قولولي هذا تبذير ولا سخاء ؟؟؟! 😮

[مُحمد رازي]

و عليكم السلام و رحمة الله
هادي عادة سيئة أختي و ماشي مليحة راهي فيك ووين ما راكيش تقدري تصبري على الشراء لدرجة أنو في أفضل حالاتك راكي توصلي تشري بسينة تاع عشر الاف فقط باش تلبي هاديك الرغبة الملحة تاع الشراء ! صح ربي يحب يشوف أثر النعمة تاعه على عبده بصح ماشي بهاد الطريقة تاع الاسراف و التبذير ، الدراهم ماشي ملاح أنهم يوصلو يسيطرو على الواحد بهاد الطريقة ، نتي لازم تعرفي كيفاش تتحكمي في المصروف و تنفقيه في الشي المفيد ماشي غير لي جا في طريقك تشريه حتى و لو كان ما عندك حتى حاجة بيه ، و كمثال أنك رايحة تشري الحليب و الياوورت ارفدي معاك غير عشرين ألف أو فقط قد ما يجيبولك هاد الصوالح ماشي ترفدي معاك قريب نص مليون و تدخلي لسوبيرات و يقعدو أصناف المأكولات و المشروبات يلمعو في عينيك و ما تقدرش تقاومي كامل دوك المغريات ، و تانيك نحي من راسك فكرة أنك كي تدخلي تشري حاجة و لا زوج تجيك حشمة أنك ما شريتيش بزاف و تشوفي الناس من حولك هادا رافد ربع شكاير و لاخر ستة ولاخر ماقدرش يرفد من كثرة واش شرا الله يسهل عليهم هوما ممكن عندهم عايلة كبيرة أو أنهم موالفين بعيشة الترف هادي ، بصح نتي راكي تصرفي غير على روحك ما عندك لا أولاد لي ممكن يسخفو على هاد الصوالح لا والو ، و حتى لو كان شريتي معاك لإخوة صغار أو وحدين من العايلة ماراحش يوصل بيك الحال حتى تصرفي قريب نص مليون عليهم في نهار واحد ، هادا بالنسبة للأمور تاع الماكلة و بالنسبة للملابس شري الحاجة لي فعلا راح تلبسيها ماشي تشري نص الحانوت من بعد كامل واش شريتيه تردميه في الخزنة حتى تركبه العنكبوت و ياكله البق أو تانيك الملابس لي ما تستعمليهمش و راهم مستهلكين المكان باطل في الخزنة صدقيهم على وحدين تعرفيهم محتاجين ، و كنتي تحوسي من قبل على أفكار تاع صدقة جارية لميت نظن عندكم ميت الله يرحمه و يوسّع عليه أو عليها ، فتقدري تستغلي قضية شراء الملابس هادي و عوض أنك تصرفي مليون و تشري نص الحانوت خصي منه جزء و عاوني كاش فتاة تكون فقيرة و محتاجة و حابة تشري لباس شرعي و حجاب بصح ما قدرتش حوسي ممكن تلقي حالات كيمن هادو و انويها صدقة على الميت و تقدري ديري هاد الشي في كل مرة و كل شهر تخرجي تشري فيه الملابس ، و نفس الأمر بالنسبة للكتوبا أسيدي حتى إدا ما كنتيش تشري الكتوبا الاسلامية كي تدخلي للمكتبة شري معاك كتاب و لا زوج تاع فقه و لا عقيدة و لا تفسير و صدقيه على كاش واحد من طلبة أو طالبات العلم الشرعي و لا أي واحد يحب يتفقه في الدين و ما عندهش القدرة باش يشري و ما شي شرط تشري مصحف و تخليه في الجامع خطرة في حياتك و لكن كتوبا من هاد النوع فيهم فايدة عظيمة و تقدري كل مرة تشري كتاب و تعطيه لواحد يستفاد منه و يروح أجر القراءة تاعه للميت ، و هي من المفروض تفيدي روحك أنتي الأول بيهم ماشي يجذبك عنوان تاع كتاب كيف تربي الحلزون في القطب الجنوبي و تشريه و نتي فرحانة على الأقل اشري كتاب : "كيف تصبح مشحاح في سيمانة - تأليف الرازي" مفيد أكثر ، فصدقا أختي لازم تحاسبي روحك على كل دورو تنفقيه ماشي حتى لغدوة وين يتحاسب العبد على ماله من أين اكتسبه و أين أنفقه لاخاطرش الدراهم ماراهمش دراهمنا مال الله و هنا نتصرفو بيهم و مجرد أنكي تفكري بلي كاين غيرك لي راه حاصل و ما عندهش حتى واش يكفيه لقوت يومه و ما يجي يكمل الشهر حتى يحصل تعرفي النعمة لي راكي فيها نتي لهاذا لازم تحسني استغلالها ، و قضية أنكي تحسي بالسخاء كي تمدي واش شريتي للاخرين فهادا ماشي سخاء لاخاطرش السخاء ماشي تمدي حاجة و من بعد تروحي تشري الدوبل منها السخاء يكون بالدرجة الأولى في العطاء حتى و لو ما طلبوش منك لخرين و حتى و لو كان ما تحصلتيش نتي على داك الشي
أعتذر على الإطالة و أعتذر على صراحتي و لكن أنتِ حبيتي تواجهي النقد و النقد مليح أحسن ملي يقولك راكي على صواب في حين تكوني على خطأ