مشكلتي اناوزوجي هي الصلاة

[سالوني]

الصلاة راهي فرض كيما كل الفرائض اللي امرنا ربي ان نلتزموا بيها ولا توجد فيها اعذار ومبررات معندهاش معنى كيما راكي تقولي عيينا ومقدرناش. اني معاك كل بداية لاي حاجة دجي صعيبة في الاول مي مع التكرار والمحاولة يوميا دجيك ساهلة وتمارسيها اوتوماتيكيا، لازم تعرفي انو الصلاة هي الصلة اللي تربطك برب العباد واذا انقطعت متتوقعيش حوايج ياسر من عندو برغم انو راه كريم معانا لابعد الحدود ورانا في ارضه ونعمل على عصيانه، الصلاة راهي مناجاة كي تحتاجي الرحمان _ واحتياجنا ليه راه دائم ومستمر_ راكي ترفعي يديك وتقوليلو يارب ارزقني وفرج عليا واهديني ووووو وراح يعطيك وما يبخلكش، كفاه منباعد تتخلاي على هاد الفرض وهو واقف معاك، لو انسان دار فيك الخير مرة راح تتفكريه طول العمر فمابالك بالحي القيوم الذي لا تاخذه سنة ولا نوم، شوفي على قد ما تكيفي نفسك على حاجة تلقاي روحك فيها، بمعنى راهي قضية ولف وعادة وكل ما تكررت اصبحت عادة لديك وطبعا العادات صعب نتخلاو عليها، لازم تبرمجي عقلك عليها قولي انا راح نصلي وساداوم على صلاتي مهما كانت الاسباب لن اتراجع واذا اضطريتي اكتبيها في ورقة واقرايها صبح ومسا وقبل النوم، وعلقيها في مكان مرئي ليكم كامل، حطي صور عن الصلاة في كل ركن في المنزل فضل صلاتها وعقوبة تاركها، خصصي ركن في البيت ولو صغير خاص بالصلاة حتى يشيع جو ايماني بينك وبين الاسرة نتاعك، في الاخير نقولك وما ربك بظلام للعبيد، انتي يمكن تخدمي او راجلك كون ما يمدولكش الراتب متخدميش وهكذا هي الصلاة لازم تخدمي عليها باه تنالي المكافاة والثواب.
"ربي اهدنا لأحسن من هذا رشدا"