فهموني واش معناها راجل؟

[abdoulay]

يا اختاه اصبري فرضي ربك افضل وان الله لم يخلق الناس جميعا متشابهين خاصىة الرجل فهو معروف بعناده وقسوته وانانيته لكن ليس لدرجة ان يفرق بين اولاده انت ما عليك سوى ان تدعي ربك ان يهديه هو وجميع المؤمنين
ربي يفرج عليك ان شاء الله تقربي الى الله تعالى واصبري فان بعد العسر يسرا

[dr-7ooda]

حاولي ان تسايسي الرجل

[pauvre]

المشاركة الأصلية كتبت بواسطة مشكلتي

السلام عليكم و رحمة الله تعالى و بركاته

حبيت نفهم واش معناها كلمة راجل؟
من الصغر و هما يفهموني الراجل اللي يوقف معاك الراجل اللي ما تخافيش منو الراجل اللي يحسسك بالامان الراجل اللي كما تسحقيه تنقايه الراجل اللي يفرحك حتى لو يصراو المشاكل يرجع يفرحك
الراجل اللي يحمي ظهرك ماشي هو اللي يجيب الموس في ظهرك
و الراجل و الراجل
و لكن حياتي كامل و انا نشوف الراجل العكس واش راهم يفهموني
من بابا لخويا لجدي لخالي لعمي لولد عمي لولد خالي
خصوصا بابا دار فيا اللي عدوي ما يديروش
المنكر اللي دارو فيا بابا ربي اللي عالم بيه
و زيد يعمر في خواتي و خواتاتي عليا باش يكرهوني
و ربي عالم مش عارفة واش ديرتلو
راهي من الصغر و هو يكرهني
و كامل العايلة عارفة و لاواحد وقف معايا و صبرني
كامل يتفرجو و فارحانين مش عارفة ذنبي
يكذب عليا و يعلمني في الغالط
و كما نحتاجو و لا مرة نقيتو معايا و لامرة نقيتو واقف معايا
يقولوي اصبري تكبري و تتزوجي براجل صالح راكي مليحة
اللي تزوجت بيه حطلي الموس في ظهري و كمل عليا
شوي اللي كنت واقفة بيهم هو كمل عليا و خلاني في الارض و بقى يتفرج
اللي شوفتو من الرجالة ربي اللي عالم
راني حتى ما نخافش الرجالة
نسمع نساء بزاف يقولو الراجل واعر و نساء يخافو من الراجل
لكن انا لالا ما نخافش منهم و قادرة نديرلهم اكثر من واش دارولي
كانه تعودت على المنكر تاع الراجل تعودت على الشر و عرفت العقلية مليح
راجلي ذروك راه في مشكل كبير و صعيب و مش راحمني معاه
و انا مش حابة نزيد عليه راني صابرة معاه و نصبر فيه
و عارف راني نعاني كما العادة الراجل و انانيته دايما انا انا انا
مش عارف قيمتي
راني قادرة نجرحو و نكسرو كبريائو كما طعني في ظهري لكن مش قادرة
كامل يقولولي اهله اللي يعرفوه اصبري معاه تفوت الازمة برك راه مقلق و راه ممكن يدير حاجة في روحو و انا حابة نبطل تعبت
مش قادرة حتى نفكر في الخيانة لاني نخاف و نفسي لوامة
راني في 3 سنين و دمعتي مانشفتش
مش عارفة متى المشكل يتحل حتى نقول اللي في قلبي
حابة نرتاح راهي النار شاعلة في قلبي
حابة نقولو كل شيء حابة نحكيلو كل شيء
حابة يعرف اني مش خايفة منو
يعرف اني مش حابة نكون وحدي لكن نقدر نكون وحدي
اللي راني فيه فوق طاقتي مش قادرة خلاص
و الله فوق طاقتي
لاه مش حقي نتحب؟ مش حقي كلمة حلوة؟ مش حقي الحنانة؟
لاه انا اللي نصبر؟ حابة نهرب لمكان ما يعرفني فيه حتى واحد
ننسى كل شيء
لاه فهموني الراجل اللي يكون معايا راجل مش عليا راجل
دايما خايفة من الموس في ظهري و كل مرة يجيني الموس في ظهري
حابة نحس عندي راجل نقدر نعتمد عليه في الدنيا
راهي الدنيا و الناس عليا و انا وحدي
دايما وحدي حتى ماما محقورة
تعبت فوق طاقتي
راني هازة فوق طاقتي و مش عارفة لاه؟
واشي هو المقابل؟
فهموني واش معناها راجل؟
مش عارفة فاهمني او لالا راهي دموعي سيقتني و غلبتني

الراجل في زمن السلم يهرب من المشاكل و يبعد عن البلاء ما يحقرش الناس ما يظلمش الناس ما يضربش الضعيف ما ياكلش دراهم الناس ما يسرقش الناس ما يضربش الشيتة و يخدم ما يطلبش الناس و في زمن الحرب تجده في الصفوف الاولى يقاتل المحتل

[رَكان]

السلام عليكم
1ــ اجابة عن سؤالك ..
نسمع كلمة راجل متداولة كثيرا وخاصة في المواقف الحرجة ..راجل لاتعني أبدا عمر ..سليم ...سفيان ..طاهر ...حميد...
ليكن أي اسم سيفي بالغرض لشخص نبيل .صاحب مروءة عندو النيف وخاطي حقار .وصبور ولايتسرع في الحكم على الآخرين ..ويؤثر غيره من القريبين منه على نفسه ويتحمل بدلا عنهم الأثقال والأوجاع ...لكن ...خذي لك مئة ألف من الذكور فهل ستجدين منهم راجل كيم تقولي ؟؟؟
2 ــ رسمت لنا مشهدا فيه ضحية وحيده وهي أنت ..أما غيرك فجلادون ..كلهم ..قد تكونين فعلا مظلومة لسبب على القل أنك من النوع الذي يرفض أن يكون ضعيفا أو ضحية .ولو في صغائر الأمور ..تحتجين تتمردين عن واقع ربما سيئ تقبل به غيرك من النساء في مجتمعنا المحافظ قد يكون ذلك فلست المسؤولة عنه فأنت خلقك ربك هكذا بهذه التركيبة ..ربي يلطف بيك ..أو يكون غير ذلك قد تكونين ممن يريد أن تستقيم له كل شؤون حياته بما يشتهي وعلى المحو الذي يريد وإلا فالثورة على الجميع .تشعلينها ..
الله عليم يحالك ولايمكن لأي كان أن يحكم عليك بشيء ...لكن ..هناك تلميحات بين أسطر مضوعك صراحة مخيفة ..إحذري يا سيدة احذري أن تنجرفي ..إحذري أن تنجرفي الى مسار ...مجرد وضع قدميك عليه تكونين قد بصمت بالعشرة أنه لاطريق من ورائه للعودة ..كثيرات فعلن ذلك وندمن وهيهات لم ينفعهن ندمهن وقضين بقية حياتهن حسرة وألما ودموع ...أسأل ربي لك اللطف ..

[أسيل 0022]

و الله لي صديقة ما يفعله والدها فيها لا يفعله اليهودي بمسلم
لذا لا أستغرب بتاتا قصة صاحبة الموضوع . ليس انحيازا لبني جنسي لكن ينبغي ان لا نتهم الفتاه بالكذب و لا نعرف عنها شيئاا

أول شئ أحييك لوقوفك المستمر ضد من يعتبرن انفسهم رجالا
فالمراة أقوى مما تبدو
لا تتوقعي سندا من الرجال . استعيني برب العالمين سبحانه و بالثلث الاخير و ادعي فيه ربك بقلب مكسور جريح و اشكي إليه همومك فوالذي خلق السماوات الارض ستتغير حياتك وهم سيتغيرون
ابقي صامدة