عدنا من جديد

[مصريه جدا]

المشاركة الأصلية كتبت بواسطة بنت من مصر

شوفى يا ساره ، أنا مفقوعه على أخرى من الجماعه اللى قلبهم حنين زى حالاتك ومش مركزين فى أكتر من حاجه كده

أولا يا ست الكل لازم تفهمى حاجه مهمه قوى ، رئيس دوله يعنى أعلى مسئول فيها ، ويحاسبه الله عز وجل عن الكبير والصغير

نضرب مثل بأحد المسئولين ،

عمر بن الخطاب رضى الله عنه وأرضاه " لو أن دابة عثرت بأرض الشام لخشيت أن يسألنى الله عز وجل عنها ، لم لم تمهد الطريق لهايا عمر "
خايف ربنا يحاسبه عن معزه اتشنكلت فى الطريق

مش ملايين تموت بالمرض والفقر والجهل ، فى حين أنه يملك أموال لو أكلها هو وجميع أهله وعائلته وأفراد حكومته وأسرهم لما انتهت


عثمان بن عفان جهز جيوش المسلمين من ماله الخاااااااص ، مش سرق مال الشعب علشان يضيفه لرصيده الخاص

مبارك إنسان ، تمام ماشى ، محدش قال إنه شمبانزى
" مع الإعتذار للشمبانزى "

بس إنسان كان فى موقع مسئوليه فأداها على أسوأ ما يكون

أقول لك حاجه ، يقول رسول الله صلى الله عليه وسلم " لو أن فاطمة بنت محمد سرقت لقطع محمد يدها "


الرسول بيضرب مثل بأحب أبناؤه إلى قلبه ، ويقول أنها لو سرقت ، اى وقعت فى حد من حدود الله عز وجل ، لأقامم عليها الحد دون شفقه ، ومن غير ما يقول يارب دى بنتى وأحب الناس لقلبى


طيب اللى يسرق ويقتل ويروع ، أو حتى يسيب كل ده يحصل بعلمه
ومينفعش نقول إن فيه حاجه حصلت بدون علمه ، ده مش غفير عمارة ، ده رئيس دولة

اللى بيعمل كل دول ، ربنا عز وجل قال فيه إيه ؟

" إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلافٍ أَوْ يُنفَوْا مِنَ الأَرْضِ ذَلِكَ لَهُمْ خِزْيٌ فِي الدُّنيَا وَلَهُمْ فِي الآخِرَةِ عَذَابٌ عَظِيمٌ "

مينفعش ياساره يكون فيه خراب وفساد بالحجم ده ونقابله بالعواطف أبدا

ده مش زى بعض الناس ما بتقول ، أبونا ولازم نسامحه ونقول له شكرا وأسفين ونبوس رأسه والكلام العبيط الساذج ده

لو انتى أم ومات لك واحد ولا اتنين لإن واحد عمره تجاوز الثمانين مش قادر يقبل على نفسه إنه يتنازل عن السلطه وماسك فيها بإيديه وأسنانه كأنها عزبة أبوه
ومستكبريقول أنا ماشى ، ولا خايف يمشى قبل ما يغطى بلاويه

ومش مهم 300 ولا 400 واحد ماتو ، واتحرقت قلوب أهاليهم

لو واحد من دول أبنك ولا أخوكى ، كان رأيك هيختلف

الأمور دى لا تقاس بالعواطف ياساره ، ركزى شوية وانتى تفهمى

" سباب المسلم فسوق ، وقتاله كفر " حديث شريف

شوفى ده اتقتل بأمره كام مسلم ؟
يعنى هو كده أخد وسام الكفر كام مرة ؟
لسه عاوزه تعاطفى معاه ؟

طيب عاوزه تتعاطفى معاه ؟ أنصحك تدعى لشارون بالمره
هو برضو بشر أخطأ وربنا يسامحه ولا يحاسبه دى مش مشكلتنا ، بس أهو بين الحياة والموت فى غيبوبه بقاله سنوات
سكرات الموت مستمره معاه شوفى قد إيه ؟ عبرة لمن لا يعتبر

بس يعتبر مريض يا حرااااااااااااااااااام

عموما لاهو برضو بشر وأخطأ وربنا يسامحه ، ادعيله مع بابا مبارك لو سمحتى


ولا أقول لك حاجه أحسن
يحشر المرء مع من أحب ،، لو متعاطفة مع مبارك روحى لربنا وقولى انك بتحبيه أو متعاطفه معاه ، وادعى ربنا يغفر له ويحشرك معاه
هترضى ؟ هتستحملى ؟
طيب ممكن تساعديه وتشيلى كام ذنب من ذنوبه ؟؟

أقول لك ، خلينا جنب الحيط أحسن
بس فكرى فى كلامى بشوية عقل بدل ما تودى نفسك فى الطراوه

سورى ياثومه بس ربنا بيحاسب كل انسان حسب الى فى نيته
وربنا عارف كويس نيتى ايه وربنا مش بيظلم حد ياثومه
ولا يهشيلنى ذنب مبارك لانه انسان وصعب عليا لما تعب
لان ربنا الى خلقنى كدا صحيح كل الى يعرفونى كويس بيقولوا انى شخصيه قويه
لكن كمان عندى قلب وانت عارف اننا طول عمرنا شعب عاطفى
كل الشعب المصرى مش انا لوحدى
ميرسى ياثومه واوعدك انى هفكرك فى كلامك بالعقل
وحاول الغى عواطفى لكن مش اوعدك انى هغليها هحاول
وعلى فكره ميصحش نشبه مبارك بشارون
ربنا اعلم بيهم الاثنين
شكرا ياثومه مع السلامه اختى العزيزه