تكريم الفائزات في الدورة الرابعة للرقي لمدبرة منزل مثالية

[meriem hanin]

الف الف الف مبرووك للجميع ان شاء الله ربي يقدركم اجمعين على فعل الخير
انا عضو جديد ما عنديش meme pas شهر واحد اتمنى كاش وحدة فيكم تشرحلي بالتفصيييل لااشتراك في الدورة مع روابط الدورات الاولى الثانية و الثالثة
جزاكن الله كل خير و الف شكر للاخت حبيبة

[محــــــ النقاب بــــة]

هنيئا للفائزات.... : )

بارك الله في القائمات على الدورة الطيبة...

[حبييبة]

المشاركة الأصلية كتبت بواسطة meriem hanin

الف الف الف مبرووك للجميع ان شاء الله ربي يقدركم اجمعين على فعل الخير
انا عضو جديد ما عنديش meme pas شهر واحد اتمنى كاش وحدة فيكم تشرحلي بالتفصيييل لااشتراك في الدورة مع روابط الدورات الاولى الثانية و الثالثة
جزاكن الله كل خير و الف شكر للاخت حبيبة

اهلا بالحبيبة مريم
الله يبارك فيك حبيبتي
و لعقوبة ليك و لكل البنات اللي حابين يشاركوا و يرتقوا لأحسن المقامات
في كل المجالات في حياتهم
درك نفهمك حبيبتي

بالنسبة لكيفية المشاركة:




بسم الله

رايحة نفهمكم حبيباتي كيفاش
رايحين تشاركوا في الدورة
بإذن الله

هاذ الدورة خاصة بربات البيوت
اللي قاعدين فالدار و حاملين فوق أكتافهم
مسؤولية الزوج و البيت و المصروف
و الاولاد و تدريسهم
و حسن تربيتهم و الاهتمام بعلاقتهم مع الله و الزوج و الاهل
و الاهتمام بنفوسهم
في نفس الوقت
يعني
حاملين عدة مسؤوليات في آن واحد
و مغبونين كيفاش يوفقوا بين كل أمورهم اليومية
و يقسموا وقتهم بين أشغالهم و كيفاش يعطوا لكل مسؤولية حقها

إذا من خلال هاذ الدورة رايحين يتعلموا البنات
كيفاش ينظموا وقتهم و يقسموا أعمالهم فالدار

و يتحملوا مسؤولياتهم و يكونوا في المستوى
و تاني يكون عندهم الفرصة باش يتهلوا شوية في رواحهم و يعلموا أسرتهم النظام و الانضباط

هاد الدورة عبارة عن برنامج للتنظيفات
حنا عامة كنا لما نحبوا انقوا الدار هاداك النقا الثقيل
نديروه كامل في نهار واحد
حتى قلبنا ينفسخ
و ظهرنا يعواج

علابيها ما نزيدوش نخدموا هاداك الشغل الثقيل حتى يفوت عام و احنا نأجلوا و نأجلوا
راهبين هاداك الشغل
و الحيطان يعاودوا يتوسخوا و باش نعاودوا انقوهم حتى ننهدوا نحكوا مرة و زوج و ثلاثة
و الإيدام ما يحبش يطير
و يجينا إكتئاب نحسوا كلي ماخدمنا ماوالوا
هاكدا ولالا؟
و الدار مانجوا انقوها حتى تعاود تتربل كلي ما نظفناها ماوالوا
هاكدا ولالا؟
و غيرها كثير من الامور اللي تواجهنا و تعيقنا باش دارنا تكون في أبهى حلة دائما و أبدا

نعم ممكن تكون دارنا جنة في أبهى حلة دائما و أبدا

لازمنا شوية إرادة، عزم
وحزم في اتخاذ القرارات
و التطبيق المنضبط
و المتزن

هاد البرنامج للتنظيفات رايح يشمل على التنظيفات
و كذلك الاهتمام بالجوانب الاخرى للمرأة
كاعتنائها بنفسها و علاقتها بربها ووو

لازم انظموا بيوتنا و نرتبوهم و انقوهم و نبنوا علاقتنا معا خالقنا وعلاقاتنا معا اسرتنا
و علاقتنا معا نفوسنا
هادا الاساس اللي رايحين نبنوه هاد الشهر
لأن نجاح الجوانب الاخرى
للمرأة مارايحش يتحقق إذا ما كانتش ظروف البيت تسمح بتحققه

رايحين في خلال هاذ الشهر ابتداءا من يوم السبت بإذن الله
ناخذوا كل غرفة من غرف البيت انقوها حاجة حاجة و مارايحين ننسوا حتى حاجة بإذن الله
بلاما نتعبوا ان شاء الله

بمعنى كل أسبوع ناخذوا غرفة
و كل يوم انقوا حاجة معينة في هاديك الغرفة
مثلا
الاسبوع الاول رايح يكون للمطبخ
اليوم الاول رايحين نقوموا بأعمال البرنامج اللي هي:

تنظيف سطح دولاب المطبخ + تنظيف الثلاجة تنظيف عميق والجدار اللي خلفها + تنظيف باقي جدران المطبخ + غسيل الملابس ان وجد مع غسل مناشف المطبخ
+
التنظيف اليومي اللي رايحة نقتارحه عليكم
و ان شاء الله أرجو أن يتوافق معا ظروفكم و وقتكم اللي هو
( تحضير الغذاء غسل أواني ترتيب كل الغرف غسل الحمام كنس مسح غبار مسح الأرضيات و تعطير)


و كل يوم في المساء رايحين تلقوا قائدة الدورة بإذن الله كاتبتلكم البرنامج نتاع يوم الغد
تكتبوه عندكم و تطبقوه في يوم الغد
و لما يكون عندكم الوقت تدخلوا للمنتدى و تكتبولنا تطبيقاتكم للبرنامج نتاع هاداك اليوم
باش نشوفوا درجة انضباطكم و حسن تدبيركم و ادارتكم للوقت
لأنه هادي هي النقاط اللي رايحين نبنوا عليها قرارنا
لإختيار الفائزات لهاذا الشهر بإذن الله

و أنا بدوري رايحة نقرا مشاركاتكم و تطبيقاتكم حرف
بحرف و نحاول نعطيكم نصائح و تعليمات تفيدكم أكثر بإذن الله باش تكونوا كل يوم أحسن ماليوم اللي فات

و الدورة رايحة تحتوي على فقرات
ترفيهية و تثقيفية و روحية
إن شاء الله تعجبكم
و تفيدكم

أرجو أنني قد وفقت في شرح فكرة الدورة و الهدف منها
و كيفية المشاركة فيها

و راني منزلة
دروس مرافقة للدورة
تتماشى مع البرنامج

هي دروس تنظيفية و تحتوي على
أفكار تنظيمية و ترتيبية
عبارة عن اجتهاد شخصي
جمعتها من هنا و هناك
و رتبتها حسب احتياجات
و ظروف
المرأة الجزائرية
أتمنى أن تكون مفيدة و معينة لكن يمكنكن الاطلاع عليها
على هذا الرابط

https://www.djelfa.info/vb/showthread.php?t=829184


ربي يوفقنا و يعينا


و هاذي روابط الدورات السابقة

هذا رابط الدورة الأولى
(كانت غير مبرمجة تكون دورة فالأول
من بعد ابداوا لبنات يطبقوا برنامجي الخاص فالبيت
و هكذا تحولت الى دورة)

https://www.djelfa.info/vb/showthread.php?t=782344

رابط الدورة الثانية

https://www.djelfa.info/vb/showthread.php?t=815759

رابط الدورة الثالثة

https://www.djelfa.info/vb/showthread.php?t=843061

ان شاء الله نكون أفدتك حبيبتي