انا هنا في خدمتكم اصحاب البكالوريا - منتديات الجلفة لكل الجزائريين و العرب

العودة   منتديات الجلفة لكل الجزائريين و العرب > منتديات التعليم الثانوي > منتدى تحضير شهادة البكالوريا 2025 > منتدى تحضير شهادة البكالوريا 2025 للشعب العلمية، الرياضية و التقنية > قسم العلوم التجريبية

في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة تقرير عن مشاركة سيئة ( تقرير عن مشاركة سيئة )، و الموجودة أسفل كل مشاركة .

آخر المواضيع

انا هنا في خدمتكم اصحاب البكالوريا

 
 
أدوات الموضوع انواع عرض الموضوع
قديم 2018-08-13, 15:52   رقم المشاركة : 28
معلومات العضو
المُعادلة الصّعبة
عضو متألق
 
الصورة الرمزية المُعادلة الصّعبة
 

 

 
إحصائية العضو










افتراضي

اقتباس:
المشاركة الأصلية كتبت بواسطة same_one مشاهدة المشاركة
ريونة سلام يا درا ديتي فارمسيا ؟
اهلا اسيل وشراكي حنونتي
نعم الحمدلله صيدلة في جامعة قسنطينه 3

اقتباس:
المشاركة الأصلية كتبت بواسطة ~عيون القلب~ مشاهدة المشاركة
السلام عليكم

في رأيك من الافضل : الاستاذ مولاي عمر ام الاستاذ شريفي ؟

و شكرا مسبقا
عليكم السلام
اهلا بك
انتي طلبتي رايي
لكن اما نعطيكش رأيي لأني ممكن ننحاز لواحد ونظلم الاخر هههه
شوفي نعطيك محاسن ومساوئ كل واحد
ونتي شوفي
نبدا بالاستاذ مولاي عمار
انتي لا شك انك جربتيه في السنه الثانية ثانوي ونفعك بزاف ونفعنا كامل
لذلك هو لا شك انو شرحو مليح
ولكن

في كل وحدة كاين فيديوهات كثيرة جدا
وكل فيديو فيه وقت طويل
لذلك اذا حبيتي تعتمدي عليه فإنك تستغرقي وقت طوييييل جدااا وممكن ما تكمليش وتحسي بالملل
يشرحلك بالتفصيل
انا جربتهم في زوز بداية العام باش نفهم الوحدة الاولى
ماكانش عندي مصدر آخر لانو ماقريتش ليكور واستاذي تاع الفيزيا تاع القسم لاكان فهمتي نتي عندو كلمه راني فهمتها معاك

جربتهم في زوز مافهمت والو على الاستاذ مولاي عمر صراحة
بالمقابل قريت عند استاذ شريفي فهمت وش كاين فالوحدة وليت نقدر نحل تمرينات مع الوقت
قررت اني نكمل معاه
لانو شريفي فيديوهاتو جاية قصيرة ومهيش كثيرة
صدقيني يحببك فالمادة انا بسببو وليت نحب الفيزيا
خفيف بزاف و يضحكك ما يحسسكش بالملل
قد ما نقولك هايل ما نوفيهش حقو
استاذ شريفي ماكانش كيفو رائع بمعنى الكلمة
وزاد كي يشرحلك يعطيك لي يهمك كامل فالوحدة ويقولك هاذي عليها 0.25
ويقول وحد الملاحظات بالدارجة نشفى علا روحي كتبتهم كامل في كراسي نفعوني فالمراجعه
ولكن يا اختي انا اعتمدت عليه اعتاد كلي لأنو ماكانش عندي مصدر اخر
ولكن اذا نتي استاذك تاع القسم تفهمي عندو و استاذك تاع ليكور جيد ؟ ما ننصحكش تضيعي وقتك فاليوتيوب
الا اذا ما فهمتش كاش عفسه توجهي لواحد منهم
ماننصحكش بالاعتماد الكلي عليهم اذا كان عندك مصادر اخرى
اتمنى افدتك اختي
اية اسئلة اخرى لا تترددي
رح نكون هنا باذن الله

اقتباس:
المشاركة الأصلية كتبت بواسطة امـــة اللـــه مشاهدة المشاركة
سلام
نشكرك الاخت ريان على هذا الموضوع اللي عاونتينا بيه

سؤالي كيف كان تعاملك وتجربتك مع الشعبة خاصة انو مادتين اساسيتين فقط كيفاه تعاملتي معاهم؟وهل وصلاتك لطموحك ؟
وهل اصابك الاحباط انك ما تقدريش ؟ اذاكان نعم كيفاه واجهتيه ؟
واش هي العراقيل اللي واجهتيها في مسيرتك هاذ العام؟
واش هي اخطاءك اللي وقعتي فيها وتنصيحينا نتفاداوها ؟
اقتباس:
المشاركة الأصلية كتبت بواسطة امـــة اللـــه مشاهدة المشاركة
علابالي كثرت مي الله غالب نشتي نسقسي

عليكم السلام هداية الجميله
بلا جميل اختي هذا راهو موضوعكم ومن حقكم هههه
طيب
بالنسبة لتعاملي مع الضعبة
انتي ديجا قريتي سنه ثانية ثانوي ووالفتي بالعفسه تاعها
انك تكون ا جوغ تحلي التمرينات في المادتين
انا ولفت روحي في السنه الثانية كنت نطبع بزااااف سلاسل تمارين ونضل نحل تمارين رياضيات وفيزيا
كنت عايشه معاهم هوما سيرتو اذا كنتي تحبيهم والله ما تملي منهم
وتوالفي اصلا تولي حياتك بلا مات وفيزيا ما عندهاش معنى ههه

بصح خطأي اني كنت نقراهم وهوما وبقية المواد ما نركزش عليهم بزاف
حاولي توازني ما تغلطيش الغلطة تاعي
صدقيني قضية ولف فقط ديجا علابالك بروحك رياضية والله شعبة رياضيات هايله هايله لانو فيها العلوم الدقيقه اللي انا نحبهم بزاف
والعلوم الدقيقة بامكانك تجيبي فيهم العلامه الكامله عادي اذا جبتي كلش صحيح

وعندك حظوظ في الحصول على معدل كبير
لانو زوز مواد معاملاتهم كبيره يلعبولكم بلمعدل
اذا كنتي ممتازة فيهم وقريتيهم مليح وقريتي بقية المواد والله تجيبي معدل كبير
بصح في نفس الوقت قادرة كي تخونك مادة منهم لا قدر الله
رح تطيحلك المعدل لذلك حذار اقرايهم مليح وما تستهينيش ولو ب 0.25

دايما حطي علامة 20 بين عينيك

اما عن تعاملي مع المادتين

انا في الفصل الاول كيما قلتلكم حبيت الفيزيا اكثر وزاد كنت نقراها وحدي صافي عطيتها نصيب الاسد
نشفى الرياضيات ما ركزتش عليها بزاف لانو الدوال مليحة فيهم انا ونحسهم ساهلين معنديش معاهم مشكل
ركزت بزاف على الفيزيا كنت كي نتقلق نجبد تمارين فيزيا نحل بزاف
وما ننكرش اني ضيعت اوقات واوقات هههه بسبب الفيس بوك
ومبعد جا الفصل الثاني نقصت وتيرتي خلاص
تقوليلي راهو كان اضراب نورمالمو استغليتيه ؟ نقولك لالا بالعكس ما استغليتوش كما يجب
اكثر فصل ضيعتو هو الثاني
كان النوم دايرلي مشاكل كبيرة نحب غير نرقد

وزاد محور الجبر كي قالولي صعيب رحت سمعت الهدره تاعهم ودرت في بالي بااللي صعيب وظليت نشكي ونندب هنا فالمنتدى ههههه
كي جات عطلة مارس حطيت عقلي في راسي وقلت يا انا الجبر
حليت لي باك تاعو فهمتلو العقليه ضرك يا هداية نقلك باللي الجبر اسهل اسهل اسهل محور في الرياضيات

تفهميلو العفسه برك
وكي توصلوا ليه باذن الله نكون معاكم باه نفهمك وشيهي العفسه تاع كل محور باه حتى يسهل عليكم حل التمارين
وزاد الاحتمالات كيف كيف فهمتهم في ماي بسبب كرهي ليهم اياكي تغلطي غلطتي
كل محور في وقتو
بصح صدقيني بقية المحاور من اسهل ما يكون
اعداد مركبة كي الما ، ودوال كي الما ، احتمالات اسهل ما يكون .. متتاليات ما نحكيلكش هههه

حليت تمارين استاذ مصطفاي و البكالوريات فقط فقط
واعتمدت على دروس دعم استاذي والله كان ليه فضل كبير خلاني ما نواجهش مشاكل كبيرة مع الرياضيات
اما الفيزيا حليت تمارين المغني والبكالوريات والمراجعة النهائيه برك
درت كراس تاع افكار نفعني بزاف روحي للصفحة لي قبل هاذي شرحت بالتفصيل ل الاخت some one كيفاش تعاملت مع الفيزيا
بصراحه ما نكذبش عليك كون رحت علوم تجريبية كون والله ما نجيب هاذ المعدل
لاني نكره العلوم و حنا في جيهتنا العلميين ما يمدولهمش نقاط بسبب المنهجية
انا الباك تاعي رياضي مية بالمية كيما قاتلي وحده صديقتي هههه لانهم مدولي علاماتي الحقيقية فيهم والباقي لالا
معدلي لربما ما افصحتش بيه للجميع هو 15.80 ولكن نقول جبت 16
بالنسبه للاحباط ماشي غير حسيت بيه

خصوصا في الايام الاخيره اصابني ضغط ماهو ضغط ، بسببو وليت مانقدرش اصلا نركز مع لي نقرا فيه
ولكن يا امة الله راهو عام كامل ومشك رح تبقاي بنفس المزاج رح تتبدل الامزجة والمعنويات

هاذي مادة هبطتلك المورال هاذي علامة مش مليحة فزدتلك مزاجك هذا درس ما قدرتيش تحفظيه هذا تمرين ما فهمتي لجدو والو هاذو صحباتك يقولولك كملنا الحفظة ونتي ماكملتيش _حذار تتاثري بيهم _
بصح ياممات الباك باش نجوزوا ما حسيتش بهذاك الخوف لالا عادي قلت انا درت لي عليا واكثر ولي صرات راني قابله بيها لاني علابالي درت واجبي على اكمل وجه
كيفاش تواجهي الاحباط ههههه روحي ضربيها بنومة نضحك برك
نعم اذا كان الاحباط سببو نقص النوم تاعك نحي قدامك القراية وروحي ارتاحي ارقدي مليح عادي
ولكن في اوقات اللي تكرهي كلش
ابتعدي تماما عن جو الدراسة روحي اتفرجي اقراي كاش عفسه اسمعي قرآن ديري رياضه
ديري يوم كامل تنساي اصلا اذا عندك الباك و اخرجي ولا المهم رفهي عن نفسك
ولكن قلت يوم واحد ماشي تجيبيها سمانه كامله ونتي لا خبر على قرايتك
العراقيل لي واجهتها : النوم والنعاس - ادمان الفيس بوك - مالقيتش استاذ مليح تاع فيزيا اعتمدت على نفسي فيها - احيانا نكره القرايه ونحبس نروح نضيع وقتي في حاجه خلاف - وقت كي ما نفهمش حاجه ما نلقاش لي يفهمني خصوصا فيزيا وجبر - هذا لي تفكرتو حاليا
انتي كثرتي وانا ما خليتش هههههه هدرت بزاف
بالنسبه لاخطائي
هذي رح نديرها موضوع منفرد بعنوان اخطائي في الباك

نكتبلكم كامل اخطائي

ونقول للبقية يشاركونا بيهم باه تحاولوا تتفاداوهم
نتمنى افدتك اختي راني هدرت بزاف ان شاء الله تكون هدرتي نفعاتك برك هههه
اية اسئله اخرى لا تترددي

اقتباس:
المشاركة الأصلية كتبت بواسطة mimi manoula مشاهدة المشاركة
انا سقسيت على هذا السؤال انا مترشحة باك 2019 بالنسبة للدروس بالتفصيل هو الاستاذ مولاي عمر
اما الاستاذ شريفي فهو يدير دروس كالملخصات ميشرحهاش بالتفصيل و لكن تمارين رائعة يعني لا زم تستعني بيهم لزوج
الاستاذ مولاي عمر للدروس و الشرح

الاستاذ شريفي للملخصات و التمارين
شكرا اختي عالاجابة اطلعي على اجابتي الفوق لربما تستفيدي










رد مع اقتباس
 


تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

الساعة الآن 16:42

المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية


2006-2024 © www.djelfa.info جميع الحقوق محفوظة - الجلفة إنفو (خ. ب. س)

Powered by vBulletin .Copyright آ© 2018 vBulletin Solutions, Inc