الجزء 187 من كوزينة حراير الجلفة ونكملوا المشوار ونتمنى تفاعل كل الاحرار 💜💜 - الصفحة 26

nihal159 · 2018-02-18, 12:06

اقتباس:

المشاركة الأصلية كتبت بواسطة rima.87

السلام عليكم اخواتي في الله ،
واش احوالكم ان شاء الله بخير ،
صح فطوركم ،فطورنا اليوم مرقة بطاطا مع باذنجان حاااااااااارة ،
في نهاية الاسبوع جربت بقلاوة ام اماني
و العجينة لي بقات درتها قريوشاات ،

و الحمد لله على نعمه .

ريمــــــــــــــة

آه ياني على اللي جرالي؛ يايما على هذيك البقلاوة؛ تسخّف؛ تمنيت لو كنت قريبة؛ باش نورّيلك الطريقة الصحيحة لأكل البقلاوة ههههههههههههههههههههههه واحد مايعرفها غير أنا ههههههههههههههه

RIMA.87 · 2018-02-18, 12:12

ام هاديل بصحتكم البوا كاسي و بصحتك الخرجة ،
ام فاطمة بصحتك الخرجة و صح فطورك و تطبيقك رووووعة تاع الكيكة ممكن تقوليلي الوصفة لي طبقتيها حرت راهم كاينيين وصفات كثيرة الاختلاف بسيط لكن بما انك جربتيها و عجباتك قوليلي ان امكن الوصفة بالذات .
فيفي ربي يعينك و يسهل امورك و جي و ترجعي بالسلامة ،
حيووتة الدولمة ما شاء الله بصحتكم و الكيكة خرجتلك رووووعة بصحتكم ،
ام هدوول بصحتكم كسرة الشحمة رووووعة و القاطو تووووب مرة جربتها اخت زوجي لكن هي ما لصقوش بعضاهم بعدتهم و لكن دارت الكريات كبيرة و كي طابت اصبح قاطو عملاق ههههههه لكن الذوق توووووووب خاصة عندما تبات .

نهووولة واش درتي فيما بالبيري ديالك بصحتك انت وماري ،

اهليين اختي كرونو ارشيفك رائع و يعطيها الصحة بنتك اظن هاديك كسرة الحشاوش ،اذا مافيش ازعاج قوليلي كيفاش درتيها حبيت نجربها بسميد القمح و اي اخت تعرف تعطينا الوصفة و المقادير و الحشاوش اللازمة باش ننجح فيها و شكرا مسبقا .

الاخت سحابة و سوسو رزيقة و كل الغائبات و الملتحقات يومكن موفق و سعييد باذن الله.

RIMA.87 · 2018-02-18, 12:16

اقتباس:

المشاركة الأصلية كتبت بواسطة nihal159

ريمــــــــــــــة

آه ياني على اللي جرالي؛ يايما على هذيك البقلاوة؛ تسخّف؛ تمنيت لو كنت قريبة؛ باش نورّيلك الطريقة الصحيحة لأكل البقلاوة ههههههههههههههههههههههه واحد مايعرفها غير أنا ههههههههههههههه

اهلين نهووولة ،هههههههه ضحكتيني على التعبيير المعبر ،
تستاهلي يا اختي ارواحي و نعاودهالك باللوز و النتيجة بالنسبة ليا ما كانتش مرضية تماما درت بعض الأخطاء لاني حابة نتعلمها و راني جربتها هادي المرة الثالثة و كل مرة اتدارك خطا من الأخطاء حتى نجيبها في الصواب باذن الله.

nihal159 · 2018-02-18, 12:25

اقتباس:

المشاركة الأصلية كتبت بواسطة rima.87

اهلين نهووولة ،هههههههه ضحكتيني على التعبيير المعبر ،
تستاهلي يا اختي ارواحي و نعاودهالك باللوز و النتيجة بالنسبة ليا ما كانتش مرضية تماما درت بعض الأخطاء لاني حابة نتعلمها و راني جربتها هادي المرة الثالثة و كل مرة اتدارك خطا من الأخطاء حتى نجيبها في الصواب باذن الله.

الله يسلمك ريمة؛ الله يبارك الصورة راهي تنطق؛ الحبة تاع البقلاوة راكزة الله الله و شادّة روحها؛ و الحشوة تبان معسلة و طرية تذوب فالفم و المكسرات ماشاء الله مرحيين مليح ماهو رقيق بزاف ماهو خشين؛ الله يبارك نجحتي فالوصفة مئة بالمئة؛ و دوّختيني لدرجة نسيت نقولك صحّ غذاك ههههههههه

ام هاديل وياسين · 2018-02-18, 12:48

صحى فطوركم لبنات ريمة الله يسلمك ويعطيك الصحة على البقلاوة خرجتلك هايلة يادرى وين الخطا ؟ وحتى ويكون الغلط يقولك خسارة العجينة ولا خسارة اليدين

وعجبني بزاف تقطاع نتاعها انا عيت نفهم كل مرة نحب نقطعها كما درتي بصح نخاف نخسرها بصحتك مرة اخرى نروح نغسل لماعن اكرة حاجة عندي هوما وراني نخمم ندير كعك الي محكمنيش تفنين

سحابة باردة · 2018-02-18, 12:49

صباح النور على الحراير بصحتكم كامل واش حطيتو
عقلت على دولمة حيوتة والقاطو الزاكي البنين تاع بنات أم هول وبقلاوة ريمة الله الله عليها
وديسباسيتو من يدين أم فاطمة وحيوتة لثنين أحلى من بعض
أم هاديل بصحتك الخرجة
مننساش نهولة بصحتكم لابيري ودجاج
البارح درت اللوبيا واليوم القراتان نخليكم مع الصور وكل ليعجبهم كيك البرتقال نقولهم تسلملي عيونكم الحلوى
أرزاق منورة راكي تغيبي بزاف وين راك غاطسة حقا غير جربي الكيكة راهي أسهل منها مفيش

nihal159 · 2018-02-18, 13:02

درك وين شفت القاطو تاع أم هدول؛ الله يبارك بناتك في يدّيهم البركة؛ القاطو فاض ما شاء الله؛ ربي يفيض عليكم كل خير إن شاء الله.
سحابة؛ صح غذاك ؛ كعكة البرتقال تشهي؛ بصحتكم.

حياة نور الدين · 2018-02-18, 13:34

اهلااا صح فطوركم

فطوري محاجب كانوا في الكنجلاتور سخنتهم والدراري ارز بالحليب تع البارح والحمد الله

شوفي ام فاطمة حبيبتي والله ماني معمرة راسي وجوهكم تكفيني انا درت نداء اللي دخلت مرحبا ولي مدخلتش كيف كيف رانا كبار منبقاوش نحاولوا في بعضنا هدا من جهة
ومن جهة اخرى كاين بزاااف حبيبتات المنتدى محبش يدخلهم منهم توبة والله لول بارح فايت ساهعة وهي تحاول نتدخل ومحبش ينفتح المنتدى وكاين بزاف اخريات المنتدى هو السبب محبش ينفتحلهم
وحتى الموضوع نظن لحد الان متثبتش معنتها الكل في سبات وقادرة نكمل وحدي هههههههه ولا ياس مع الحياة ههههه

سحابة باردة · 2018-02-18, 13:48

حيوتة بصحتكم المحاجب عجبني السبات هههههههه
بخصوص الكوزينة كون تروماركو مليح تلقو غياب جماعي في كل أقسام المنتدى نقص فيها النشاط ماشي الكوزينة فقط
ألوغ لكل أسبابه وربي يكون في عون الجميع
حيوتة سلميلي على توبة بزاف
ياحوجي نسيت الغالية كرونو نقولها نورتي الكوزينة كيراكي حبيبتي أن شالله بخير والفطير علامة باين صحي وبنين وأرشيفك ثاني لا يعلى عليه يعطيك الصحة والعافية

ام هدول · 2018-02-18, 13:51

سلام أهاه حيوته بلعقل برك نورمال. ياخي قلتلكم نديرو كوزينه نطيبو وندردشو لينا كامل لي تلقى الفرصه تدخل...ولي مالقاتش ..نورمال...

ام هدول · 2018-02-18, 13:54

نولي سع لم هاديل...نحطلك الرابط تع كسره الشحمه لاخت أسمهان. نفس طريقتي فقط بدل اللحم الماحي عملت التونه....جربيها رووعه.
https://www.djelfa.info/vb/showthread.php?t=1744384

nihal159 · 2018-02-18, 13:56

حيوتة صح غذاك؛ لمحاجب يسخفو؛ راكي درتيلي الدودة؛ غدا إن شاء الله نديرهم.
الكوزينة راهي ماشاء الله بالنسبة لباقي الأقسام؛ قسم دردشة البنات راهو مهجور كليا؛ على الأقل الكوزينة فيها مجموعة من العضوات ينشطو فيها بصفة دائمة.

ام هدول · 2018-02-18, 14:00

اه ياني منك ياريمه..ريم الريمات...البقلاوه عللاامه. كيما تقول حيوته خخخ..ماشاه الله. يسلم يديك حنونه....
نهوله بصحتك لبيري بالجاج...ههههه ويعطيك الربح على تعليقك على القاطو.
سحوبه لقراتان.اللوبيا .يم يم. وشمرا على تلعيقك صح القاطو كون ماتعرفيس كيفاش تتحيلي معاه شكلو يديفورما ...خخخ.بصح على قد مايقعد يزيد يبنان. شبهولي ربي كيما الصابلي

كررونو ديك الكسره الصحيه مع زيت الزيتون اممممم يعطيها الصحه بنتك وينك زيكا وينك....??هههه
والأرشيف. تحفه خاصة. حبه البطاطا بشكل قلب ُسبحان الله
سوسو مازالكي في تلمسان...???

ام هدول · 2018-02-18, 14:06

غديا بقاتلي شويه. لوبيا زت سلاطه بالبطاطا والبسباس والزيتون والبيض والبصل...ولالصوص محضره بزبت الزيتون...وحميص باالبادنجال كنت شويتو في الفرن مع الطماطم الفلفل الحار.
يعني الخضره لي قعدت في الثلاجه جبتها...خخخ
سلامي وتحياتي للجميع..عشايا على حساب ماتوحم سي السيد. طعام بمرق اللحم ..سلااام

RIMA.87 · 2018-02-18, 14:12

اقتباس:

المشاركة الأصلية كتبت بواسطة ام هاديل وياسين

صحى فطوركم لبنات ريمة الله يسلمك ويعطيك الصحة على البقلاوة خرجتلك هايلة يادرى وين الخطا ؟ وحتى ويكون الغلط يقولك خسارة العجينة ولا خسارة اليدين

وعجبني بزاف تقطاع نتاعها انا عيت نفهم كل مرة نحب نقطعها كما درتي بصح نخاف نخسرها بصحتك مرة اخرى نروح نغسل لماعن اكرة حاجة عندي هوما وراني نخمم ندير كعك الي محكمنيش تفنين

اهلين اختي ام هاديل ،الخطأ الاول اني العجينة خليتها يابسة شوية ما درتش ماء الزهر كفاية لهذا تعبتني عندما حليتها كانت تتقطع ،
و الحاجة الثانية اني لما دهنتها بالسمن قبل ما نطيبها كثرت و كي كانت تطيب السمن طلع في الاطراف ،لكن الحمد لله على العموم جات مليحة و العايلة عجبتهم
و الانسان دايما يطمح لتعلم و تقديم ما هو احسن ،

أما بالنسبة للتقطيع شفت الطريقة في اليوتيوب ;كيفية تقطيع البقلاوة على شكل نجمة .
و ربي يعينك على الماعن لي ما يخلاصووش ههههه.