تخيلت أو توقعته .خرج عكس تصورات .مع أني كنت نتوقع غير الأسوء بش ماننصدمش مع الواقع .والسبب لي كان يخليني نتوقع الأسوء .الناس لي كانوا محيطين بي .كل وحدة تشكي وتبكي من المشاكل الزوجية وغير لي تقولي ماتتزوجيش .بصح أنا كنت حبه نجرب هذا الزواج لكل المحيط مخلوع منه .(أموت في التحدي ) وكنت حبه نبرهنلهم أن نظرتهم خاطئة جدا وكنت نقلهم أنتم لي متعرفوش تتعاملوا وأصبحت نعطلهم نصائح ومحضرات في كيفية التعامل
وأكثر نصيحة نصحتهالي أمي قاتلي .يابنت الزوج ماترخفيش روحك معاه بزاف .خلي عندك كلمه وشخصية .قتلها لالا أمي أنا نمشي كيما قال ربي السمع والطاعة في كل شيئ غير في معصية .كنت ضنه أنوا إخوا هذا الزمن صحابه
بعدين إكتشفة أن زمن الصحابه والصحابيات وله وأكل الظهر عليه وشرب
كنت بين مد وجزر في حياتي .نخرج من مشكل نطيح في الأخر .ونحمد ربي الذى أمدني بسلاح الصير .لي ماتقدر تخدموا أي دولة .وسلاح القناعة وسلاح التنازل وسلاح التسامح وعدم الحقد .بهذه الأسلحة ستجتازين سيدتي كل أمواج وأعصير الحياة الزوجية
والحياة الزوجية في نظري مثل الطائرة .يقلعوا بيها طيارين معا .وأحيانا يسوق واحد إذا عيا ينوب عليه الثاني .وإذا شافوا الطائرة تمشي في مسارها الصحيح وبدون مشاكل .يقدروا يرتاحوا في ثنين .
ولاكن نفترض أن الطيارين مش متفاهمين وحد يسوق للفوق وواحد يسوق لتحث .وش يحصل .أكيد الطائرة تبدآ تتأرجح وممكن تسقط لو كان ما يتفهموش .والركاب بي مثابة الأولاد .إذا كنت الطائرة تمشي في هدوء وسكيه .الركاب ريحين يرتاحوا ويستمتعون بالرحلة .وإذا مشات بتدهور .الركاب ريحين يعيشوا في رعب
أما إذا كانوا الطيارين متفاهمين .وجاتهم ضروف خارجية مثل الأعصير .أكيد ريحين يجتهدوا ويعملوا المستحيل بش يخلوا الطائرة متوازنة مع هول الأعصير
وإذا ما كنوش متفهمين الطائرة بالتأكيد ريحة طيح في جوا الأعصير.والركاب أول المتضررين
هذا تعريف بسيط للحياة الزوجية والله يسعد كل أخت وأخ في حياتها الزوجية وماتشوفوا مكروه

شكرا مرة أخرة حبيبتي ميمينة الجزائر

قلولي معليش الدعوة تكون لي رجل .حبه نشوف تجارب الرجال وش يقولوا

أم أماني أريج · 2014-07-15, 14:37

يعطيك الصحة اختي نسائم الصباح على اعترافك و و التشبيه البليغ لي عملتيه على الحياة الزوجية هههههه شبهتي و قربتي مفهوم الحياة الزوجية مليح ............الله يعطيك واش تتمناي
ربي يخلي طيارتك ترفرف بعيد في الجو بكل توازن و يخلي ركابها يستمتعو بأحلى رحلة و يخلي الطيارين تاوعها في أحسن توافق و اسجام ...........آمين .........
اكيد تقدري توجهي الدعوة لأحد الاخوة من الرجال و هذا كا ن مطلب من عدة اخوات حتى نتعرف على تجارب اخواننا من الرجال و نظرتهم حول حياتهم الزوجية لكن بشرط انك تختارينه انت و توجهيلو الدعوة ...........نحن في الانتظار