دورة صيفية جديدة

[رندة.]

هذا هو الفقوس يا أم محمد

[ام شمسو محمد]

المشاركة الأصلية كتبت بواسطة رندة.

هذا هو الفقوس يا أم محمد

رندا حنا عندنا هذا هو الفقوس ...و انا ثاني نموت فيه تشتهر بيه منطقة عين ازال


ام هزار انت من اي المنطقتين؟

[رندة.]

مساء الخير
أم شمسو احنا عندنا الفقوس هذاك إلي حطيت الصورة تاعو قشرتو تجي خضراء. أما إلي حطيتي صورتو أنتي الأصفر احنا نسمّوه المرحوم، ماعلاباليش علاه سمّاوه هكا بصح هذا هو اسمو عندنا.
أم هزار قوليلنا واش من فقوس كنتي تقصدي الاخضر ولا الأصفر؟؟

[رندة.]

أهلا أم محمد الحمد لله كي عجباتك فكرة المكالمات الهاتفية ورانا كامل نستفيدو من بعضانا.
بالنسبة لذوق الفقوس إلي حطيتلك صورتو، يجي تقريبا كيما الخيار بصح أحلى منو.
أما الفقوس تاع أم شمسو (المرحوم تاعنا)، نظن غنّي عن التعريف مذاقو حلووو وهايل.

عودة ميمونة ياسالي، وألف مبروك الختانة تاع ولد سلفك وربي يجيبلو الشفاء ان شاء الله.

[ابني نور عيني]

صباح النوور و النشاط و الهمة العالية 😉😉
يارب تكونو كامل بخير و عافية

راح نبدا روتيني الصباحي من عادتي نستيقظ على السادسة صباحا لكن اليوم حلاتلي النومة ههه😴😴😴
هويت البيت و استقهويت و أخذت دوش خفيف و راح نبدا نخمل داري ..

أختي رندة الفقوس اللي أخضر في الصورة عمري ماكليتو أما الصورة اللي حطتها الأخت أم شمسو هل هو البطيخ يشبهلو و اكيد كامل نعرفوه و ذوقو حلو

[samophisique]

سلام فراشات الله يبارك نشاط وهمة ربي يدومها نعمة والله شوقتوني لتدوين مفكرة يومية الحق انا نرتب في راسي واش ندير لكن حوايج ياسر عدت ننساهم و بعدها نحس بالتوتر و الضغط الكتابة في الثلاجة نعتمدوها في الاسرة كيخرج اي واحد لكن نستعمل المفكرة والله عندي مدة فاشلة مانيش في الروتينات هذا راجع كما اظن استعمال المبرد طول اليوم مرضنا اليوم ندير باذن الله الساعة الاسبوعية و نبدا غرفة الاستقبال فراشات وين واصلين

[رندة.]

مساء الخير عليكم
ان شاء الله تكونو كامل بخير

سالي يعطيك الصحة على النشاط والهمة العالية، بالنسبة لتنظيفات ماقبل العيد راني معاك وأمبعد نشوفو كيفاش نبداو.

أم هزار شكرا لأنك نحيتيلنا الجدل إلي كان قائم بين الفقوس1 والفقوس 2، هكا نشوفو أنو كل منطقة تتميّز بمُسمياتها للأشياء.

سامو فيزيك الكتابة تنحيلك كل هذاك التوتر والضغط تاع نسيان بعض الأمور، يبقالك فقط التنفيذ لأنو عقلك راح يرتاح من كثرة التخمام والتذكّر.
- كاين أمور نكتبوها مرة في العام وإلي هي أهدافنا الطويلة إلي حابيّن نحققوها خلال السنة (صيام بعض الأيام، شراء أثاث جديد، انجاب مولود جديد، التسجيل في احدى المراكز التكوينية، تعلّم لغة جديدة...).
- وكاين أمور أخرى نكتبوها مرة في الشهر لأنجازها خلال الشهر ويمكن أنها تتضمن أهداف صغيرة مجزأة من الأهداف الطويلة تاع العام لأنو اذا خططنا لأهداف طويلة لازم نبداو في التنفيذ باش ما تبقاش مجرد أحلام اليقظة، وهذا التنفيذ راح يتم تجزئته خلا أشهر السنة مثلا ( اقتناص فرص الأيام المباركة في الصيام كوقفة عرفة وعاشوراء، الذهاب للسوق ومعرفة أسعار الاثاث إلي راني حابة نضيفو لداري ونشوف ثاني الخيارات المتوفرة، التوقف عن حبوب منع الحمل وزيارة طبيبة النساء والتوليد، السؤال عن مواعيد التسجيلات في المراكز التكوينية والتخصصات المعروضة، شراء كتب لتعلّم اللغة الجديدة ومشاهدة أفلام وفيديوهات لتعلّم النطق بيها).
- وكاين إلي نكتبوها كل أسبوع تكون أقل من تاع الشهر وإلي رانا حابين ننجزوها خلال هذا الاسبوع مثلا ( تنظيف منطقة معينة، زيارة مريضة، دعوة ضيف للبيت، الخروج للنزهة...).
- وكاين إلي نكتبوها كل يوم وتتضمن الروتينات اليومية باش نأشرو (×) عليها ونتأكدو أننا قمنا بيها، وكاين العادات الحسنة إلي حابين ندخلوها في حياتنا كيما صلاة الضحى مثلا.