منتدى شقائق الرجال قسم الطبخ و المأكولات قسم المسابقات

🍜🍲🍛🍗 مشاركتي في مسابقة أحسن طبق تقليدي بين الولايات 🍜🍲🍛🍗 ‏(

ريتاج 09
قديم 2016-11-26, 21:49
السلام عليكم

اليوم حبيت نشارك بطبق تقليدي جيجلي ولي هو كسكس كحل بالسمك احنا نقولولو سكسو دكحل بالحوت

نحكي اولا على سكسو هو كسكس صحي جدا نفتلوه بالسميد والشعير وكاين لي يزيد معاه البلوط مرحي غبرة

طبق بمكونات بسيطة بصل طماطم ثوم معدنوس بطاطا حوت كل وحدة واش تحب انا استعملت اليوم الساوريلا تقدري ديريه بالسردين ولا البونيت كما تحبي


اولا في طنجرة نحطو زيت ونقلي البصل والثوم مع التوابل مليح حتى يدبال البصل وامبعد نزيدو الطماطم كيتقلاو نزيدو البطاطا وشوية طماطم مصبرة ونكملو التقلية و نمرقوه

نجيو لسكسو نغسلوه ونقطروه مليح ونحطوه في قصعة ينشف وامبعد ندهنوه بشوية زيت زيتون نحطوه يفور على المرقة لي حضرنا
كيفور مليح نحطوه في قصعة ونشمخوه بالما ونخليه ينشف و قبل مانحطوه يفور نزيدلو زوج سنات ثوم مرابيين وشوية كمون وزيت زيتون ونخلطو مليح ونردوه يفور

وقبل مانحطو الكسكس يفور الفورة الثانية نرميو فالمرق ديالنا الحوت وورقة رند وقرن فلفل حار

كيفور سكسو نلقاو الحوت طاب والمرق خثار نطفيو عليه ونصفيوه وناخد الحوت نقيه من الشوك
ونسقي الكسكس ديالنا بالمرق ونزين بالحوت والبطاطا

نتمنى تكون طريقة الشرح واضحة ونعتدر ماصورتش المراحل بصح نظن بلي الكل يعرف طريقة تحضير الكسكس برك المكونات تختلف من منطقة لاخرى
نخليكم مع الصور







في امان الله
                             
نور الإسلام26
قديم 2016-11-26, 22:07
سلام عليك
يعطيك الصحة بالتوفيق ان شاء الله
                             
كوثر التائبة
قديم 2016-11-26, 23:04
روعة رتوجة يعطيك الصحة ابعتيلي ندوق وانا نقول واين راكي غاطسة اتريك في الكوزينة بصحتكم
                             
أم أسرار
قديم 2016-11-27, 06:58
الله يبارك أختي بصحتكم و الله يدوم عليكم و علينا النعم ما ضهر منها و ما بطن أمين

                             
ام سارة18
قديم 2016-11-27, 08:15
يعطيك الصحة ريتاج على الوصفة تبان بنينة المكونات في زوج نحبهوم الحوت والشعير شفتي انا وانت من نفس الولاية مبصح احنا مانديروهش موقفة حبيبتي
                             
ام ادم و اسيا
قديم 2016-11-27, 08:21
الله يبارك شيء جميل
                             
*أم كوثر*
قديم 2016-11-27, 08:58
الله يبارك اول مرة نسمع بيه ويبدو فعلا لذييييذ
تمنيت نذوقو
                             
زينب 83
قديم 2016-11-27, 09:46
صدقيني يا رتاج غير ملي بدات المسابقة و انت في بالي كنت راح نراسلك و ماعرتش الرقم لي توال اسمك نسيتو
اهلا و سهلا حبيبتي نوراي المسابقة بموضوعك الجميل تحيت مني ليك و لناس جيجل الطيبين شحال نحب هاذ الولاية و شحال ناسها الكرام
بالتوفيق حبوبتي
                             
زهرة الريف*
قديم 2016-11-27, 10:44
بارك الله فيك ريتاج كنت نستنى فيك وفي أم سارة واحدة فيكم تحطوا كي شفتكم تهدروا عليه يعطيك الصحة الطبق صحي ومغذي سخفتيني نذوقوا موفقة إن شاءالله
                             
القبايلية
قديم 2016-11-27, 10:51
أنا قلت لكم بنات جيجل بتعبيرهم و وصفاتهم و صورهم خلاونا نزورو جيجل و نتعرفو حتى على أطباقها التقليدية يعطيك الصحة و موفقة إن شاء الله
                             
طيور الجنان
قديم 2016-11-27, 11:02
ماشاء الله اختي يشهي احنا مانديروهش بصح يبان هااايل موفقة في المسابقة
                             
انا هي رزيقة
قديم 2016-11-27, 13:18
واو مشاء الله عليك ريتاج سمعت الكثير عن هذ الطبق و اليوم قربتيلي صورتو الى ابعد الحدود ربي يبارك فيك على الشرح الوافي و الصورة المشهية حبيبتي و تشرفنا فعلا بمعرفة اهل جيجل و طيابهم الزين بفضل هذه المسابقة الجميلة ... موفقة حبيبتي
                             
البحر الصافي
قديم 2016-11-27, 13:42
مممم رتاج يبان بنين وصحي يعطيك الصحة لي عرفتينا على هذا الطبق اللذيذ
حبيت نقول ملا حظة
لاحظت من مشاركات العضوات انو مدينة جيجل مليئة بالاطباق المنوعة ربي يبارك
ومننسوش ناسها الطيبين والمحافظين سلام وتحية لهم
                             
mosta*limoges
قديم 2016-11-27, 21:17
الله يبارك أختي بصحتكم الطبق رااااائع و الصورة نتاعو شهاتني و تحية كبيرة لناس جيجل بالتوفيق أختي
                             
ام هدول
قديم 2016-11-27, 21:22
اممممممممممممممممم ريتاج سخفتينا ...يعطيك الصحة على الطبق ووشرحك لي طريقت تحضيرو ....