المحاجب السخونين والحارين

[السيدة كرمين]

المشاركة الأصلية كتبت بواسطة مريلينا

السلام عليكم مارانيش نبيع فالمحاجب مي حبيت تناقشوا معايا ظاهرة سور شفتوها
الراجل يخبز ويبيع المحاجب والمشكل يخدموا خير من النسا علاش الدنيا إنقلبت المرا تخدم خدمة الرجال والرجال يخدموا خدمة المرا ما تزعفوش مني الخدمة حلال مهما كانت مي واش رايكم في اللي يبيع المحاجب اخي العضو هل تخدم هذي الخدمة ووعلاش ؟ وإنت العضوة تتزوجي بواحد يبيع المحاجب؟
أنا نقول راي بكل صراحة ما نحبش الراجل يخدم خدمة المرا نقبل يكون بلا خدمة وما يخدمش خدمتي انا هو راجل وانا المرا نستنى رايكم شكرا للجميع

جبتيني للبير ورديتيني عطشانة حرام عليك

اختي

مفهمتش وش لي زعفك؟

وش رايك فلي يخدم لبيتزا

ولا ليبيع سوندويتش

ولا لي يخدم لباتيسري


ومافهمتش علاه دخلتي عمل الرجل في النص
وربطتيه بقبول ورفض الزواج؟

هذا رايك وانا نحترموا مي يا بنتي العمل عمروا مكان عيب ولا حرام

المهم أنوا حلال

هو مراهش يخدم فهاذ الخدمة فلبيت ربما نقولوا يطيح من عينك

هو يخدم هاذ الخدمة لأنوا كاين ناس يحتاجوها

مثلا شاب يخدم بعيد عن أهله ويسخف فلمحاجب وش يدير

قوليلي عيب مرا الا شرات من الشارع نقلك وي

وعيب عليها

لكن الرجال يخدمها كيما هي كيما لبيتزا كيما لي سوندويتش

كيما المرق ولي صوص ولي بلا لي تتقدم فليريسطورو

المهم عملوا حلال ومش عيب ولا ينقص من رجلتوا

كرامتوا ومواقفوا وسلوكوا و أخلاقوا هي أسس اختياره كزوج

عندك غدوة تقوليلي خدمة عامل النظافة عيب ومنزوجش واحد يخدمها

ويمكن واحد يقلي منزوجش فام دو ميناج .....



شكرا على الطرح ولست معك

والا ختلاف لا يفسد للود قضية

تقبلي تحياتي