جزء 173 من واش طيبتي اليوم كوزينة احلى رفقة طيبة

[نوال عيسى]

المشاركة الأصلية كتبت بواسطة fadila34

الله يسلمك نوال وصح غداك انتي ايضا وفطيرة البطاطا خرجة تهبل حليلي ونقاشى كيفا عجبتني يعطيك الصحة

الله يسلمك ..
غالي والطلب رخيس تفضلي الوصفة
للعجين
4 كيسان فرينة * كاس يهز 240مل*
ملعقة سكر
ملح حسب الحاجة
ملعقة كبيرة خميرة الخيز
1/2 كاش زيت
وحليب دافي
نخلط المواد الجافة من بعد نزيد الزيت وندخلو ملييييح في الفرينة .. ومن بعد نلمو بالحليب الدافي حتى نتحصل على عجينة طرية .. بلاما تعجنيه لميها مليح برك واقسميها على 4 وخليها تخمر بعدما نغطيها
الحشو
4 حبات بطاطا نقيهم وقطعيهم وفوريهم لما يطيبو هرسيهم مليح بالفرشيطة زيدي عليها 3 ملاعق زيت زيتون انا درت زيت عادي اذا تحبي زيدي شوية هريسة وشوية زيتون مقطع .. زيدي عليها بصلة صغيرة مقطعة في الوصفة البصل ني لكن انا طيبتو في شوية زيت مع ملح وشوية فلفل ونزيد كسبر ومعدنوس مقطعين رقاق نخلط كل شي وذوقيها على الملح والتوابل لي تحبيهم زيديهم
نحتاج كاشير مقطع رقيق او دجاج طايب ومفتت او فيونداشي طيبيه مع شوية بصل وملح وفلفل اسود كيما تقدري تستغناي عليهم تماما
بيض مغلي ومسكرفج
بعدما تخمر العجينة نحكم اول جزء نحلو في السنيوية اللي كنت دهنتيها بالزيت افتحيها رقيقة لانو فيها الخميرة بعدما ترققيها حطي نصف كمية الخليط تع البطاطا مشيها على كامل العجينة ومن بعد ديري فوقها الدجاج او الكشير او الفيونداشي ومن بعد نقطع فوقها فرماج طري ونرش فوقو البيض المسكرفج.. ومن بعد نحل قرصة اخرى من العجين فوق بابيي بالزيت ومن بعد غطي على الحشو وحاولي تغلقي مليح في الجوانب وثقبيها بالفرشيطة من فوق من بعد ادهنيها بشوية حليب مخلط مع قهوة او حليب مع بودرة الحليب لك الاختيار وذرذري عليها الجلجلان والسانوج وحبة الحلاوة مباشرة الى فرن يكون سخوون كي تحمار من تحت شعليلها من فوق وكي طيب خليها تبرد شوية وقدميها
ملاحظة هذه المقادير تخدملك 2 فطيرات على هذا قلتلك ديري نصف البطاطا في الشرح ان شاء الله ما نكونش دوختك
وماكول الهنا
اسمحيلي طولت عليك قيس ما تغديت وغسلت المواعن وكتبت يعني هذيك هي هههههه