اقتباس:
المشاركة الأصلية كتبت بواسطة انا هي رزيقة
نهارك سعيد اختي امنية و مرحبا بيك معانا في اي وقت حنونة مكانش تكليف بيناتنا و لو ...... خخخخخ اكيد نمدلك الوصفة من عيوني الاثنين حنونة هو فيه حوالي 600 غ فرينة مع كاس حليب دافئ مع بيضتين و بياض بيضة ثالثة ( الصفار خليه بجيه و زيديلو ملعقتين قهوة باه تطلي بيه البريوشات) مع ملح و نصف كاس سكر و ملعقة كبيرة خميرة عجني الكل مليح حوالي 10 دقائق و زيدي في الاخير حوالي 100 غ مرغارين بحرارة الغرفة و زيدي عجني حتى تدخل الزبدة مليح .انا صراحة هذ الخطوة درتها بعجانتي الكهربائية راح تتحصلي على عجينة تلصق .خليها تخمر . هنا كيما قلتلك تقدري تخليه في الفريجدار و هو مغطي ببلاستيك طول الليل و تنوضي شوةي بكري يعني قبل الاولاد بحوالي ساعة او اكثر و تشكلي قرصات صغار و تحشيهم كيما تحبي انا حشيتهم شوكولا و تخليهم يخمرو حوالي 40 دقيقة او اكثر على حساب حرارة كوزنيتك غطيه بسيلوفان ثم قماش سميك باه يعاون على التخمار . و شعلي الفور تاعك بحوالي 10 دقائق مسبقا قبل متحطي البريوش يطيبب و طليه بصفار البيض و حطيه يطيب اومتروحيش بعيد لانو بالخف يطيب و يتحمر اذا كان الفور تاعك مسخن مليح مسبقا حوالي 15 دقيقة .
ايه نسيت في المكونات مذكرتش الفانيلا انا حطيت فيه فانيلا سائلة عطاتني هذاك اللون الاصفر الشباب. و ثاني يمكن تكون كمية الفرينة اقل او اكثر بقليل على حساب النوعية المهم العجينة لازم تجي لاصقة ما بين يديك . و اذا عندك الوقت طبعا تقدري تعجنيها صباح و تخليها تخمر في حرارة الغرفة حوالي ساعة او ساعتين و تشكليها و تخليها تخمر مرة ثانية و تحضر لقهوة لعشية بالصحة و الهنا.
|
ربي يجازيك خير أختي رزيقة على الوصفة ان شاء الله نقدر نديرو في أقرب فرصة
( تقرير عن مشاركة سيئة )، و الموجودة أسفل كل مشاركة .
2016-10-20, 00:17
العرض الشجري