الدورة الرابعة"الرقي لمدبرة منزل مثالية"

[حبييبة]

المشاركة الأصلية كتبت بواسطة انوسة07

و الله انا فرحت لما للقيت هذا البرنامج اعرف انني متاخرة لانني كنت تائهة بين محركات البحث الى ان هداني الله اليكم بعد ان ايست من ايجادكم عندي سؤال فقط هل يمكنك ان تدلينني على ما احسن به صحتي فانا اعاني من تعب شديد و تحافة ان رفعت شيئا اموت من التعب افيدني بنصحك

في قلوبنا قبل صفحاتنا حبيبتي انوسة
مرحبا بيك معانا
راكي بين احباباتك و اخواتاتك
ما راكي لا متأخرة لا والوا
إذا حابة تشاركي معانا في الدورة
من بعد حبيبتنا صابرينة رايحة تحط برنامج الغد بإذن الله
و البرنامج اللي فاتك نتاع الايام اللي سبقت
ممكن تكتبيه عندك
و تخدمي كل يوم حاجة فوق البرنامج اليومي
و عمل البرنامج نتاع هاداك اليوم
ما تكثريش باش تكملي خفيف
لالا
لازمك تتهلي في روحك خصوصا لما قلتي أنك تتعبي بسرعة

ننصحك بشرب الخميرة نتاع الخبز
أنا شخصيا راني نشربها الصباح باش نسمن خخخخ
ديري على راس الملعقة الصغيرة الخمارة + ملعقة عسل نحل + الماء في كاس
و خلطيهم و اشربيه على الريق
و استني قريب نصف ساعة و من بعد اشربي قهوتك
هذا فالاسبوع الأول
في الثاني ديري نصف مغرف صغير خمارة
و كلما يفوت اسبوع زيدي الكمية نتاع الخمارة
من الضروري تاكلي مليح الصباح معا القهوة
إذا كنتي تتقلشي كيفي ما تحبي ولا شي الصباح من غير القاطو (بوتي فور خخخ)
لالالالازمك تغيري العادة
و ننصحك تاكلي فرماج وبيض فايض أو إذا حبيتي
تخلطي شوية زبدة مع شوية مربى في صحن صغير
حتى يولي كي الكريمة
و تاكليه بالخبز مع القهوة
هادي الصبااااح بكري مع السابعة و النصف ولا الثامنة

عند الساعة العاشرة لازمك تاكلي مرة ثانية
لكن هاد المرة ممكن تاكلي القاطو مع القهوة
أو أي كيك يعجبك حبيبتي
أنا مرات نصنع بان كيك برقائق الشكلاطة
مخصصاته لهاد الوجبة

على 12 سا
افطري مليح
ماشي لازم تكثري الماكلة لالا
لازم تاكلي كل ما هو ضروري
يعني الفيتامينات
و بعدها كولي حلويات أو قاطو مقرمش

لعشية القهوة ضرورية
مع تارتين نتاع الخبز أو كيك


العشاء متأخر قبل النوم بقليل

هاد الريجيم أنا راني مطبقاته في حياتي اليومية
باش نسمن شوية

رايحة نفهمك حبيبتي
فائدة الخمارة
رايحة تعطيك القوة و لها فايدة كبيرة للجسم و الطاقة و الشعر و البشرة
و حتى نفسيا و تخليك ترقدي كالبيبي
و العسل تاني مفيد جدا مقوي للجسم
تاني ممكن تشري عقدة أساسياتها
عسل النحل + المكسرات
لأنها مفيدة جدا للجسم تاكليها على الريق مغرف صغيرة كل يوم
رايحة تعطيك الجهد

هذا من الناحية الجسدية

من الناحية النفسية
أو الدينية
لاعطائك القوة
ننصحك بالتسبيح كل يوم فالليل قبل النوم
كيما وصى النبي صلى الله عليه و سلم ابنته فاطمة رضي الله عنها
لما حست بالتعب و أنها ماشي قادرة على الشغل
و حبت تجيب خادمة تساعدها
وصاها ووصانا بالتسبيح قبل النوم
33 مرة سبحان الله
33 الحمد لله
34 مرة الله أكبر
و رايحة تشوفي المعجزات حبيبتي عن تجربة
و ادعيلي

ننصحك بالتسبيح الدائم و الاستغفار في سرك طيلة اليوم
إذا حسيتي بالتعب فجأة
ارتاحي مباشرة لمدة 5 دقائق
و ارجعي لعملك رايحة ترجعي بكل طاقتك
و كل حيويتك و نشاطك

الصلاة في وقتها و خاصة صلاة الفجر
الاذكار الصباح و المساء
قراءة القرآن و لو صفحة في اليوم
كلها حبيبتي رايحة تعطيك قوة لا تصدق
و ارادة كالفلاذ
كوني واثقة في نفسك و في قدرة الله و اعانته
و أي استفسار راني هنا حبيبتي
راكي في عينيا