المعمول

نانازيار · 2011-05-31, 19:33

شكرا لكم اخواتي و لكني ابحث عن المعمول الي يديروه بالعسيلة

mchimcha · 2011-06-02, 13:18

اقتباس:

المشاركة الأصلية كتبت بواسطة نانازيار

شكرا لكم اخواتي و لكني ابحث عن المعمول الي يديروه بالعسيلة

أختي تحوسي على المعمول اللي ينخدم بالسميد كيما المقروض؟

mchimcha · 2011-06-02, 13:33

4 عبار سميد + عبر زبدة ذائبة (على حساب المقدار اللي تعبري بيه مثلا بول تاع شوربة)
تاخذي قصعة تبسي السميد انتاعك b1 بالزبدة من بعد غطيه و تخليه يبات يشرب في لي دام
غدوى من ذاك ظيفيلو 2 ملاعق أكل سكر عادي + قرصة بيكربونات+ شوية لافاني من أجل النكهة+ ملعقة من خميرة الخبز تكون ذائبة في شوية ماء دافيء أو ماء الزهر+ قرصة ملح

لمي المكونات هاذي بماء الزهر كي شغل راكي رايحة تخدمي المقروض

من جهة أخرى احكمي الغرس و طريه مليح و ظيفيلو شوية زبدة و شوية قرفة و ميلونجيهم b1

أحكمي ضوركا الغرس انتاعك و شكليه كويرات صغار و اعمليهم على شكل قطعة نقدية 5 دج حتى تكملي الغرس انتاعك

ضوركا احكمي المول تاع المعمول و اوظعي فيه كمية من السميد هذاك و من بعد ظيفي الغرس و غطي من فوق بالسميد ثاني و اظغطي عليه مليح باش ياخذ شكل القالب و من بعد حطيه في سنيوة مرشوشة بالفرينة و دخليه للفور حتى ياخذ اللون الذهبي

خرجيه و عسليه و هو سخون بالعسل تكوني ظفتيلو كمية تاع ماء الزهر و خليه يقطر مليح من بعد ساعتين ولا 3 زيدي عسليه و ديريه في لي كيسات و بصحتك

ملاحظة باش تسهلي خروج الحبة من القالب تاع المعمول ديري ساشي في القالب و من بعد ديري السميد و ما عليك غير تجبدي الساشي شوية و حبة تطيح ما بين يديك

نتمنى تنجحلك هاذي الوصفة